سه‌رۆکێ پارتیا كاركەرێن كوردستانێ (پەکەکێ) ئۆجەلان 8 سالن (2011.07.27) کو ب پارێزه‌رێن خوه را نکاره هه‌ڤدیتنان بکه. ئۆجەلان، د 2 ێ گولانا 2019 ێ دا، پشتی 8 سالان، جارا یه‌که‌م بوو کو ب پارێزه‌رێن خوه ڕا دانووستاندن کر. لێ ئه‌ڤ هه‌ڤدیتن پشتی 4 ڕۆژان ژ ئالیێ پارێزه‌رێن ئۆجەلان ڤه هات دیار کرن. نامه‌یا ئۆجەلان د جڤینه‌کا چاپه‌مه‌نیێ دا هات خوه‌ندن و پێشکێش کرن.
دیاره کو دیارکرنا نامه‌یێ 4 ڕۆژان پشتی دانووستاندنێ بێ سه‌ده‌م نینه. تێ شرۆڤه‌کرن کو د وێ ناڤبه‌رێ دا ئه‌و نامه‌یە ژ به‌رپرسیارێن پەکەکێ یێن ل قه‌ندیلێ و ل ئه‌وروپایێ ژی را چوویە.
دیاره کو ب ئیزنا ده‌وله‌تێ ژی بریار هات گرتن کو نامه‌یا ئۆجەلان پێشکێشی ڕایا گشتی ببه.
ده‌ما کو نامه‌یا ئۆجەلان بێ خوه‌ندن و شرۆڤه‌کرن ۳ مژار ده‌ردکه‌ڤن پێش.
مژارا یه‌که‌مین، ل حه‌پسخانه‌یان گره‌ڤێن برچیبوونێ نه. دبێژه کو دڤێ گرتی ژیانا خوه نه‌کن د خه‌ته‌ریێ دا، ده‌ڤ ژ گرەڤێن برچیبوونێ به‌ردن. مرۆڤ ب ئۆجەلان ڕا ژ بۆنا هه‌ڤدیتنا پارێزه‌ران ئه‌ڤ پرسا حه‌پسخانه‌یێ وه‌ک ڕاسیۆنال و ڕه‌ئالیست دکاره قه‌بوول بکه. له‌ورا ل هۆلێ ڕاستیه‌کا ته‌حل و خه‌ته‌ر هه‌یه. ژ بۆنا ئۆجالان چالاکی تێ کرن. ئه‌و دکاره داویێ ب ڤان چالاکیان بینه.
مژارا دویه‌مین،”پێڤاژۆیا چاره‌سه‌ریێ” یه. ئۆجەلان دبێژه کو هه‌لوه‌ستا من یا د سالا 2013 ێ دا دۆم دکه. دڤێ کو پرسگرێک نە ب شه‌ر ب ئاشتی چاره‌سه‌ر ببن. د نامه‌یێ دا گه‌له‌ک ئاشکه‌ره ژی نه‌به ژ پەکەکێ ڕا تێ گۆتن کو شه‌رێ چه‌کداری نه‌که و دەست ژ شه‌رێ چه‌کداری به‌رده. لێ گه‌له‌ک ئاشکه‌ره یه کو ده‌ست ژ چه‌ک به‌ردان نه د ده‌ستێ پککێ دایه. نها هێزێن كو پەكەكێ د ڤێ پرسێ و گه‌له‌ک پرسێن دن دا برێڤه دبن خوه‌دیێ بریارێ نه. حکومدارن. ژ ئالیێ دن ڤه ژی جه‌رباندنا به‌رێ یا “پێڤاژۆیا چاره‌سه‌ری” ده‌رخست هۆلێ کو جاره‌که دن حکومه‌ت ڤێ نه‌خشه‌ره‌یێ ب کار نائینە.
سه‌ده‌ما دن یا گرینگ ژی، ئاک پارتی نها د ناڤ تفاقا جومهور دایه. مەهەپە ژ ڤێ یه‌کێ ڕه هیچ ئاماده نینه.
به‌شه‌ک ژ نڤیسکار و شرۆڤه‌که‌ران ژی ئه‌ڤ نامه‌یا ئوجەلان ژ بۆنا ڕێ ل به‌ر ڤه‌کرنا “پێڤاژۆیا چاره‌سه‌ری” شرۆڤه کرن. گۆر باوه‌ریا من ئه‌ڤ ژی شاشه. ژ ڕاستیا ڕۆژانه یا سیاسه‌تا ترکیه‌یێ ژی دوره.
له‌ورا ده‌وله‌تا ترک د ڤان شه‌رتان دا خوه‌دیا ده‌رفه‌تێ نینه کو ب ڤێ مژارێ ڕه ئه‌له‌قه‌ده‌ر ببه. ژ ئالیێ دن ژی دیاره کو ئێدی “پێڤاژۆیا چاره‌سه‌ری” وه‌ک به‌رێ نابه. هه‌گه‌ر بەحسا چارەسەریێ بێ كرن ژی، دڤێ به‌س د چارچۆڤەیا مافێن نه‌ته‌وه‌یا کورد دا گاڤێن بێن ئاڤێتن و دكارە ھینگێ بەحسا چارەسەریێ بێ كرن.
مژارا سێیه‌مین ژی، مژارا سوریێ یه. د ڤێ مژارێ دا ژی ئۆجەلان سیاسه‌تا ده‌وله‌تا ترک دپارێزە. یه‌کێتیا سوریێ دپارێزە. ژ پەکەکێ ڕه دبێژه کو دڤێ هوون سیاسه‌ت و حه‌ساسیه‌تا ده‌وله‌تا ترک تێبگەھن. ل دژی سیاسه‌تا ده‌وله‌تا ترک شه‌ر نه‌کن. ب ئاوایه‌کی دزی به ژی دڤێ داگیركرنا ئه‌فرینێ بێ په‌ژراندن. لێ هه‌ر چوقاس ئۆجەلان ڤان دیتنێن خوە ئاشكرا دبێژە ژی، لێ ل سوریێ ل سه‌ر پەیەدێ ژی نکاره باندۆرێ چێ بکه. له‌ورا ل سوریێ ژ بۆنا چاره‌سه‌ری و نه‌چاره‌سه‌ریێ هێزێن مه‌زن هه‌نه. ئه‌و نکارن نه‌خشه‌رێیه‌که زه‌لال و ڤه‌کری پێشکێشی ڕایا گشتی یا دنیایێ و هه‌رێمێ بکن.
گه‌لۆ ئۆجەلان دێ چه‌وا د چاره‌سه‌ریێ دا ژ ده‌وله‌تا ترک ڕا ببه ئالیکار.
ئه‌ڤ مژارێن من بەحسكرین، مژارێن دیارن. هه‌رکه‌س ژی گۆر مژارێن هاتنه دیار کرن، بوویه‌ر و نامه‌یێ شرۆڤه دکن. ئه‌ز ب خوه ڤێ نه‌رین و هه‌لوه‌ستێ شاش دبینم، یان زەعیف دبینم.
لۆما ژی گه‌له‌ک که‌سان و هه‌تا به‌شه‌ک ژ ئاپۆئیستان ژی ئه‌ڤ نامه‌یە ڕه‌خنه کرن کو ئۆجەلان سیاسه‌تا ده‌وله‌تا ترک دپارێزە.
ئه‌ڤ هه‌لوه‌ست ب خوه ژی گه‌له‌ک سۆسره‌ته. له‌ورا تێ زانین و ئۆجەلان ب خوه ژی دیار دکه، کو نە ژ بۆنا خزمه‌تا نه‌ته‌وه‌یا کورد ، ژ بۆنا کو پێشیا ته‌ڤگه‌را ملی یا کورد بگره، ژ بۆنا کو ڕێخستن و پارتیێن کوردستانێ تەسفیه بکه، هێزێن بنگه‌هی یێن ته‌ڤگه‌را ملی یا کوردستانێ ژ هۆلێ ڕاکه، ژ سیاسه‌تا ده‌وله‌تێ یا نەھێلانا کوردان ڕا خزمه‌ت بکه، خه‌بات دکه و له‌وما ژی پەکەکە ئاڤا کریه.
ئۆجەلان، ئه‌سل مرۆڤێ ده‌وله‌تا ترکه. لێ ده‌وله‌ت ژ ئالیێ کیژان پارتی و هێزێ ڤه بێ برێڤه‌برن، دبه مرۆڤێن وان. نووها ژی ئه‌و خوه نێزیکی حکومه‌تا ئاک پارتیێ دبینه و گۆر وێ ته‌ڤ دگه‌ره. د پێشه‌رۆژێ دا حکومه‌ت بێ گوهه‌رت، ئۆجەلان دبه مرۆڤێ حکومه‌تا نوو..
گۆر باوه‌ریا من ئه‌سل مژارا گرینگ، مژار و په‌یامێن ب دزی و ب ده‌ڤکی هاتنه سه‌ر زمێن و هاتنه شاندن.
په‌یاما ب دزی، د شه‌رتێن دانووستاندنا ب ئۆجالان ڕا یه. ئه‌ڤ دانووستاندن پشتی بریارا (یەسکێ) کو ل سته‌نبۆلێ هلبژارتن نوو ببه، هات ڕۆژه‌ڤێ.
لۆما ژی تێ بیرا هه‌ر که‌سی کو ئه‌ڤ دانووستاندن ژ بۆنا هلبژارتنێ هات کرن. ئه‌ز ژی د وێ باووه‌ریێ ده مه کو ئه‌ڤ دانووستاندن ژ بۆنا هلبژارتنێ هات کرن.
په‌یاما ئۆجەلان ب دزی ژی، قاسی ئه‌ز ئۆجەلان ناس دکم و پێوه‌ندیێ وی یێن ده‌وله‌تێ و حکومه‌تێ شرۆڤه دکم، ئه‌ز ته‌سپیت دکم کو ئۆجەلان ژ پەکەکە/هەدەپێ داخواز کر کو ئه‌و ده‌نگ بدن بەربژێرێ ئاک پارتیێ و تفاققا جومهور ل سته‌نبۆلێ.
پشتی نامه‌یا ئۆجەلان داخویانیێن ژ وێ ئه‌نیێ هاتن بەلاڤ كرن، ڤێ نه‌رینا من ڕاست ده‌ردخه. د ئه‌نیا پەکەکێ دا داخویانیێن ناکۆک هه‌نه. قه‌ندیلێ ھەلوەستا خوە یا بەرێ دوباره کر وگۆت کو “ئه‌م دێ ژ بەربژێرێ جەهەپێ ڕا ببن ئالیکار و ده‌نگێن خوه بدن ئه‌کره‌م ئیمامۆگلو.” به‌شه‌ک ژ هەدەپێ ژی ھەمان ھەلوەستا قەندیلێ ھەیە. لێ به‌شه‌کێ هەدەپێ ژی، ب تایبه‌تی ژی به‌رپرسیاره‌کێ گروپا مه‌جلیسێ یێ هەدەپێ دیار کر کو ھێشتا بریارا وان د ده‌ربارێ سته‌نبۆلێ ده نه دیاره. پێڤاژۆ دۆم دکه. لێ تفاقا مله‌ت ژی د ده‌ربارێ مژارا ب ئۆجەلان دا ڕه‌خنه دکه. ژ نه‌رینێن وی ده‌ردکه‌ڤه هۆلێ کو ئه‌و د ناڤ بازاریه‌کێ دا نه. نوونەرێن هەدەپێ ژی نه‌رینێن جوودا بەحس دكن. هه‌تا ده‌میرتاش دیار کر کو تفاقا مله‌ت بەحسا چارەسەریا پرسا كورد ناكە. یانی ئه‌و ژی دیار دکه کو ئه‌و ژی پشتی نامه‌یا ئۆجەلان که‌تیه سەر ڕێیه‌ک نوو.
ئه‌ڤ ناکۆکیێن د ناڤ پەکەک/هەدەپێ دا ده‌رکه‌تنه هۆلێ، دیار دکه کو ژ بۆنا هلبژارتنێ پشتی نامه‌یا ئۆجەلان ته‌ڤگه‌راندنه‌که جوودا هه‌یه.
قه‌ده‌غا پارێزه‌رێن ئۆجەلان ژی ژ هۆلێ ڕابوو کو ئه‌و دکارن ب ئۆجەلان ڕه دانووستاندن بکن. ئه‌و ژی د ڤان شه‌رتان دا خوه‌دیێ واته‌یه‌کێ یه.
د پێشه‌رۆژێ دا ئه‌ڤ مژار دێ زه‌لال ببن.
هیچ شک تێدا نینە کو قه‌ندیل و ئۆجەلان خوه‌دیێ ئارمانجێن جودانه. ژ ئالیێ هێزێن جودا ڤە تێن ئیداره کرن.
دڤێ ئه‌م بچه‌ک ب سه‌بر ل به‌ندا بوویه‌ر و ته‌ڤگه‌ران بن کو ئه‌ڤ به‌رژه‌وه‌ندیێ جودا یێن د ناڤ پەکەکێ دا دێ چه‌وا ڕه‌ئالیزه ببن؟
ئامه‌د 2019.05.17
ئیبراهیم گوچلو
