گوهه‌رتنێن ل سووریێ چێبوویین بالا جهانێ و ناڤچەیێ کشاندیە سەر سووریێ و ڕۆژاڤایێ کوردستانێ. هه‌تا نها د ڕۆژه‌ڤا سیاسی یا ته‌ڤگه‌را کوردی دا ژی پرسا سووریێ و ب ڤێ یه‌که ڤه گرێدایی پرسا ڕۆژاڤایێ کوردستانێ د سه‌رێ هه‌موو خالان دا یه. ژ به‌ر کو ب ئاوایه‌کی چاره‌نووسه‌ک نوو ژ بۆ کوردێن ڕۆژاڤایێ کوردستانێ تێ ده‌ستنیشانکرن. ژ ئالیه‌ک دن ڤه ڕه‌وشا پەکەکێ د ڤێ پێڤاژۆیێ ڤه گرێدایی تێ گوهه‌رتن. ئه‌ڤ یه‌ک ژی دێ باندۆرا خوه ل هه‌می به‌شێن کوردستانێ بکه.
هه‌ر کورده‌ک به‌حسا پێوستیا یه‌کتیه‌کی د ناڤا هێزێن سیاسی ل ڕۆژاڤایێ کوردستانێ دا دکه. لێ گه‌لۆ ده‌ما به‌حسا یه‌کتیه‌کی تێ کرن ڕه‌وشا هه‌یی و ده‌ما بووری کار و خه‌باتێن ژ بۆ یه‌کتیه‌کی هاتین کرن به‌رب چاڤ دگرن یان نا؟ گه‌لۆ چو جارا به‌حسا بنگەهەک و زەمینەیەک کو یه‌کتیه‌ک ل سه‌ربێ ئاڤاکرن دکن یان نا؟ ژ ئالیه‌ک دن ڤه به‌حسا ئاسته‌نگا بنگه‌هین یا د ڕێیا یه‌کتیا د ناڤا کوردان دا دکن یان نا؟ د سه‌ری دا کێماسیەک مەزنە ده‌ما ئالیێن سیاسی به‌حسا ڤان هه‌رسێ خالێن سه‌ره‌که نه‌کن و هه‌ما بێژن دڤێ یه‌کتیه‌ک د ناڤا کوردان دا ل ڕۆژاڤایێ کوردستانێ دا چێببە، ئه‌و که‌س د ڤێ پرسه دا نه جدینه و تەنێ داخوازه‌کی پۆپلست بینن ڕۆژه‌ڤێ. که‌سایه‌ته‌ک ، سیاسه‌تمه‌داره‌ک ، ئالیه‌ک سیاسی و هه‌ر ئینسانێ به‌حسا ڕۆژاڤایێ کوردستانێ بکه و ڕاستیا هه‌یی نه‌بینه تشتا کو دبێژه تەنێ ژ بۆ پرۆپاگانده‌یه‌ک ئه‌رزانه و ڤاله‌یه.
به‌ری هه‌ر تشته‌کی کا چه‌وا به‌حسا به‌شێن دن یێن کوردستانێ تێ کرن و پێدڤیە ل ڕۆژاڤا ژی ناڤێ ڤێ هه‌رێمێ لێ بێ کرن. سیاسه‌تا چه‌وت و نه کوردستانی یا پەکەکێ، د چارچۆڤه‌یا پلانه‌کی دا، ناڤێ کوردستانێ ل ڕۆژاڤا ب کارنه‌ئانی و ناڤێ کوردستانا ڕۆژاڤا ل سەر وێ پارچەیا کوردستانێ راکرن. هه‌ر ئالیه‌ک به‌حسا یه‌کتیا کوردان ل ڕۆژاڤایێ کوردستانێ بکه دڤێ به‌ری هه‌ر تشته‌کی ڤێ سه‌راست بکه و ناڤێ کوردستانێ ب کار بینه و ب ڤی ئاوایی ڕه‌دا سیاسه‌تا پەکەکێ بکه.
ل ڕۆژاڤایێ کوردستانێ ۳ جارا په‌یمان (هه‌ولێر ۱، هه‌ولێر ۲ و دهۆک) د بن چاڤدێریا سه‌رۆک بارزانی دا د ناڤبه‌را ئه‌نەکەسێ و پەیەدێ دا هاتن ئیمزاکرن ، لێ چو جارا ل سه‌ر عەردی ئەڤ رێکەفتن نەکەتن وارێ پراکتیکێ دا. گه‌له‌ک گرینگه کو، ئه‌ڤ یه‌ک بێ بەحس کرن.
پەکەکە ل ڕۆژاڤایێ کوردستانێ شه‌رێ ئازادیا کوردستانێ نه‌کریه. ده‌ما مرۆڤ ڤێ ئیدایا هانه بکه، ئه‌لبه‌ت شه‌رێ ئازادکرنا کۆبانێ و هنده‌ک ده‌ڤه‌رێن کوردستانێ شه‌رێ ل دژێ داعیشێ چو جارا نایێ ژ بیرکرن. ئه‌و یه‌ک ژی ب ئاریکاری و پشتگریه‌ک ب هێز یا پێشمه‌رگه‌یێن کوردستانێ هاته کرن. ژ خوه ده‌ستپێکێ دا ئه‌گه‌ر ئه‌و ڕحێ ئازادکرنا کۆبانێ د ناڤ کوردان دا بهاتا پاراستن به‌لکی ئیرۆ مه به‌حسا ڤان تشتان ژی نه‌کرا.
رژێما ئه‌سەد، ئیران و ئیراقێ ب بریاره‌ک هه‌ڤبه‌ش ڕۆژاڤایێ کوردستانێ ڕاده‌ستی چه‌کدارێن پەکەکێ کرن. ژ ئالیه‌ک دن ڤه هێزه‌ک ب ناڤێ هەسەدە ب پشتگریا ئامه‌رکایێ هاته ئاڤاکرن و مەزلوم عه‌بدی بوو فه‌رماندارێ ڤێ هێزێ. ئه‌ڤ هێز ژ کوردا، ژ عه‌ره‌با و سوریانیان پێکهات. ئه‌رکێ ڤێ هێزێ ب تەنێ ل دژێ داعیش یە. یانی وه‌ک عه‌سکه‌رێن ب په‌ره یێن ئامه‌رکایێنه. چه‌کێن وان، معاشێن وان، په‌روه‌رده‌کرنا وان و هه‌موو پێویستیێن وان ژ ئالیێ ئامه‌رکایێ ڤه تێن دابین کرن.
ئیرۆ ئاسته‌نگا هه‌ری مه‌زن د ڕێیا یه‌کتیه‌ک د ناڤ مالا کوردان دا سیاسه‌تا پەکەکێ یه. ئالیێن دۆزا یه‌کتیه‌کی دکن دڤێ ئه‌ولێ به‌حسا ڤێ بکن و ژ بۆ ڕاکرنا ڤێ ئاسته‌نگا سه‌ره‌که خوه‌دی هه‌لوه‌ست بن.
ئه‌نەکەسە د ڤێ ده‌ربارێ دا دڤێ خوه‌دی بریار به و ب زانەبوون ته‌ڤبگه‌ره و سیاسه‌تا خوه ڤه‌کری بێژە. ڤێجا یا دن دمینه ته‌رجحا پەیەدێ.
ئه‌گه‌ر ئه‌سەد بمینا ل سه‌ر ڕه‌ژمه و ئۆپۆزسیۆن تێکبربیا، دێ هەسەدە ب داخوازا ڕوسیایێ ته‌ڤلی ئارتێشا رژێما ئه‌سەد ببوویا. ئیرۆ ژی ئه‌و نه ژ بۆ یه‌کتیه‌ک د ناڤا مالا کوردان دا، لێ ژ بۆ جهه‌کی په‌یدابکن و ده‌ما ئامه‌ریکا خوه ڤه‌کشینه ته‌ڤلی ئارتێشا سووریێ یا ژ نوو ڤه بێ ئاڤاکرن ببن.
ڕۆژا ٢٣\١٢\٢٠٢٤ێ مەزلوم عه‌بدی ل گه‌ل کانالا فرانسا٢٤ێ هه‌ڤپه‌یڤینه‌ک کر.
عه‌بدی دبێژه: “ئه‌م داخوازا هه‌رێمه‌کا فه‌ده‌رال ل سووریێ ناکن، به‌لکو داخوازا سووریه‌کا یه‌ک پارچه دکن.” فه‌رماندارێ هەسەدێ ئاشکه‌را کر کو ئه‌و دخوازن هێزێن وان ببن به‌شه‌ک ژ ئارتێشا نیشتمانی یا سووریێ گه‌ر ل ده‌مێ پێش دا بێ ئاڤا کرن، ”وێ ده‌ما کو هەسەده ژی هات ئاڤا کرن، مه وێ ده‌مێ ژی گۆت کو دڤێ ئه‌و هێز ببه به‌شه‌ک ژ هێزێن نیشتمانیا سووریێ.”
باشه ده‌ما عه‌بدی ڤێ ئاخاڤتنێ دکه دێ ژ بۆ یه‌کتیه‌کی د ناڤا مالا کورد دا ل ڕۆژاڤایێ کوردستانێ ب چ ئاوایی ته‌ڤبگه‌ره؟ هه‌تا د ناڤا ئالیێن کوردستانی دا یه‌کتیه‌ک نه‌به و نه ب یه‌کده‌نگی ل گه‌ل شامێ بدن و بستینن، هه‌ر دێ ببن دیلێ سیاسه‌تا ده‌ستهلاتا سووریێ ل دژێ داخوازێن مله‌تێ کورد.
باوه‌ر بکن، تەڤی هه‌موو تێکدان و خرابی و ئیشکه‌نجه‌یێن ده‌ستهلاتا پەکەکێ ل ڕۆژاڤایێ کوردستانێ کرین ژی، ئه‌گه‌ر ئیرۆ پەیەدە و ڕێخستنێن کوردێن ڕۆژاڤایێ کوردستانێ یێن گرێدایی پەکەکێ داخوویانیه‌کی بدن و خوە ژ پەکەکێ دوور بکن و پەکەکەخوە ژ ده‌ڤه‌را ڤه‌کشه، دێ د جهدا یه‌کتیا کوردان ل ڕۆژاڤایێ کوردستانێ بێ ئاڤاکرن.
2024.12.23
نێرین/شرۆڤه
ن.فرات
