راپۆرتا شەرێ خەندەکان

یه‌کێتیا ئۆده‌یا مهه‌ندسان ل ترکیێ د ده‌ربارێ بوویه‌رێن شەرێ خه‌نده‌کان سالا ۲۰۱٦ ێ ڕاپۆرته‌ک ڕاگەهاندن. د ڕاپۆرتێ دا تێ ئاشکرا دبە کو ب سه‌ده‌ما شه‌رێ “ خه‌نده‌کان“ ٤۰۰ هه‌زار که‌س ژ باژارێن کوردا بار کرنه‌ و کۆچبه‌ر بوونه‌.

ئەڤ ڕاپۆرت پشتی شه‌رێ خه‌نده‌قا ل شرنه‌خ، جزیرێ، سلۆپی، هه‌زه‌خ، نسێبین، گه‌ڤه‌رێ و سورێ هاتیه‌ ئاماده‌ کرن.

د ڕاپۆرتێ دا د به‌شا جیزیرێ دا دده‌ خوویاکرن کو شه‌ر ل ٤ تاخێن باژێری به‌لاڤ ببوو. گه‌له‌ک جارا قه‌ده‌غەیا ده‌رکه‌تنا ده‌رڤه‌ هاتیه‌ ڕاگەهاندن. ڕاپۆرت دبێژه‌ کو ۲٥۱ کوشتی هاتنه‌ قەید کرن لێ ل گۆر هندەک ژێدەرێن دن، هژمارا کوشتیا د سه‌ر ۲۸۰ که‌سان ڕا یه‌. گه‌له‌ک ئاڤاهیێن کو د شه‌ر دا زه‌ره‌ر نه‌دیتین ژی هاتنه‌ شه‌وتاندن.

هه‌روه‌ها یه‌کێتیا شاره‌داریێن هه‌رێما باشوورێ رۆژهلات ژی داخوویانیه‌کا خوه‌ دا دده‌ خوویاکرن کو،۱۲۰۰ ئاڤاهی خرا بوونه‌ و ۱۰ هه‌زار ئاڤاهیا ژی زه‌ره‌ره‌ک مه‌زن دیتنه‌.

ل هه‌زه‌خێ قه‌ده‌غه‌یا ده‌رکه‌تنا ده‌رڤه‌ ٤۳ ڕۆژان به‌رده‌وام کریه‌ و ژ % ۸۰ نشته‌جیێن ناڤچه‌یێ کۆچبه‌ر بوونه‌.

ل سلۆپی ۳۷ ڕۆژان قه‌ده‌غه‌یا ده‌رکه‌تنا ده‌رڤه‌ به‌رده‌وام کریه‌ ، ل ناڤچه‌یێ ۲۹ که‌س هاتنه‌ کوشتن و هژمارا کۆچبه‌ران ۱۱ هه‌زارن .ل سلۆپی ۳٥۱ ئاڤاهی کاڤل و وێران بوونە.

ل شرنه‌خ ۳۹۱ ڕۆژ قه‌ده‌غه‌یا ده‌رکه‌تنا ده‌رڤه‌ به‌رده‌وام کریه‌.٦٤هه‌زار کەس ژ مال و وارێ خوه‌ کۆچبەر بوونه‌ و بەر ب دەڤەرێن دن چوونە.۷ تاخێن باژێر ب ته‌مامی تێکچوونه‌ و ئاڤاهی لێ نه‌مانه‌.

ل گه‌ڤه‌رێ قه‌ده‌غه‌کرنا ده‌رکه‌تنا ده‌رڤه‌ ۷۹ ڕۆژا به‌رده‌وام کریه‌،۹٦ که‌سی ژییانا خوه‌ ژ ده‌ست دانه‌. ل گۆر ڕاپۆرتا ئۆده‌یا مهه‌ندسێن وانێ ۷۸۷ ئاڤاهی ب ته‌مامی و ٦٤۷ ئاڤاهی ژی نیڤ خرابوونه‌. ۱۳۳٦ خانی ژی شه‌وتینه‌. ل گۆر هژمارا نشته‌جیان ژ % ۳٥ ئینسان بێ خانی و مال مانه‌.

ل نسێبینێ گه‌له‌ک جارا قه‌ده‌غەیا ده‌رکه‌تنا ده‌رڤه‌ هاتیه‌ ڕاگەهاندن. ل باژێر ٥۰۷۲ ئاڤاهی تێکچوونه‌. ٤٥ هه‌زار که‌سی ژ باژێر بار کرنه‌ و بوونه‌ کۆچبه‌ر.

ل سورا ئامەدێ، ناڤچه‌یا دیاربه‌کرێ، گه‌له‌ک جارا قه‌ده‌غه‌یا ده‌رکه‌تنا ده‌رڤه‌ هاتیه‌ ڕاگەهاندن و ل سورێ شه‌ر ۱۰۳ ڕۆژان به‌رده‌وام کریه‌. ل سورێ ٦ تاخێن ناڤچه‌یێ ب ته‌مامی خرابوونه‌ و ٤۰۰ هه‌زار که‌سی ژدەست مالێ خوه‌ به‌ردانه‌ و بوونه‌ کۆچبه‌ر.

پارتیا کارکەرێن کوردستانێ (پەکەکە) سالا ٢٠١٦ ێ شەرێ خوە ڤەگوهاست ناڤ باژارێن باکورێ کوردستانێ، د ناڤ باژاران دا خەندەک کۆلان و شەرێ دەولەتا ترک کر.

نێرین / شیرۆڤە