ڤیدیۆكلیپا  پاییزا خەونان ل پاییزێ دەركەت

پشتی بزاڤەکا دۆمدرێژ و ماندیبوونەکا مەزن ڤیدیۆكلیپا سترانا پاهیزا خەونان یان (پاییزا خەونان) یا هونەرمەندا هێژا و ب ڕوومەت، نارین فەقە، هاتە ئەنجامدان.

ئەڤ سترانە ژ پەیڤێن، ئەدیب چەلكی و ئاوازا شێخێ رەحمەتی، زاهد بریفکانی یە.

 موزیکا سترانێ، عەلی شاکری بەرهەڤکری یە و ڤیدیۆکلیپا وێ ژی ژ کارێن دەرهینەرێ ناڤدار، هەژار دهۆکی یە.

 گەلەك سوپاس ژ بۆ رێزدار هەرمان میرزا بەگ وەکیلێ میرێ ئێزدیان ژ بۆ کاروبارێن گەنجان، ل سەر هاریکاریا وی کری بۆ ڤیدیۆکلیپا ڤێ سترانا گەلەك هێژا.

 بدیتنا من ئەڤ سترانە ژ شاهکارێن سترانێن هونەرمەند نارینێ یەو دێ بیتە ئێك ژ شاهکارێن سترانا کوردی د وارێ ئەڤینیێ دا، چونکی هەموو رەگەزێن سترانێ (پەیڤ، ئاواز، موزیك، ستراندن، دەنگ و ئاوایێ ستراندنێ، ڤیدیۆکلیپ و دیمەنێن وێ…هتد) تمامکەرێن ئێکن و باش دگەل هەڤدو دگونجایی نە.

 نارینێ ژی وەکی هەرجار بدەنگێ خۆ یێ فەیروزی ئافرادنەکا جوان د ئاوایێ ستراندنێ دا (اداء) کری یە،  ئاوازا سترانێ گەلەکا دەولەمەندەو هەر پەیڤەك پێدڤی ئەدائێ یە.

 چیڕۆکا ڤێ سترانێ ڤەدگەڕیتە ڤە ژ بۆ بەری چەند سالان، کو هێشتا خودانێ ئاوازێ رەحمەتی شێخ زاهد بریفکانی دژیانێ دا بوو. وی ئەڤ ئاوازە دابوو هونەرمەند نارینێ و وەغەرا داویێ کر بێی کو سترانێ ببینیت. پشتی وەغەرکرنا شیخ زاهدی، نارینێ پەیوەندی ب من کر و گۆت: “شێخ زاهدێ رەحمەتی ئاوازەکا دایە من و پشتی چەندەکی وەغەرکر، من ژی هزرا خۆ کر و گەهشتم وێ راستیێ کو کەس وەکی تە نکاریت مافێ ڤێ ئاوازێ بدەتێ و پەیڤا بۆ بنڤیسیت، لەوا هیڤیدارم پەیڤا بۆ ڤێ ئاوازێ بنڤیسە داکو ب هەڤرا گیانێ پاکێ شێخێ رەحمەتی پێ شادبکەین.”

 دئەنجام دا من ئەڤ هەلبەستا (پاهیزا  خەونان) نڤیسی و گەلەك ل سەر ئاوازێ هات و نارینێ ژی گەلەك ژ پەیڤان حەزکر و ب ئاوایەکێ زێدە جوان و ب دەنگێ زەلالێ خۆ ستراند و د ئەنجام دا ئەڤ شاهکارە هاتە ئافراندن. هیڤیدارم هەموو بینەر و گوهدار هندەك ژخەم و خیالێن خۆ تێدا ببینن و جانێ شێخێ رەحمەتی، زاگد بریفكانی، پێ شاد ببیت. ڤێ سترانا شاهکار ل هونەرمەندا هێژا نارین فەقە و مالباتا وێ و هەموو کوردستانیان پیرۆزدکەم و دەسخۆشیێ ل هەموو پشکداران دکەم.

راڤەکرنا هندەك پەیڤان :

چلچرا : ل سەر دەمێن کەڤن، دمالێن میران و خانەدان و دەولەمەندان ڤە (یان ل ژێر خیڤەت و چادرێن مەزنێن وان ڤە) دهاتە بکارئینان. چل چرانە پێکڤە ب چەنگالەکی ڤە،دهاتنە هەلاویستن، داکو هەموو دیوانخانە باش رۆن ببیت.

شەڤا چللە: درێژترین شەڤا زڤستانێ یە (شەڤێن چللە ب گشتی درێژترین شەڤێن سالێ نە). کورد دبێژنە وێ شەڤا درێژ :شەڤا چللە، ل جەم فارسان و گەلەك ئیرانیان ژی دبیتە شەڤا یەلدا.

چلخانە: ئێدیەمەکێ سوفی یە ب زمانێ کوردی، جهێ پەرستنا خودێ یە بۆ دەمێ چل رۆژان، کو مرۆڤێ ئۆلدار د وان رۆژان دا چ ناخۆت، ژبلی چەند کەتێن مێویژا، یان قەسپا و ڤەخارنا ئاڤێ. وەختێ مریدی ئەڤ قۆناغە بووراند، دێ گەهیتە قۆناغەکا بلندتر د سوفیاتیێ دا.

 ژ فێسبۆكا

ئەدیب چەلكی

 

نێرین / شیرۆڤە