نوری چه‌لیک
پارتیا دەمۆكراتا كوردستانێ–تركیێ (پەدەکە-تركیێ) پشتی شه‌هیدکرنا سەعید ئه‌لچی و هه‌تا ئیرۆ ل سه‌ر ناڤێ ڕێبازا بارزانی هه‌رتم خوه‌ستنه د بن سھا پارتیا دەمۆكراتا كوردستانێ (پەدەكە) باشوور و بارزانییان دا سیاسه‌تێ بکن. ڤێ یه‌کێ هه‌م زیان دایه پەدەکە باشوور و بارزانییان؛ و زیانا مه‌زن ژی دایه پەدەکە-تركیێ و ئه‌ڤیندارێن ڕێبازا بارزانی.
ب ڤێ هه‌لوه‌ستا شاش و خه‌له‌ت ڕێڤه‌برێن پەدەکە-تركیێ هه‌م بارێ پەدەکە باشوور و بارزانییان گرانتر کریه و هه‌م ژی پەدەکە-تركیێ و ڕێبازا بارزانی ل باکورێ کوردستانێ لاواز کرنه، تێک برنه و ژ هه‌ڤ تار و مار کرنه. هه‌گه‌ر پەدەکە-تركیێ گرانییا خوه دابوویا یەكرێزی و کار و خه‌باتا باکورێ کوردستانێ، دێ ئیرۆ ڕه‌وشا باکورێ کوردستانێ جودا بوویا، به‌لکی ئه‌ڤقاس مالکمباخی نه‌دهات سه‌رێ کوردێن باکور.
هه‌گه‌ر پەدەکە-تركیێ سیاسه‌ته‌ک ب وه‌سایه‌ت و ئیجازه‌یا پەدەکە باشوور نه‌مه‌شاندبا و گرانییا خوه بدابا سەر خه‌باتا باکور، به‌لکوو ئیرۆ هێز و ئەلته‌رناتیفه‌ک خورت و کوردستانی ل باکور هه‌بوویا و به‌لکوو پەکەکە و ده‌وله‌تا ترک ژی ئیرۆ نکاریبوونا ڤێ تۆفان و بۆبه‌لاتێ بینن سه‌رێ باشوورێ کوردستانێ. یانی، سیاسه‌تا ب وه‌سایه‌ت و ئیجازه‌ت ژ فایده‌یێ زێده‌تر خسار و زیان دایه پەدەکێ و ڕێبازا بارزانی.
ژ به‌ر ناکۆکییێن پووچ و سه‌ده‌مێن ڤالا ئیرۆ خه‌باتا ل باکورێ کوردستانێ خەتمیه و قاد و مه‌یدانا خه‌باتا کورده‌واری بێ سه‌رمیان مایه. د ڤر دا سووج و گونه‌هێن پارتییێن سیاسی و ب تایبه‌ت ژی یێن ڕێڤه‌برێن پەدەکە باکور گەلەكە. ژ بۆ قادا خه‌باتێ بێ خوه‌دی و بێ سه‌رمیان نه‌مینه، ژ بۆ پشتگری و ئالیکارییه‌ک ڕاسته‌قین ژ ڕێبازا بارزانی و بارزانییان ڕا بێ کرن، یان دڤێ هه‌موو به‌شێن پەدەکە باکور ببن یه‌ک و ب سیاسه‌ته‌ک سه‌ربخوه و کوردستانی ڕووپه‌له‌کی نوو ڤه‌کن، یان ژی دڤێ که‌سێن کو ژ سیاسه‌تا پەدەکە باکور نه ڕازی نه لێ دلدارێن ڕێبازا بارزانی نه خوه کۆمی سه‌ر هه‌ڤ بکن و گاڤه‌ک نوو باڤێژن.
د سه‌ری دا کوردچیێن کو د ده‌مێن بۆری دا خزمه‌ت و فه‌داکارییێن مه‌زن ژ بۆ پەدەکێ و ڕێبازا بارزانی کرنه و دکن، خوه کۆمی سه‌ر هه‌ڤ بکن. د بن چ ناڤی دا دبه به‌لا ببه، بێیی کو که‌س هه‌ڤدو تۆهمه‌تبار بکه؛ دڤێ ڕووپه‌له‌کی نوو ڤه‌کن و ب مۆرال و فه‌داکارییه‌ک کوردستانی ل باکورێ کوردستانێ ئالا سیاسه‌تا ده‌وله‌تخوازان بلند بکن.
ئاخینا باکور ب ڕوحێ کوردستانا مەزن و ب خورتکرنا سیاسه‌ته‌ک کوردستانی و ل دژی سیاسه‌تا خوه‌فرۆشا ل سه‌رانسه‌رێ کوردستانێ، و ب تایبه‌ت ل باشوورێ کوردستانێ، ببن سیبه‌ر و مه‌رتالێ ده‌ستکه‌فتنێن ده‌وله‌تا فه‌ده‌رال ل باشوورێ كوردستانێ.
