رۆژا ٢٠٢٢/١٢/٢٧ێ مالپهرا “ئاوێنه” راپۆرتهک بهلاڤ کریه ل سهر گۆتنێن زوبێر ئایدار ئهندامێ رێڤهبهریا پهکهکێ یێن ژ بۆ تهلهڤزیۆنا پارتیا خوه، کو ئایدار بهحسا وی کهسی کریه یێ کو رۆژا ٢٠٢٢/١٠/٤ێ چالاکڤانا پهکهکێ ئاگیهان ئاکارسهل ل ناڤ باژارێ سلێمانیێ کوشتی.
ل گۆری وێ راپۆرتێ، زوبێر گۆتیه: “کهسێ کو ئاگیهان ئاکارسهل کوشتیه، ئهم ناس دکن و ئهم زانین چ گۆتیه و دخواست پشتی کوشتنا ئاگیهان برهڤه ههولێرێ، لێ هات گرتن.”
د دهستپێکێ دا و بهریا بهرسڤدانا کورت و کورمانجی بۆ گۆتنێن زوبێر ئایدار، جهێ کو بالا یهکی دکشینه ههلوهستا مالپهرا “ئاوێنه”یه، کو وهک کهسهکی ژ بۆ خوه هنگڤین د دارهکێ دا دیتبه، ل شوونا کو ههرن ل سهر هورگلیێن بوویهرا کوشتنێ لێکۆلینێ بکن، ل شوونا کو ههرن ل هورگلی و شهرتوومهرجێن جێبهجێکرنێ و فهرماندار و کهسێن ل پشت بوویهرێ بگهرن، هاتنه بێبهختیان دخن ستوویێ ههولێرێ. هاتنه گۆتنهکا زوبێر کرنه مانشێتا راپۆرتا خوه، کو نهشهرته راست به ژی. ئاخر ئهو گۆتن ب خوه ژی، داخواز و نیهتهک بوویه و چێنهبوویه، پشترا کی دبێژه کو ئهو گۆتنا وی کهسێ کو ئاگیهان کوشتیه، راسته؟ و نه گۆتنا کهسێن ل پشت وی نه؟… ژ وێ ژی گرنگتر، ئهگهر وی کهسی ئهو گۆتن ژی کربه، ئهڤ یهک نیشان و دهلیله ژ ڕق و کینهیا وان کهسێن کو ژێ را ل چهپکان ددن.
زوبێر و پارتیا وی ئهگهر خهما ئهنداما خوه خواربانا و ل راستیان گهریابانا، گهرهک بهرێ خوه دابانا دهسهلاتا سیاسی و ئهمنی یا جهێ کو ئاگیهان لێ هاتیه کوشتن، کو ل بن دهسهلاتا وان و ل بهر چاڤێ وان ئهڤ کوشتن چێبوویه. جهێ پرسیارێیه، پهکهکه چما دهست ژ جهو دهم و هورگلیێن کوشتنا ئهنداما خوه بهردایه، دهست ژێ بهردایه کو کی ل پشت وێ کوشتنێیه و بکوژ چهک ژ کو ئانیه، لێ هاتیه ب وێ یهکێ گرتیه کو بکوژی دخواست برهڤه؟!
“ئاوێنه” گۆتنێن زوبێر بهلاڤ کرینه کو دبێژه: “بکوژ گۆتیه ئهو ژ بۆ کوشتنا ئاگیهان ئاکارسهل چووبوو سلێمانیێ و (وانا) پهره و ههرتشتهک دابوون بکوژ.” ئهم ژی ل ڤر دپرسن، “ئهو کهسێن کو پهره دانه بکوژ” کی نه و چما زوبهیر نهوێره یان ناخوازه ناڤێ وان بێژه؟!!
پشترا، ئهگهر نییهتا بکوژ ههبوو برهڤه ههولێرێ، گهلۆ زوبهیر و پهکهکه دکارن ژ مه را بێژن بکوژێن ئهندامێن وان یێن دن کی نه و ل کودهرێ نه؟.. ئهرێ بکوژێ کانی یهلماز بهرپرسێ پهکهکێ یێ ئهورۆپا و بهرپرسێ زوبهیری ب خوه ژی کییه و ل کودهرێیه؟
پارتیا زوبهیر (پهکهکه) خوهدی دیرۆکهکا رهشه د کوشتن و رهڤاندن و ههولا ژناڤبرنا ئهندامێن خوه دا. نه دووره کو ئهڤ گۆتنێن وان و دهرخستنا بههانهیان و ئانینا ناڤێ ههولێرێ، ههولهکا دن بە ژ بۆ ڤهشارتنا لاپهرهکێ ژ دیرۆکا وانا رهش.
بهشێ رهوشهنبیری و راگەهاندنێ یێ پارتیا دهمۆکراتا کوردستانێ
بەرسڤەکا کورت ژ بۆ زوبێر ئایدار و مالپەرا ئاوێنە
![](https://sibehi.com/wp-content/uploads/2022/12/Zubeyir-Aydar.jpg)