سه‌رۆکێ ئه‌نجوومه‌نا پارێزگه‌ها مووسلێ سه‌یدۆ چه‌تۆ دبێژه، پارتیا كاركەرێن كوردستانێ (پکک) کاره‌کی مه‌ترسیدار ل شنگالێ دکه و پێویسته ڕێ ل پێشیا وان بێ گرتن.
به‌رپرسێ ئاسایشا ڕۆژاڤایێ دجلە، عه‌مید ئاشتی کۆچه‌ر ژی دبێژه، هه‌بوونا (پکک)ێ ل شنگالێ ئارمانج ژێ ته‌نێ ئه‌وه کو زیانێ بگهینن به‌رژه‌وه‌ندیێن گه‌لێ کوردستانێ و بتایبەتی زیانێ بگەھینن ئێزدیان.
به‌رپرسێ ئاسایشا ڕۆژاڤایێ دجلێ عه‌مید ئاشتی کۆچه‌ر دبێژە: “پشتی ڕزگارکرنا شنگالێ ژ ده‌ستێ داعشێ ژ ئالیێ هێزێن پێشمه‌رگه ڤه، گه‌له‌ک خه‌لکێ شنگالێ ڤه‌گه‌ریان سه‌ر مال و حالێ خوه، لێ پشتی خیانه‌تا 16ێ ئوكتوبەرا 2017ێ و داگیرکرنا شنگالێ، دیسا خه‌لکێ شنگالێ کۆچبه‌ر بوون، ژ به‌ر کو پکک و حه‌شدا شه‌عبی رەوشا وێ دەڤەرێ تێكدا و خەراپ كر.
هه‌موو ئه‌و زیان و زه‌ره‌را کو خه‌لکێ شنگالێ دیتنه، ژ به‌ر هه‌بوونا پکک یه ل شنگالێ، کو فه‌رمانێن خوه ژ قه‌ندیلێ دستینن و ئارمانجا وان ته‌نێ ئه‌وه کو زیانێ بگهینن به‌رژه‌وه‌ندیێن کوردستانێ و ئێزدیان.”
نێزیكی 85% ژ خه‌لکێ شنگالێ و ئێزدی ل کامپێن کوردستانێ دمینن و هه‌تا نها ژ ترسا ڕه‌ڤاندن و گرتنا خۆرتان ژ ئالیێ پککێ ڤه، ڤه‌ناگه‌رن مالێن خوه. ئه‌و ئێزدیێن کو ل شنگالێ نه ژی دخوازن جارەكە دن کۆچبه‌ر ببن و ل کامپان بجھ ببن، ژ به‌ر نه‌بوونا ئه‌وله‌هیێ و ژ به‌ر هه‌بوونا پکک و حه‌شدا شه‌عبی.
سه‌رۆکێ ئه‌نجوومه‌نا پارێزگه‌ها مووسلێ سه‌یدۆ چه‌تۆ ژی لسەر ڤێ پرسێ دبێژە: “خه‌لکێ شنگالێ ب چ ئاوایه‌کی قه‌بوول ناکە پکک ب کێفا خوه ل شنگالێ به و ڕێ نەده ئیداره‌یا شەرعی ڤەگەرا شنگالێ و دەست ب خزمەتێ بكە. نها ژی ئه‌م ل هێڤیا حکومه‌تا عیراقێ و ئیداره‌یا پارێزگه‌ها مووسلێ نه کو بریارا خوه بدن، ژ به‌ر کو پکک ناهێله ئیداره‌یا ووەرعیا شنگالێ ڤه‌گه‌ره.”
(پکک) دخوازه خه‌لکێ شنگالێ دژایه‌تیا هه‌ڤ بکن و ئه‌و یه‌ک مه‌ترسیداره و پێویسته بھێن ڕاوه‌ستاندن. ژبلی وێ ژی هه‌تا ئیداره‌یا ڕه‌وا یا شنگالێ ڤه‌نه‌گه‌ره شنگالێ چ پرۆژه‌یه‌که خزمه‌تا خه‌لکێ ل ناڤچه‌یێ نایێ کرن، ژ به‌ر کو ئه‌و وه‌ک پارێزگه‌ها مووسلێ ب چ ئاوایه‌کی کار لگه‌ل وان هێزێن نه‌ره‌وا یێن ل شنگالێ ناکە و ئه‌مێ به‌رده‌وام هه‌ول بدن کو ئیدارا ڕه‌وا ڤه‌گه‌ر سه‌ر کارێ خوه.”
kdp.info
