به‌ری دو سالان، سه‌نته‌رێ کۆماته یێ ده‌کۆمه‌نتکرنا دیرۆکا شۆره‌شێ، ب پشته‌ڤانیا جه‌نابێ کاک نێچیرڤان بارزانی، جیگرێ سه‌رۆکێ پارتییا ده‌مۆکراتا کوردستانێ (پدک) و ب ئالیکاریا کاک ئاکۆ محه‌مه‌د رێڤه‌به‌رێ تۆرا مدیایی یا رووداوێ، ژ بۆ تۆمارکرن و ئارشیفکرنا دیرۆکا شۆره‌شێن کوردستانێ، پێنگاڤا خوه یا یه‌که‌م ئاڤێت
سه‌نته‌رێ کۆماته ب ستافه‌کێ گه‌له‌ک بچووک و شیان و ئیمکانێن سنووردار، لێ ب ئیراده و ڤیانه‌که گه‌له‌کا مه‌زن و ب جانێ پێشمه‌رگاتیێ، ده‌ست ب ڤی کار و خه‌باتێن پیرۆز کر و به‌رده‌وام بوو.
ئیرۆ رۆژا سێشه‌مێ ٢٠٢٣/١٢/١٩ێ هه‌ژمارا وان تێکۆشه‌ر و خه‌باتکارێن کو، هه‌تا نوها سه‌نته‌رێ کۆماته هه‌ڤپه‌یڤین پێ را کریه و دیرۆکا وان و چیرۆکا خه‌باتا وان تۆمار و ئارشیف کریه، گهایه ۲۰۰ خه‌باتکاران. هه‌ڤپه‌یڤینێن ڤان خه‌باتکاران هه‌موو ب هه‌ڤ را زێده‌تر ژ ۸۳۰ ده‌مژمێرانه.
ئه‌ڤ ۲۰۰ خه‌باتکارێن سه‌نته‌رێ کۆماته هه‌ڤپه‌یڤین پێ را کریه، پرانیا وان پێشمه‌رگه بوونه و پرانی ژی پێشمه‌رگه یێن هه‌ر دو شۆره‌شێن ئیلۆن و گولانێ بوونه. گه‌له‌ک ژی ژ وان هه‌م پێشمه‌رگه و هه‌م ژی زیندانیێن سیاسی بوونه. لێ هه‌روه‌سا، پێشمه‌رگه یێن شۆره‌شێن بارزان (۱۹٤۳-۱۹٤٥)، یێن کۆمارا کوردستان ل مهاباد و یێن پێڤاژۆیا ده‌رباسبوونا ل چه‌مێ ئاراس و چوونا یه‌کێتیا سۆڤیه‌تێ ب بارزانی یێ نه‌مر را ژی د ناڤ دا هه‌نه. چه‌ند ئه‌ندامێن پارتیا هیوا ژی د ناڤ وان دا هه‌نه.
د ناڤ وان ۲۰۰ خه‌باتکارێن هه‌ڤپه‌یڤین پێ را هاتیه کرن، هه‌روه‌سا، هه‌ژماره‌کا ژنێن خه‌باتکار کو، هنده‌ک ژ وان زیندانیێن سیاسی و هنده‌ک ژی ژنێن نانده و خه‌باتکارێن ناڤ شۆرەشێ نه، هه‌نه.
د ناڤ ڤان ۸۳۰ ده‌مژمێرێن هه‌ڤپه‌یڤینان دا ب هه‌زاران چیرۆکێن گه‌له‌ک بالکێش هه‌نه کو، مرۆڤ دکاره باشترین فلم، دراما، رۆمان و په‌رتووکێن دیرۆکی ل سه‌ر چێکه.
سه‌نته‌رێ کۆماته ب وێ ئارشیڤا ل به‌ر ده‌ست هه‌یه، د ناڤا ڤان دو سالان دا، کاریه د وارێ دیرۆکێ دا ئالیکاریا ب ده‌هان خوه‌ندکارێن دکتۆرا، ماسته‌ر و باکالۆرۆسێ بکه.
سه‌نته‌رێ کۆماته، هه‌تا نوها، ل بیره‌وه‌ریێن گه‌له‌ک پێشمه‌رگه و خه‌باتکاران ژی خوه‌دی ده‌رکه‌تیه و کاریه دو په‌رتووکێن بیره‌وه‌ریێن وان ژ مرنێ رزگار بکه، چاپ بکه و په‌رتووکا سێیان ژی نوها ژ بۆ چاپێ تێ ئاماده‌کرن.
د پێنگاڤه‌که دن دا، سه‌نته‌رێ کۆماته، ب هه‌ماهه‌نگی دگه‌ل سه‌نته‌رێ زاخۆ یێ لێکۆلینان ل زانینگه‌ها زاخۆیێ، کاریه نێزیکی ۱۳٦ ژ ڤان ۲۰۰ هه‌ڤپه‌یڤینان، ب رێیا خوه‌ندکارێن خوه یێن هه‌ر دو پشکێن دیرۆکێ و زمانێ کوردی، وان هه‌ڤپه‌یڤینان ده‌رخه سه‌ر کاخه‌زێ و نوها کار ل سه‌ر تێ کرن کو، د پاشه‌رۆژێ دا وه‌ک په‌رتووک وه‌رن چاپکرن.
سه‌نته‌رێ کۆماته چیرۆکێن ڤان خه‌باتکاران به‌رده‌وام د مالپه‌رێ خوه دا، فێسبۆک، ئینستاگرام، ته‌له‌گرام، تیکتۆک و یوتوبێ ژی دا به‌لاڤ دکه.
ل داویێ ئه‌ز دخوازم جاره‌که دن سپاسیا جه‌نابێ کاک نێچیرڤان بارزانی بکم، ژ بۆ پشته‌ڤانیا وی یا به‌رده‌وام بۆ خه‌باتێن سه‌نته‌رێ کۆماته. سپاسیه‌که گه‌رم بۆ کاک ئاکۆ محه‌مه‌د، ژ به‌ر کو ب راستی ژی ئه‌گه‌ر ئه‌و نه‌بوویا باوه‌ر ناکم ڤی پرۆژه‌یی رۆناهی بدیتا. هه‌روه‌سا ژ دل و جان سپاسیا هه‌ڤالێن خوه یێن سه‌نته‌رێ کۆماته دکم کو، ب شه‌ڤ و رۆژ وه‌ک پێشمه‌رگه یێن خوه‌به‌خش دخه‌بتن و خزمه‌ته‌که مه‌زن دکن، هه‌تا کو مه کاری ڤێ پێنگاڤا مه‌زن پاڤێژن. سپاسیه‌کا تایبه‌ت پێشکێشی وان هه‌موو هه‌ڤال، دۆست و خوه‌شتڤیان بکم یێن کو به‌رده‌وام ب په‌یڤ و نرخاندنێن خوه هێزه‌که زێدەتر ب مه ددن و ژ بۆ خزمه‌ته‌کا مه‌زنتر مه ته‌شویق دکن.
به‌رپرسێ سه‌نته‌رێ کۆماته
رزگار کێسته‌یی
٢٠٢٣/١٢/١٩
دهۆک
