ل گۆرا نووچه‌یا وه‌لات تڤێ، ئیسرائیل ل جهه‌کی نهێنی ل باکور ڕوونشتنه‌ک لدارخست و ئارتێشا وی وه‌لاتی ئاڤاکرنا یه‌کینه‌یه‌که تایبه‌ت یا ده‌ستوه‌ردانا بله‌ز ل بلنداهیێن گۆلان ڕاگەهاند.
گه‌نه‌رال یار بلای، کو چاڤدێریا یه‌کینه‌یا نوو یا ب ناڤێ “به‌ڕی” دکه، دێ ئه‌و یه‌کینه وه‌ک هێزه‌ک ئەکتیڤ یا ژناڤبه‌ر به کو دکاره د ناڤا چه‌ند چرکه‌یان دا ته‌ڤبگه‌ره و ڕێگریێ ل هه‌ر ئێریشه‌ک مینا یا ۷ێ جۆتمه‌هێ (۲۰۲۳ئان) بکه. بلای ته‌که‌ز کر ژی کو، دێ ئه‌و یه‌کینه‌یا نوو هه‌ر وه‌خته‌کی و د هه‌موو ده‌مان دا ئاماده‌به.
وی به‌رپرسێ ئیسرائیلی گۆت ژی کو: “ئه‌گه‌ر بوویه‌ره‌ک ئه‌وله‌هیێ چێببه، دێ (یه‌کینه‌یا به‌ڕی) بێ ڕه‌حمه‌ت ئێریشی دژمن بکه. ئه‌گه‌را تێکچوونا وێ نینە ژ به‌ر کو ئه‌و ب هشیاریا به‌رده‌وام ڤه گرێدایی یه.”
ئه‌ڤ یه‌کینه ژ شه‌رڤانێن کو ژ یه‌کینه‌یێن ئه‌لیت\بژارە و هه‌ری باش ئێن ئارتێش و ئیستخباراتا له‌شکه‌ری یا ئیسرائیلێ هاتنه هلبژارتن، پێک تێ. و ژ بۆ کارێن کو ژ وان را هاتنه ده‌ستنیشانکرن هاتنه په‌روه‌رده‌کرن.
چاڤکانیێن له‌شکه‌ری دیار کرن کو خه‌باتێن ئاڤاکرنا ڤێ یه‌کینه‌یێ به‌ریا ۳ مه‌هان د چارچۆڤه‌یا ده‌رسوەرگرتن ژ بوویه‌رێن ۷ێ جۆتمه‌هێ دا ده‌ست پێ کرنه. ئارمانج د ده‌ستپێکێ دا ڕووبرووبوونا ملیسێن گرێدایی ئیرانێ بوو، چ سووری، یه‌مه‌نی، ئیراقی، ئان یێن دن، کو دبه کو ژ بلنداهیێن گۆلانێ ل دژی وارگه‌هێن جهوویان ل ور ته‌ڤبگه‌رن.
“لێ گه‌شه‌دانێن ڤێ داوی ل سووریێ و کۆنترۆلکرنا چەند باژارێن مه‌زن ل سووریێ ژ ئالیێ ڕێخستنا ده‌سته‌یا ته‌حریر شام ڤە، هه‌وجه‌هیێ ب له‌زتر دکه، و دژمن د جه‌وهه‌رێ خوه دا به‌رفره‌هتر دکه. ئه‌ڤ هێمان ل نێزیکی سینۆرێ ب ئیسرائیلێ را ل باشوورێ سووریێ هه‌نه، لێ ئه‌و گه‌ف ل وێ ناخون.” ل گۆر کو چاڤکانیه‌ک له‌شکه‌ری یا ئیسرائیلی ژ ئاژانسێن نووچه‌یان را دیار کریه.
