ب تەنێ (پدك) دكارە دەستكەفتیێن نەتەوەیی مسوگەر بكە

هلبژارتنێن پارله‌مه‌نتۆیا کوردستانێ یێن د ٣٠ ئیلۆنێ ده‌ بێنه‌ کرن گه‌له‌ک گرینگه‌. ژ بۆ ڤێ ژی هه‌ر پارتیه‌ک ل گۆرا خوه‌ پرۆپاگانده‌یا خوه‌ دکه‌ و ژ بۆ چه‌ند کورسیان ده‌ستبێخن گه‌له‌ک سۆزا ددن و به‌حسا ده‌رباسبوویێن خوه‌ و خه‌باتا خوه‌ یا پێشه‌رۆژێ دکن. بێگومان هه‌ر ئالیه‌ک به‌حسا سه‌رکه‌فتیێن خوه‌ دکه‌ و هه‌ر هه‌ولددن کو کریارێن خوه‌ ب ئاوایه‌ک ئه‌رێنی بفرۆشن خه‌لکێ ژ بۆ ده‌ستخستنا چه‌ند ده‌نگێن زێده‌. لێ ل باشوورێ کوردستانێ راستیه‌ک هه‌یه‌ کو، ژ گۆتن و پرۆپاگاندا ئالیێن سیاسی دکن، زێده‌تر بوویه‌رێن کو قەومینە ژ ئالیێ خه‌لکێ هه‌رێمێ ڤه‌ باش تێن دیتن. ژ ئالیێ هه‌موو پارتیان ڤه‌ تێ قه‌بوول کرن کو (پدک) د هلبژارتنان ده‌ جاردن دبه‌ یه‌که‌مین. ژ بوو پارتیا دویه‌م ژی ڕکەبه‌ریه‌ک مه‌زن د ناڤبه‌را (ینک) و گۆران ده‌ هه‌یه‌. هنده‌ک پارتیان گه‌له‌ک هه‌ولدان کو هلبژارتن بێنه‌ پاشخستن ، لێ (پدک) ب ئیسرار داخوویاکرن کو دڤێ هلبژارتن د ده‌ما هاتی دیار کرن ده‌ بێن كرن. پارتیێن دخوه‌ستن هلبژارتن بێنه‌ پاشخستن ژ خوه‌ دترسیان و هێشتا ژی ئه‌و ترس د زکێ وان ده‌ هه‌یه‌. ئه‌گه‌ر ئه‌ڤ ترسا وان جهێ خوه‌ بگره‌ دێ ژ به‌رژه‌وه‌ندیا کوردستانێ رە به‌. نها ده‌ما مرۆڤ ده‌نگێ خوه‌ بده‌ ئالیه‌کی دڤێ بکاربه‌ سه‌ده‌مێن وێ ژی بده‌ دیار کرن. گه‌لۆ که‌سه‌ک ژ بۆ چ ده‌نگێ خوه‌ بده‌ (ینک) ێ؟ حه‌تا ئه‌و گروبا خیانه‌تا ١٦- ئۆکتۆبه‌رێ پێکانی د ناڤ (ینک) ێ ده‌ ده‌ستهلات به‌، (ینک) هه‌موو دبه‌ شریکێ وێ بوویه‌رێ. باوه‌ربکن گه‌له‌کی زه‌حمه‌ته‌ کو مرۆڤ سه‌ده‌مێ ده‌نگا بده‌ ینکێ یان ژی گۆران بده‌ ئاشكراكرن. لێ ئه‌ڤ یه‌ک ئه‌گه‌ر مرۆڤ کوردستانیبه‌ و به‌رژه‌وه‌ندیێن کوردستانێ بپارێزە زه‌حمه‌ت دبه‌. ژ ئالیه‌ک دن ته‌نێ ژ بۆ دژاتیا (پدک) ێ ژی خه‌لکه‌ک هه‌یه‌ کو ده‌نگا دده‌ ڤان پارتیان. ئه‌ڤ یه‌ک ژی نه‌ ئه‌خلاقیه‌ و کینه‌که‌ کو نکارن ژ ناڤا خوه‌ باڤێژن. ژ خوه‌ هنده‌ک رێخستن ژی د ڕاستیا خوه‌ ده‌ ژ بۆ دژاتیا (پدک)ێ هاتنه‌ دامه‌زراندن و سیاسه‌تا خوه‌ ده‌ ته‌نێ دژبه‌ریا پدکێ دکن. ئه‌ڤ یه‌ک ژی سەقەتیەك هه‌ری مه‌زن یا سیاسه‌تا هنده‌ک ئالیێن کوردانه‌. پارتیه‌کا وه‌ک کۆمه‌لا ئیسلامی دڤیا ل کوردستانێ قه‌ده‌خه‌بوویا. ژ به‌ر کو ئه‌ڤ پارت نه‌ ل گۆرا نۆرمێن مرۆڤاتیێ یه‌ و هه‌ر ده‌م دکاره‌ کوردستانێ ب ئه‌رزان بفرۆشه‌. ئه‌گه‌ر سه‌رۆکێ ڤێ پارتیێ ده‌ما سروودا نه‌ته‌وی ئه‌ی ڕقب بێته‌ گۆتن ڕێزێ لێ نه‌گره‌ و ڤێ سرودێ ل دژێ سیاسه‌تا کو لێ باوه‌ر ببینه‌، مرۆڤ دکاره‌ چ بێژه‌؟ ئه‌گه‌ر هه‌ر کورده‌ک ل باشوور قۆناخا ڕەفه‌راندومێ و ڤێ یه‌کێ ڤه‌ گرێدایی شه‌رێ پردێ، مه‌خموور و سحێلا به‌ر ب چاڤ بگره‌. ڕەنگێ ده‌نگێ وان خوویا دبه‌. ل باشوور (پ ک ک) ژی د ناڤ ده‌ ل همبه‌ر (پدک) ێ سیاسه‌ته‌ک گه‌له‌ک قرێژ تێ ڕێڤه‌برن. پرۆپاگانده‌یه‌ک ده‌ره‌و تێ کرن. ل هەمبه‌ر ڤێ یه‌کێ سه‌کنا (پدک) ێ و سیاسه‌تا کو ڕێڤه‌ دبه‌ ڕاسته‌. ممکنه‌ مرۆڤ د هنده‌ک واران ده‌ ڕەخنا ل (پدک) ێ بکه‌. یان ژی هه‌ڤوه‌لاتیه‌ک ژ ته‌سه‌روفێن هنده‌ک به‌رپرسێن پارتیێ ل هنده‌ک ده‌ڤه‌ران نه‌ ڕازی به‌، یان ژی گازندا ژ حوکومه‌تێ بکه‌ ئه‌ڤ تشته‌ک گه‌له‌ک نۆرماله‌. ژ خوه‌ سه‌رۆک بارزانی د جڤینا ل گه‌ل کادرۆیێن (پدک) ێ ده‌ گه‌له‌ک ڤه‌کری دبێژه‌: به‌حسا ده‌ستکه‌فتێن (پدک) بکن و ده‌ست بخن سه‌ر کێماسیان ژی و خوه‌ ژ ته‌شهیر و سۆزێن مه‌زنێن بێ کردار دوور بگرن و ب ته‌ڤاهی پابه‌ندی قانوونێ بن. ده‌ما مرۆڤ به‌حسا کێماسیێن خوه‌ بکه‌، پتر دکاره‌ ب ده‌ستکه‌فتیێن خوه‌ سه‌رفراز به‌. ئه‌گه‌ر (پدک) نه‌بوویا نها کوردستانا باشوور ب ته‌مامی د بن ده‌ستهلاتا به‌غدایێ ده‌ بوویا. سه‌رکه‌فتنا (پدک) ێ د هلبژارتنان ده‌ ، سه‌رکه‌فتن و هێزبوونا کوردستانێیه‌. ژ به‌ر کو ته‌نێ (پدک) ل باشوور ژ بۆ ده‌ستکه‌فتیێن نه‌ته‌وی به‌رخوه‌ دده‌ و ده‌ما پێویست دکاره‌ خاکا کوردستانا ئازادبپارێزه‌. (پدک) ێ د ده‌ما ئێریشێن ئارتێشا عیراقێ و ملیسێن شیعه‌ ل سه‌ر کوردستانێ ده‌، ل پردێ‌، مه‌خموور و سحێلا ئه‌ڤ یه‌ک ب خوینا پێشمه‌رگه‌یێن کوردستانێ ئیسپات کریه‌. ئه‌گه‌ر مرۆڤ به‌رژه‌وه‌ندیێن نه‌ته‌وی و کوردستانیبوونێ وه‌ک پیڤان بگره‌ ژ بلی پدکێ تو به‌دیله‌ک دن نینە کو مرۆڤ ده‌نگێ خوه‌ بدێ. پدک و بارزانی گارانتیا هه‌یینا کوردستانێیه‌. ڕێبازا (پدک) ل سه‌ر دچه‌ ڕێبازا خه‌باتا سه‌رکه‌فتنا کوردستانێ، ڕێبازا بارزانیێ نه‌مره‌. بباوەریا من دێ (پدک) د ڤان هلبژارتنان ده‌ ل هەمبه‌ر هه‌موو دژبه‌ریێ، دێ % ٤٠ ده‌نگا بگره‌، ڕێژه‌یا ده‌نگێن (پدک) ێ دکاره‌ ببە ژ % ٤٠- ٤٤ێ. لێ ئه‌ڤ تێرێ ناکه‌ کو پدک ب هێسانی بکاربه‌ به‌رناما خوه‌ ژ بۆ کوردستانێ بێخه‌ ژیانێ. ژ به‌ر کو هنده‌ک هه‌ڤپه‌یمانیێن تێنه‌ کرن، بڤێ نه‌ڤێ جارێ ل لنگێ پدکێ ھلنگڤن. ژ بۆ کوردستانه‌ک بهێزتر پێوستی بسه‌رکه‌فتنا (پدک) ێ هه‌یه‌. ١٧. ٩. ٢٠١٨ دارا بیله‌ک

نێرین / شیرۆڤە