پشتی کو چه‌ندین مه‌دیایێن ناڤده‌وله‌تی و هه‌رێمی ڕاگەهاندن کو ۳٥۰ ملیۆن دۆلار ژ کورێن جه‌لال تاله‌بانی ل ئیماراتێ ب فه‌رمانا ئەمریکایێ هاتنه ده‌سته‌سه‌رکرن، ژ به‌ر کو هه‌موو په‌ره‌یێن کو ب ئاوایێن جودا یێن نه‌قانوونی ژ ئالیێ بافل و قوباد ڤه هاتنه بده‌ستخستن.
ل گۆری ئاگاهیان: پشتی چه‌ندین هه‌ولێن کورێن تاله‌بانی ژ بۆ ڕزگارکرنا په‌ره‌یێن خوه، ئیمارات ڕه‌د کر کو بلۆکا ل سه‌ر په‌ره‌یان ڕاکه، ژ به‌ر کو ئەمریکایێ ب فه‌رمی ڕاگەهاندیه کو ئه‌و په‌ره نه‌قانوونی و ڕه‌شن.
د هه‌ولا داوین دا، بافل ژ سه‌رۆکێ به‌رێ یێ پەرلەمه‌نتۆیا ئیراقێ محه‌مه‌د حه‌لبووسی خوه‌ست کو هه‌ول بده کو په‌ره‌یێن وی ژ ئیماراتێ ڕزگار بکه، د به‌ردێلا ۱۰۰ ملیۆن دۆلاران دا ئه‌گه‌ر حه‌لبووسی د ڤی کاری دا ب سه‌ر بکه‌ڤه. ژ به‌ر ڤێ یه‌کێ د ده‌ما مه‌راسیما جه‌نازه‌یێ شێخ ته‌هنوون بن مه‌مه‌د ئه‌ل نه‌هیان دا ل ئیماراتا عه‌ره‌بی، حەلبووسی بافل تالەبانی ب خوه را بر سه‌ر مه‌راسیما سەرساخیێ یا ل ئیماراتێ و ب هه‌ڤ را به‌شداری مه‌راسیما سه‌رساخیێ بوون. د ده‌ما مه‌راسیمێ دا حه‌لبووسی و بافل تاله‌بانی ژ سه‌رۆکێ ئیماراتێ شێخ محه‌مه‌د بن زایه‌د ئال ناهیان خوه‌ستبوو کو په‌ره‌یێن وان به‌رده، لێ وی ب توندی ڕه‌د کر کو په‌ره‌یێن وان به‌رده و ژ بافل تاله‌بانی و محه‌مه‌د حه‌لبووسی را گۆت: هوون ژ بۆ تازیێ یان ژی ژ بۆ په‌ره‌یان هاتنه”!
پشتی سەرنەکەفتنا ڤێ هه‌ولدانێ ژی، ڤێ جارێ بافل و قوباد تاله‌بانی جاره‌که دن هه‌ول دان کو په‌ره‌یێن خوه ل ئیماراتێ ب پێدانا به‌رتیل و رەشوێ بەربدن، ئیمارات ب ڤێ یەکێ حەسیا و ئه‌و وەک پێنگاڤا گه‌نده‌لیێ یا ژ بۆ به‌ردانا په‌ره‌یێن خوه ل ئیماراتێ ئێدی حساب کر و بەپرسێن ئیماراتێ گوتن کو، ئه‌ڤ ده‌ر نه جهێ به‌رتیلێ یه و په‌ره‌یێن وه ژ ئالیێ سیسته‌ما بانکا جیهانی ڤه هاتیه ئاسته‌نگکرن و کەتنە د لیسته‌یا ڕه‌ش دا .
