نڤیسار

ئارمانج ژ رووخاندنا گۆرێن ئێزدیان چیە

چه‌ند ڕۆژ به‌رێ هاته‌ ڕاگەهاندن کو هندەك گۆرێن کوردێن ئێزیدی یێن ل هه‌رێما بشێریێ (باكورێ كوردستانێ) ژ ئالیێ هندەك که‌سێن نه‌دیار ڤه‌ هاتنه‌ ڕووخاندن. گه‌لۆ ئارمانجا ڕووخاندنا وان گۆران چ یه‌؟

ل ڤێرێ چه‌ند پرس تێن هشێ مرۆڤ:

گه‌لۆ ئه‌و گۆر ژ ئالیێ کیژان باوه‌ریێ ڤه‌ هاتنه‌ ڕووخاندن؟
گه‌لۆ سه‌ده‌مێ ڕووخاندنێ چ په‌یامه‌ کو دانه‌ کوردێن ئێزیدی؟
گه‌لۆ ڕووخاندنا وان گۆران، چ سوود دده‌ بسلمانان؟
گه‌لۆ کوردێن ئێزیدی هه‌تا نها چ خسار دانه‌ سازی و ده‌زگه‌هێن ئیسلامێ؟

بێگومان کوردێن ئێزیدی به‌شه‌کن ژ نه‌ته‌وه‌یێ کورد؟

ئۆلا ئێزداتیێ، پر که‌ڤناره‌ و هه‌تا ژ ۱٥ هه‌زار سالان زێده‌تر مێژویا وێ هه‌یه‌؟
هه‌تا نها بسلمانان، هندەك کوردێن بسلمان ژی تێ دا، گه‌له‌ک فه‌رمان ل کوردێن ئێزیدی کرنه‌. ئه‌و یەك ژی، ڤاژیێ ئۆلا ئیسلامێ یه‌. له‌ورا د قورئانا پیرۆز دا خوه‌دایێ مه‌زن ب ئایه‌ته‌کێ گۆتیه‌: (لَكُمْ دِينُكُمْ وَلِيَ دِينِ)! ئانگۆ دینێ وه‌ ژ وه‌ره‌ و یێ مه‌ ژ مه‌ ڕا.

کوردێن ئێزیدی، هه‌ڤوه‌لاتیێن ده‌وله‌تا کو لێ دژینن.
کوردێن ئێزیدی باج ددن وێ ده‌وله‌تێ.
کوردێن ئێزیدی، له‌شه‌کری ژ وێ ده‌وله‌تا کو لێ دژین ڕا دکن!
کوردێن ئێزیدی، هه‌تا نها نه‌هاتیه‌ بهیزتن کو خسار دانه‌ بسلمانان ئان سازیه‌کا ئیسلامێ!

ئه‌ز کورده‌کی بسلمان، سونه‌ و په‌یره‌وێ نه‌خشه‌به‌ندیێ مه‌. هه‌روه‌ها باڤ و کالێن من ژی، ته‌ڤ مه‌لا و خوه‌دیمه‌دره‌سه‌ بوونه‌.
ئیرۆ ژی، ۳ گوندێن کوردێن ئێزیدی ژ عه‌شیرا من هه‌نه‌.
یانی دنایا من چ به‌، یا وان کوردێن ئێزیدی ژی هه‌ر ئه‌وه‌!

ئیجار ل گۆر تۆره‌ و یاسایێن هه‌رێمێ، ئه‌و که‌سێن کو خسار دانه‌ گۆرێن کوردێن ئێزیدی، ئه‌گه‌ر ب ناڤێ بسلمانتیێ کربن، وان خسارا هه‌ری مه‌زن دایه‌ ئیسلامێ! له‌ورا یاسایا ئیسلامێ وه‌ها دگێژه‌: کوشتن ب کوشتنێ، برین ب برینێ، شکاندنا دران ب شکاندنا درانی یه‌ و گود. هینگێ مافێ وان ژی چێدبه‌ کو ئه‌و ژی گۆرێن بسلمانا برووخینن. لێ کوردێن ئێزیدی بێتۆره‌تیه‌کا وسا ناکن.

نا، ئه‌گه‌ر ئه‌و که‌سێن کو گۆرێن کوردێن ئێزیدی ب ناڤێ ”کورد”ان ڕووخاندبن، خسارا هه‌ری مه‌زن دانه‌ کوردایه‌تیێ! له‌ورا چ جڤاته‌کا بسلمان، خسار ناده‌ که‌سێن ژ نژادا خوه‌ یێن نه‌ بسلمان. میناکێن ڤێ پر هه‌نه‌.

ئه‌ز دیده‌ڤانم کو جاره‌کێ کورده‌کی ئێزیدی و فله‌هه‌کی سوریانی هاتن جه‌م باڤێ من گۆتن:
. سه‌یدا، ئه‌م هاتنه‌ با ته‌ شه‌ریعه‌تێ.
باڤێ من دو-سێ ڕیسپیێن گوند ژی ئانین و شه‌ریعه‌تا وان کر. هه‌ردو ئالیان ژی بریارا شه‌ریعه‌تێ په‌ژراند.

پێشیلێگرتنا کریارێن وسا یێن کرێت، پێشی دڤێ ئۆلدارێن کورد، ڕیسپی، مه‌لا و شێخێن کورد ل دژ ده‌رکه‌ڤن. پشت را ده‌ستهه‌لاتیا ده‌وله‌تێ ل گۆر یاسایێن خوه‌ سه‌زا بده‌ لێکه‌ران.

کریارێن وسا کرێت، نایێن ژبیرکرن و ب سه‌دێ سالان دێ بێتن گۆتن.

ب هێڤیا کو ڕوودانێن وسا دوباره‌ نه‌بن…

زه‌ینه‌لابدن زنار
2020.04.01

Back to top button