پارتیا ئازادیا کوردستانێ (پاک) و ته‌ڤگه‌را جڤاکا ده‌مۆکراتیک (تدک-ته‌ڤگه‌ر) ل هه‌ڤ کرن.
پارتیا ئازادیا کوردستانێ (پاک) و ته‌ڤگه‌را جڤاکا ده‌مۆکراتیک (تدک-ته‌ڤگه‌ر) ڕاگەهاندن کو د بن ناڤێ پارتیا نه‌ته‌وەپارێزێن کوردستانێ (پوک) دا بوونه یه‌ک پارتی. موستافا ئۆزچه‌لیک بوو سه‌رۆکێ پوک. داخویانیا ل سه‌ر یه‌کبوونا پاک و تدک-ته‌ڤگه‌رێ وها یه: ئه‌م مزگینیا دامه‌زراندنا پارتیا وه‌لاتپارێزێن کوردستانێ (پوک) ب رایا گشتی را پارڤه دکن!
ئه‌م وه‌ک پاک و تدک-ته‌ڤگه‌ر، مزگینیێ بدن مله‌تێ کورد و گه‌لێ کوردستانێ کو ب کۆنگره‌یا یه‌کتیێ یا کو مه ل ئامه‌دێ ب جۆش و هه‌یه‌جانه‌ک مه‌زن ل دار خست، پارتیا وه‌لاتپارێزێن کوردستانێ (پوک) دامه‌زراند. ئیرۆ ٤۳ئه‌مین سالڤه‌گه‌را ده‌ربه‌یا له‌شکه‌ری یا ۱۲ێ ئیلۆنا ۱۹۸۰ێ یه. ئه‌م وه‌ک دامه‌زرینه‌رێن پارتیا وه‌لاتپارێزێن کوردستانێ (پوک) ڤێ داربه‌یا نه‌مرۆڤانه، له‌شکه‌ری-فاشیست شه‌رمه‌زار دکن. دامه‌زراندنا پارتیا وه‌لاتپارێزێن کوردستانێ (پوک) ژی به‌رده‌وامیا به‌رخوه‌دان و تێکۆشینێ یا ل دژی زلم و زلما داربه‌یا له‌شکه‌ری-فاشیست یا ۱۲ێ ئیلۆنێ یه. مه دوهی ل هه‌مبه‌ری زلم و زۆرداریێ سه‌ری نه‌ته‌واندیه، ئیرۆ ژی سه‌ری ناته‌وینین.
د ده‌ستپێکا گولانا ۲۰۲۲ئان دا د ناڤبه‌را پاک و تدک-ته‌ڤگه‌رێ دا ژ بۆ کو بنگه‌هێ یه‌کتیه‌ک سیاسی و رێخستنی بێ دانین، دیالۆگه‌ک ده‌ست پێ کر و د ئه‌نجاما لێکۆلینه‌ک به‌رفره دس پاک و تدک-ته‌ڤگه‌ر ل باکورێ کوردستانێ بریارا ئاڤاکرنا پارتیه‌ک گرسه‌یی دان. پاک و تدک-ته‌ڤگه‌رێ د ۹-۱۰ێ ئیلۆنا ۲۰۲۳ێ دا ل دیاربه‌کرێ کۆنگره‌یا خوه یا یه‌کتییێ ل دار خست و پارتییا وه‌لاتپارێزێن کوردستانێ (پوک) ئاڤا کرن. د کۆنگره‌یا دامه‌زرینه‌ر یا پارتیا وه‌لاتپارێزێن کوردستانێ (پوک) دا ب یه‌کده‌نگی موستافا ئوزچه‌لک وه‌ک سه‌رۆکێ گشتی یێ پوکێ هات هلبژارتن.
پارتیا وه‌لاتپارێزێن کوردستانێ (پوک) وه‌ک به‌رده‌وام و میراته‌یا تێکۆشینا ئازادیا کوردستانێ، هه‌موو تێکۆشین، خه‌بات، که‌د و نرخێن نه‌ته‌وی، ده‌مۆکراتیک، کوردستانی دپارێزه.
پارتیا وه‌لاتپارێزێن کوردستانێ (پوک) پاراستنا مافێ نه‌ته‌وه‌یا کورد و گه‌لێ کوردستانێ یه کو پاشه‌رۆژا خوه دیار بکن؛ دبێژه کو ئه‌ڤ ماف ل گۆری شه‌رت و مه‌رجێن نه‌ته‌وه‌یی، هه‌رێمی و ناڤنه‌ته‌وه‌یی د شه‌کلێ فه‌ده‌راسیۆن، کۆنفه‌ده‌راسیۆن ئان ژی سه‌رخوه‌بوونێ دا دکاره بێ بده‌ستخستن. پارتیا وه‌لاتپارێزێن کوردستانێ (پوک) ب به‌رچاڤگرتنا کو ل گۆر شه‌رت و مه‌رجێن نه‌ته‌وی، هه‌رێمی و ناڤنه‌ته‌وه‌یی دبه کو ئاوایێن چاره‌سه‌ریێن ناڤبه‌ینکار ده‌رکه‌ڤن هۆلێ، ئه‌م دخوازن دیار بکن کو ئه‌م ڤان چاره‌سه‌ریێن ناڤبه‌ینکار رەد ناکن، لێ وان وه‌ک گاڤێن کو رێ ل به‌ر چاره‌سه‌ریێ ڤه‌دکن دبینن.
پارتیا وه‌لاتپارێزێن کوردستانێ (پوک) لگه‌ل به‌رنامه‌یا خوه یا ستراته‌ژیک کو مافێ چاره‌نڤیسێ ل خوه دگره، دێ ژ ئیرۆ و پێ ڤه تێکۆشینا خوه یا ژ بۆ پێکانینا داخوازێن له‌زگین یێن نه‌ته‌وه‌یا کورد بدۆمینه. هه‌لبه‌ت پێویستیا یه‌کتیا پارتی، رێخستن، ته‌ڤگه‌ر، کۆم و که‌سایه‌تێن نه‌ته‌وی، ده‌مۆکرات، ئازادیخواز، کوردستانی یێن کو د وارێ به‌رنامه و نێرینێن خوه یێن سیاسی دا وه‌ک هه‌ڤ ئان دشبن هه‌ڤ، ب دامه‌زراندنا پارتیا وه‌لاتپارێزێن کوردستانێ ب داوی نابه.
پارتیا وه‌لاتپارێزێن کوردستانێ (پوک) د هه‌ر قۆناغه‌کێ دا ژ بۆ پێکانینا یه‌کتیا رێخستنی و سیاسی ل گه‌ل هه‌ر پارتی، رێخستن، ته‌ڤگه‌ر و گرووپا کو خوه‌دی هه‌مان به‌رنامه و نێرینێن سیاسی به، دێ د هه‌ر قۆناغێ دا ڤه‌کری به. هه‌لبه‌ت دامه‌زراندنا پارتیا وه‌لاتپارێزێن کوردستانێ (پوک) نکاره وه‌ک پێویستی و گرنگیا هه‌ڤکاری و تفاقێن نه‌ته‌وی، ده‌مۆکراتیک و نه‌ته‌وامی بێ دیتن. هه‌ڤکاریا نه‌ته‌وه‌یی، ده‌مۆکراتیک و تفاقێن کو ل سه‌ر ئه‌ساسێ پره‌نسیبێن کوردستانی بێن ئاڤاکرن، هه‌لبه‌ت یه‌ک ژ ئه‌رک و پێویستیێن مه یێن نه‌ته‌وی یێن هه‌ری بنگه‌هینن. لێ، دیاره، دامه‌زراندنا پارتیا وه‌لاتپارێزێن کوردستانێ (پوک) وه‌ک پارتیه‌ک خورت، گرسه‌یی، نه‌ته‌وی، ده‌مۆکرات، ئازادیخواز، کوردستانی؛ هه‌ر وها وێ ببه گارانتیا پلاتفۆرمه‌ک نه‌ته‌وه‌یی، ده‌مۆکراتیک، هه‌ڤکاری، و تفاقه‌که خورت و به‌رده‌وام.
پارتیا ئازادیا کوردستانێ (پاک) وێ د ۱۷ێ ئیلۆنا ۲۰۲۳ێ دا ۳.ئه‌مین کۆنگره‌یا خوه یا ئاسایی ل ئه‌نقه‌رێ ل دار بخه. د ڤێ کۆنگره‌یێ دا ئه‌م دێ وه‌ک پارتیا خوه یا نوو پارتیا وه‌لاتپارێزێن کوردستانێ (پوک) ب گوهه‌رتنا ناڤ، ئامبله‌م، به‌رنامه و یاسایا پاکێ خه‌باتێن خوه یێن ره‌وا بدۆمینن.
پشتی کۆنگره‌یا خوه یا یاسایی ئه‌م دێ ئامبله‌م، به‌رنامه، قانوون و داخویانیا پارتیا وه‌لاتپارێزێن کوردستانێ (پوک) ب گه‌لێ خوه را پارڤه بکن. ب تایبه‌تی ئه‌م سپاسیێن خوه پێشکێشی هه‌موو پارتی و رێخستنێن سیاسی، رێخستنێن سڤیل و که‌سایه‌تان دکن کو د ۹ێ ئیلۆنا ۲۰۲۳ێ دا به‌شداری کۆنگره‌یا مه یا دامه‌زراندنێ بوون و په‌یامێن پیرۆزباهیێ شاندن.
پارتیا وه‌لاتپارێزێن کوردستانێ (پوک) ل گه‌لێ مه پیرۆز به!
٢٠٢٣/٩/١٢
موستافا ئوزچه‌لک
سه‌رۆکێ پارتیا وه‌لاتپارێزێن کوردستانێ (پوک)
