كورسیا تالەبانی دێ ژبۆ كێ بە

ھەر دەما بەحسا بەستنا كۆنگەرەیا چارێ یا يەكێتیا نشتمانیا كوردستانێ دھێتە كرن، ناكۆكیێن ناڤبەرا باسك و گرۆپێن ناڤا یەكێتیێ كوور و دژوار دبن و شەرێ ل سەر وەرگرتنا كورسیا جەلال تالەبانی گەرم دبە.

جەلال تەلەبانی ژ رۆژا دامەزراندنا یەكێتیێ، ئانكو ژ سالا 1975ێ ھەتا كۆچا داوی كری د چریا یەكەم سالا 2017ێ دە، ئەو سەكرەتەرێ گشتیێ یەكێتیێ بوو،

پشتی جەلال تالەبانی كۆچا داوی كری، ھەڤژینا وی ھێرۆ ئیبراھیم ئەحمەد وەكە كەسا یەكەم ناڤ یەكێتیێ دەركەت و چەند ئەندامێن مەكتەبا سیاسیی ل پشت وێ بوون، وێ دەستێ خوە دەینا سەر  ھەموو داراییا یەكێتیێ و ھەموو دەستھلات خستن دەستێ خوە.

نھا ھێرۆ نەخوەش كەتیە و ژبەر رەوشا وێ یا ساخلەمیێ نكارا رۆلا خوە ببینە. كۆسرەت رەسوول ژی، ھەرچەند د ناڤا مەیدانا سیاسی ژی دایە و جیگرێ یەكەم یێ سەكرەتەرێ یەكێتیێ یە ژی، لێ نكارە وەكە كەسێ یەكەم یێ ناڤ یەكێتیێ رۆلا خوە ببینە و رەوشا وی یا ساخلەمیێ دەست نادە.

یەكێتی نشتمانی كوردستان ژ سالا 1975ێ ھەتا نھا ب تەنێ سێ كۆنگەرە كرنە و سالا 2012 ێ بریار دا كو كۆنگەرەیا خوە یا چاری بكە لێ ژبەر باكۆكیێن سیاسی ھەتا رۆژا ئیرۆ نكاریە كۆنگرەیا چاری ئامادە بكە.

چەند رۆژ بەرێ مەكتەبا سیاسیا یەكێتیێ بریار دا پشتی ئاڤاكرنا كابینەیا نوو یا حكومەتا كوردستانێ، كۆنگرەیا خوە یا چارێ بكە و جارەكە دن شەر د ناڤبەرا باسك و گرۆپێن وێ حزبێ دا گەرم بوویە.

ھەر ژ نھا مالباتا تالەبانی خوە ژبۆ وەرگرتنا كورسیا سەكرەتەرێ گشتیێ یەكێتیێ ئامادە دكن، كورێن جەلال تالەبانی، قوباد و باڤل و زڕبرازایێن جەلال تالەبانی، لاھۆر و ئاراس شێخ جەنگی شەرە ل سەر كورسیا تالەبانی.

پشتی نەمانا جەلال تالەبانی، رەوشا ناڤ یەكێتیێ گەلەك تێك چوو و ل بەر ھلوەشیانێ بوو، لێ پارتی ملێن خوە دانە بەر و نەھێلا یەكێتی ھلوەشە ب حێجەتا كو نە د بەرژوەندیا كوردستانێ دایە، گەلەك سیاسەتمەدار ڤێ ھەلوەستا پارتیێ ب ئاوایێن جودا رەخنەد دكن و پرانی ژی ب ھەلوەستەك شاش دزانن.

پشتی رەفەرەندووما سەرخوەبوونا كوردستانێ د 25.09.2017 ێ دا، ئیران ب ئاوایەكی ڤەكری و چالاك ھاتە سەر خەتی و ملێن خوە دان بەر یەكێتیێ و ب سەرۆكاتیا باڤل، لاھۆر، ئاراس و چەند كەسێن ناڤ یەكێتیێ دا خیانەتا 16ێ ئوكتۆبەرێ ئەنجام دا و ل گۆر پلانا دانای ھەرێما كوردستانێ تەسلیمی وان بھلتە كرن، لێ حسابا مالێ و بازاری ل ھەڤ نەكر و پلانا وان تێكچوو.

ب دیتنا ئیرانێ كەسێ كو بكاربە یەكێتیێ راگرە باڤلێ كورێ مەزن یێ جەلال تالەبانی یە و ئەڤە چەندەكە ئیران وی ژ بۆ سەكرەتەرێ گشتیێ یەكێتیێ ئامادە دكە. ژبلی كو د ناڤ یەكێتیێ بخوە دا ھەنە ناخوازن باڤل ببە سەكرەتەرێ یەكێتیێ، پارتی ناخوازە ئەو وێ پۆستێ وەربگرە.

قوباد زێدەتر ل ھەرێما كوردستانێ دھتە قەبوول كرن ببە سەكرەتەرێ یەكێتیی و پارتی ژی ڤ یەكێ دخوازە، لێ ئیران قوباد ناخوازە ژ بەر كو ئەو ل لەندەن و ئەمریكایێ پەروەردە بوویە و ھەڤژینا وی ژی جوھو یە.

كوسرەت رەسوول جیگرێ یەكەم یێ سەكرەتەرێ یەكێتیا نشتمانیا كوردستانێ، ئەو بخوە دزانە شەنسێ وەرگرتنا پۆستا سەكرەتەرێ یەكێتیێ نەمایە، رەوشا وی یا ساخەمیێ خەرابە، لێ ئەو دخەبتە كورێن خوە، شالاو و دەرباس، دەرباسی ناڤ مەكتەبا سیاسیا یەكێتیێ بكە.

شاناز ئیبراھیم، خووشكا ھێرۆ یا ھەڤژینا جەلال تالەبانی، كو ئەو ژی وەكە كەسەكا مالباتا تالەبانی دھێیە حساب كرن، نھا ئەو ژی ب چالاكی كەتیە د ناڤ شەرەنیخا وەرگرتنا كورسیا  جەلال تالەبانی دا و سەردانا وان ئەندامێن سەركردایەتی و مەكتەبا سیاسیا یەكێتیێ یێن نەرازی و عاز یێن ل مالا خوە روونشتنە دكە و دخەبتە ب وان رە بەرەیەكی ئامادە بكە، ئەو پشت گەرما مەلا بەختیار ە كو نھا ئەو ژی تورەیە و ل مالا خوە روونشتیە.

لاھۆر ب ئالیكاریا برایێ خوە و چەند كەسێن سەربازی یێن یەكێتیێ شەری ل سەر وەرگرتنا پۆستا سەكرەتەرێ گشتیێ یەكێتیێ دكە و ھەڤركێ كورێن جەلال تالەبانی دكە،

ب ڤێ تابلۆیا شێلی و شەرەنیخێ، گەلۆ دێ چەوا یەكێتی بكاربە كۆنگەریا چاری بكە؟

نووچە/ئەنالیز

نصرت حاجی

06.01.2019

نێرین / شیرۆڤە