نڤیسار

ئارمانج ژناڤبرنا دەستکەفتیێن کوردانە

ئه‌ڤه‌ ده‌مه‌ک درێژه‌ کو په‌یامێن نه‌ د خێرا کوردان دا دهێنە دان و مه‌سه‌لا ئێریشێن ترکیێ یێن بۆ سه‌ر باشوورێ کوردستانێ رۆژه‌ڤا کوردان سه‌رووبنی هه‌ڤ کر، خویا بوو کو وێ هنده‌ک کریارێن تاری و پرۆڤۆکاسیۆنێن نه‌ د به‌رژه‌وه‌ندییا کوردان دا بێن کرن.

ژ خوه‌ هه‌رتم وسا بوویه‌. هه‌ر ده‌ما کو کورد پیچه‌کێ دکه‌ڤنه‌ د ناڤ ره‌حه‌تییێ دا و ده‌ستکه‌فتیێن ناڤدەولەتی ب دەست دخن، هه‌و وه‌ دیت کو ژ هه‌ردو ئالییان ڤه‌ (باسکه‌ک ژ ده‌وله‌تێن داگیرکه‌ر و باسکه‌ک ژ پەکەکێ) و ڤان داوییان شریکێ حوکومه‌تێ یەنەک ژی ژ هه‌مان ده‌ریایێ سوود وه‌ردگره‌؛ ژ بۆ تێکدانا کوردستانا ئازاد ده‌ک و دۆلاب ب ده‌ستێ پەکەکێ و دیڤەلانکێن ئیران و سوریێ ب یەنەکێ ڤه‌ هاتن گەراندن، مژ و دوومان ب سه‌ر رۆژه‌ڤێ که‌ت و پرۆڤۆکاسیۆنان ده‌ست پێ کر.

کریار و ئالۆزییێن کو چو تێکەلیا وان ب پەدەکێ ڤه‌ نەبوو و نینە، بوون سه‌ده‌م کو کورد دیسا د قادا ناڤنه‌ته‌وی دا تێکه‌ڤن ده‌ڤێ خێرنه‌خوازان و پێڤاژۆیا کو ژ بۆ خێرا کوردان نه‌رم بووبوو، بێ ئالۆزکرن.

ئه‌ز باوه‌ر ناکم کو چو که‌سه‌ک گومان ژێ بکه‌ کو، ئه‌ڤ پرۆپاگاندایێن خه‌رابکار ژ ته‌ره‌ف پەکەکێ ڤه‌ ب قه‌ست و دژمناتیێ تێن کرن.

ژ سه‌رۆکێ کوردستانێ بگره‌، سه‌رۆکوه‌زیر و پرانیا ده‌موده‌زگه‌هان، هه‌تا ب ره‌وشه‌نبیر و نڤیسکارێن کورد، د ده‌ربارێ ئالیکاریا رۆژاڤایێ کوردستانێ دا چو تەخسیری نه‌هات کرن. لێ هه‌زار مخابن پەکەکە یا کۆ چو وه‌ختی خوه‌ ژ تێکلیێن ب داگیرکه‌رێن کوردستانێ را ئازاد نه‌کریه‌، نه‌هات رازیکرن.

کریارێن قرێژ یێن پەکەکێ و ئالیگرێن وێ ئاشکه‌را بوونه‌، گرێدانا پەکەکە، پەیەدێ ب رژێما سوری، ئیران و ترکیێ ده‌ردکه‌ڤن هۆلێ ژی، تێ فێهمکرن کو مه‌سه‌له‌ نه‌ مه‌سه‌له‌یا تێکلیێن باشوور ب ترکیێ را یه‌، مه‌سه‌له‌ ژناڤبرنا ده‌ستکه‌فتیێن باشوورێ کوردستانێ یه‌.
پەکەکە ب مه‌شا نه‌ته‌وە-ده‌وله‌تبوونا باشوور هار بوویه‌ و د مه‌دیا خوه‌ دا بێبەختیان و دەرەوان ل دژی پەدەکێ بەلاڤ دکه‌.

پرانیا کورد و کوردستانیێن ئاشتیخواز د ناڤا وێ ترسێ دا بوون کو پەکەکە ته‌حەمولا پرره‌نگی و پرده‌نگیێ نه‌که‌، پێڤاژۆیێ بخەتمینە.

پرانیا کوردان هێڤی دکن کو پەکەکە دەست ژ ڤان کریارێن قرێژ به‌رده‌. دیڤەلانکیا رژێمێن داگیرکه‌ر نه‌کە و روونی ل سه‌ر نانێ ده‌وله‌تێن داگیرکه‌ر نه‌که‌.

لێ چ چێبوو پشتی بنده‌ستخستنا ئەنجامێن رەفەرەدۆما سه‌رخوه‌بوونێ.

پشتی وێ رۆژێ پەکەکێ تێکبرنا کوردستانا ئازاد گرت سه‌ر خوه‌، کورد و ئاشتیخوازێن هه‌رێمێ خه‌یالشکه‌ستی کرن، دربەک مه‌زن ل کوردان و کوردستانیان خست و دیسا به‌رژه‌وه‌ندییێن گه‌لێ کورد و کوردستانێ کرن ب قوربانا به‌رژه‌وه‌ندییێن خوه‌ و ئه‌فه‌ندیێن خوه‌.

تشته‌کێ بالکێش ژی ئه‌ڤه‌ کو، د ڤان ده‌مێن داوی دا پەکەکە و یەنەک ب پلان و پرۆژه‌ دژمناتیا پەدەکێ دکن. پارتیا پەکەکێ یا باشوورێ کوردستانێ داخویانی دان کو دێ د هلبژارتنێ ئیراقێ دا پشتگریا یەنەکێ بکه‌ دا؛ یەنەک، پەیەدە دەعوەتی سلێمانی بکە و داخویانیێن هه‌ڤبه‌ش دان. گه‌لۆ ئه‌ڤ ته‌ڤ لهه‌ڤراستهاتن و ته‌سادوفن نزانم، لێ دخویێ کو بریار ژ یه‌ک ناڤه‌ندێ ده‌ردکه‌ڤه‌، ده‌رکه‌تیه‌.

ب کورت و کورمانجی؛ پەکەکە و ئالیگرێن وێ پر ئاشکه‌را رێ ل به‌ر پارتیێن کو نه‌ ئاپۆجی نه‌ گرت و هه‌فسارێ خوه‌ ژی ب ده‌ستێ رژێمێن داگیرکه‌ر ڤه‌ به‌ردا.

پەکەکە ب ڤان تێکەلی و کریارێن خوه‌ یێن قرێژ، بێیی کو پێویستییا عه‌مه‌لێن خوه‌ یێن هه‌ڤبه‌ش ب داگیرکه‌ران را ڤه‌شێرن ده‌ست د ده‌ست دا، تی ئێنتیێ دخن بن ده‌وله‌تبوونا کوردستانێ و رێدانا چاره‌سه‌رییا پرسگرێکا کورد ل ترکیێ.

ژ به‌ر کو ئیرۆ پرسگرێکا ترکیێ یا هه‌ری مه‌زن پرسگرێکا چاره‌سه‌ریا مافێ کوردستانێ یه‌.

لێ ئه‌ڤ پرسگرێکا مه‌زن یا کوردستانێ ژ بۆ پەکەکێ نه‌ پرسگرێکا بنگه‌هی یه‌. خه‌له‌تییا بنگه‌هین یا ناڤبه‌را کوردان ئه‌ڤه‌ کو ئه‌م پرسگرێکا بنگه‌هین و پرسگرێکا پەکەکێ تێکلهه‌ڤ دکن.

ژ به‌رکو ئه‌رکا کوردستانیان پاراستنا ده‌ستکه‌فتیێن کوردستانێ یه‌، لێ ئه‌رکا پەکەکییان تێکبرنا ته‌مامێ ده‌سکه‌فتیێن کە نه‌ د کۆنترۆلا وێ دا به‌.

ڤێجار گاڤا ئه‌م ژ ئالیێ کوردستانیان ڤه‌ ل بوویه‌رێ بنه‌رن، پرسگرێکا کوردستانیان پرسگرێکه‌ک نه‌ته‌وی یه‌ کو، دڤێ ب ده‌وله‌تبوونێ بێ چاره‌سه‌رکرن.

نووری چه‌لیک

Back to top button