نڤیسار

ئاغاتی و سه‌رۆکئه‌شیرتیێ چ دانه‌ مه‌ و پارتیێن مه‌ چ ددن مه‌.

بووبێ ئه‌سه‌ر

ل گۆر من ئەگەرێ کو کورد نابن یه‌ک ئه‌ڤن: 

زه‌مانێ به‌رێ د ده‌ما ئاغا و ئه‌شیران دا‌، ئه‌و دبوون ئەگەر کو کورد نه‌بن یه‌ک. ژ به‌ر کو هه‌ر یه‌ک ب سه‌رێ خوه‌ یه‌ک بوون. ل هه‌مبه‌ر زلما ل برایێ وی دهات کرنێ بێ ده‌نگ بوون، هه‌تا کو ده‌ما وان ژی دهات، ئێدی بێ تاقەت دمان.

د ده‌ما مه‌ یا نها و مۆده‌رن دا، ڤێ یەكێ ڕه‌نگێ خوه‌ گوهه‌رت و بوو ب ئاوایه‌کی مۆده‌رن، لێ د ئەساسێ خوه‌ دا‌ فه‌رقا به‌رێ و نها زێده‌ ژ هه‌ڤ نینە. ته‌نێ ل گۆر ده‌مێ خوه‌ گوهه‌رینه‌.

پشتی ته‌ڤگه‌ر ل باکورێ کوردستانێ گه‌ش بوو، هه‌ما بێژن هه‌ر که‌سه‌کی خوه‌ زانا، ژیر و ژ هه‌رکه‌سی كوردپەروەرتر ددیت، ل گۆر وێ زانه‌بوونا خوه‌ و تێگەهشتنا خوه‌ پارتیه‌ک ئان ڕێخستنه‌ک ‌ ئاڤا کر. ئه‌و بوو ئاغایێ وێ ڕێخستنێ و ئه‌ندام ژی کرن وه‌که‌ گوندیان ئان ب زمانێ نها مرید.

وه‌که‌ كا چاوا د زه‌مانێ به‌رێ دا ئاغایێن کوردان ل هه‌ڤ نه‌دکرن و هه‌ر یه‌کی دخوه‌ست ژ یێن دن ب بھێزتر به‌، کار و خه‌باتێن خوه‌ ل سه‌ر ڤی ئەساسی دمه‌شاندن.

ده‌ما داگیرکه‌ران ئێریش دبر سه‌ر برایێ وی ئانگۆ ئاغایه‌کی دن، یێن دن هه‌می بێ ده‌نگ دبوون و باوه‌ری دئانین کو ب ڕاکرنا ئه‌شیره‌کێ ئان ئاغایه‌کێ دێ جھ پتر ل وان بەرفرەھ بە‌.

ڤێ هه‌لوه‌ستا چه‌وت و شاش وەکر کو ئاغایێن کورد نه‌بن یه‌ک و نه‌بوون. چ ده‌مێ ئاغا، شێخ ئان سه‌رۆکئه‌شیره‌کی کورد یێن وه‌لاتپارێز ل هه‌مبه‌ر زلما دژمن ڕادبوون، دیسا یێن دن بێ ده‌نگ دمان هه‌تا کو داگیرکه‌ران ئه‌و سه‌ریهلدان ب زلمه‌که‌ مه‌زن تێک دبرن.

تێکچوونا وێ ته‌ڤگه‌را ژ بۆنا ئازادی و پاراستنا کوردستانێ، داویا داوی دبوو تێکچوونا یێن دن ژی. ژ به‌ر کو ژ ترسا قرکرن و وێرانکرنێ گه‌له‌ک ژ وان دبوون زلامێ ده‌وله‌تێ. لۆما ژی هه‌تا نها یه‌کیتیه‌ک مه‌ کوردان پێک نه‌هاتیه‌، ژ به‌ر کو ئه‌و شۆپ هێشتا بەردەوامە.

ته‌نێ ل باشوورێ کوردستانێ و بارزانیان یه‌کیتیا ئه‌شیره‌تێن کورد پێک ئانین. هه‌شت ئه‌شیر ئانین با هه‌ڤ.  ژ بۆنا ل هه‌مبه‌ر داگیرکه‌رێن عیراقێ شه‌رێ ئازادیا خوه‌ بدن و دان. ناڤێ وان بوو بارزانی ژ به‌ر کو ئه‌ڤ ل ده‌ڤه‌را بارزان پێک هاتبوو و ناڤێ خوه‌ ژ ور گرتن.

دیسا ب ڕێڤه‌بریا بارزانیان و ب تایبه‌تی یا نه‌مر ئیدریس بارزانی ل باشوورێ کوردستانێ ئه‌نیا نشتمانی (بەرەیێ كوردستانی) هاتە دامه‌زراندن. ب سایا یه‌کیتیا ئه‌شیر و پارتیێن باشوورێ کوردستانێ ئیرۆ ئه‌م ل ور خوه‌دی ده‌وله‌تا خوه‌نه‌.

ل باکورێ کوردستانێ ژی، پشتی سالێن 1960ان هندەك که‌سان ژ بۆنا خوه‌ پارتی ئاڤاکرن و بوونه‌ سه‌رۆکێ وێ ئان ژی ئاغایێ وێ و ژ خوه‌ ڕا‌ گۆتن ئه‌م کوردستانینه‌. هه‌ر سه‌رۆکێ پارتیه‌کێ ژی ئێدی بوو ئاغایێ پارتیا خوه‌. ل گۆر من  ئه‌شیره‌تیێ و ئاغاتیێ جهێ خوه‌ ژ پارتیان ڕه‌ هشتبوو.

ژ به‌ر کو ئاغا ئان سه‌رۆکئه‌شیر هه‌تا دمرن ئه‌و سه‌رۆکێ گوندێ خوه‌ ئان ئه‌شیرا خوه‌ بوون. نها ژی سه‌رۆکێ پارتیێن مه‌ ژی هه‌تا ئه‌و هه‌بن ئه‌و سه‌رۆکن. لۆما ل گۆر من چ فه‌رق ژ بلی مۆده‌رنبوونێ، د ناڤا وان دا نینە.

ژ به‌ر کو پارتیێن هه‌یی ژی، وه‌که‌ ده‌ما ئاغاتی و ئه‌شیره‌تیێ هه‌ڤدو قه‌بوول نه‌کرن و ناکن، هه‌ر یه‌ک ژ بۆنا خوه‌ پتر  ب هێز بکن، خورت بکن کار و بارێ خوه‌ ته‌نێ ل سه‌ر ڤێ ڕێیێ ددۆماندن و ددۆمینن.

د گه‌له‌ک واران دا و د گه‌له‌ک بوویه‌رێن قرێژ دا‌ هه‌ڤدو کوشتن، هه‌ڤدو قه‌بوول نه‌کرن، ل سه‌ر خه‌تا نه‌ته‌وه‌یی نه‌بوون یه‌ک. ژ به‌ر وان ژی وه‌که‌ ده‌ما ئاغاتی و ئه‌شیره‌تیێ، هه‌ر پارتیه‌کێ ته‌نێ ژ بۆنا خوه‌ خورت و ب هێز بکه‌ کار دکرن.

لێ هه‌زار جاران مخابن کو ده‌ما ئاغاتی ئان ئه‌شیره‌تیی، ژ ده‌ما پارتیێن ئه‌م یێن نها باشتر بوو. ژ به‌ر کو ئه‌و ب زمانێ خوه‌ داخفین و ب کوردیا خوه‌ کارێ خوه‌ دکرن. لێ پارتیێن مه‌ یێن نها؟؟؟

ئه‌ز ب خوه‌ هێ ژی د وێ باوه‌ریێ دا‌ مه‌ کو پارتیێن مه‌ یێن ژ خوه‌ ڕا دبێژن ”ئه‌م کورد و کوردستانی نه‌” هێشتا ژی ب ئاقل و باوه‌ریێن ئاغاتی و ئه‌شیره‌تیێ کارێ خوه‌ دکن و هه‌ر یه‌ک ژ بۆنا خورتکرنا پارتیا خوه‌ تێدکۆشە. (ژ بلی ھندەكان)

هه‌گه‌ر نه‌ وه‌ها با، گه‌لۆ چما ژ ده‌ما ئه‌حمه‌دێ خانی و هه‌تا ڕۆژا ئیرۆ گازی و هاوارا گه‌له‌ک ڕه‌وشه‌نبیرانه‌ کو دڤێ کورد ببن یه‌ک، لێ نابن یەك.

ب خوه‌ندن و نڤیساندنێ ئه‌م پچەكێ مۆده‌رن بوون، لێ وێ مۆده‌رنبوونێ ئه‌و ئاقل و مه‌ژیێ ئاغاتی و ئه‌شیره‌تیێ ژ سه‌رێ مه‌ کوردان ده‌رنه‌خست. هه‌گه‌ر ده‌رخستبا ئیرۆ ڕه‌وشا باکورێ کوردستانێ وێ نه‌ وه‌ها خه‌راب و وێران با. ڕه‌وشا باکورێ کوردستانێ ل به‌ر چاڤانه‌.

نها هه‌ر پارتیه‌ک مه‌ ب چه‌ند که‌سانه‌ و  پتر  مالباتی نه‌،  ناڤ ل خوه‌ کرنه‌ و بوونه‌ ئاغایێ خوه،‌ ببورن بوونه‌ سه‌رۆکێ پارتیا خوه‌. هه‌ر یه‌ک ژ وان کار و خه‌باتێ دکن دا کو خوه‌ خورت یێن دن قه‌لس بکن.

چما من ئه‌ڤ نڤیسی؟

گه‌لۆ پارتی و ڕێخستنێن کو نها هه‌نه‌، ب هه‌ژمارا خوه‌  ژ بۆنا باکورێ کوردستانێ نه‌ لوکسن. هه‌گه‌ر نه‌ لوکس بن، چما د بن سیوانه‌کا‌ نه‌ته‌وه‌یی دا‌ ته‌ڤگه‌ره‌کا خورت و نه‌ته‌وه‌یی ئاماده‌ ناکن. ناکن ژ به‌ر کو وه‌کە‌ ئاغا و سه‌رۆکئەشیرێن به‌رێ هه‌ڤدو قه‌بوول ناکن.

گۆتنا من ئه‌ڤه‌: هه‌تا سه‌رۆک و ڕێبه‌رێن پارتیێن مه‌ خوه‌ ژ مه‌ژی و باوه‌ریا ئاغاتی و سه‌رۆکئەشیرتیێ ئازاد نه‌کن وێ نکاربن ببن یه‌ک.

هه‌تا کو سه‌رۆک و ڕێبه‌رێن مه‌ (!) به‌رژه‌وه‌ندیا پارتیا خوه‌ د سه‌ر به‌رژه‌وه‌ندیا کوردستانێ ڕا‌ بگرن وێ نکاربن ببن یه‌ک. هه‌تا ئه‌ندامێن وان وه‌که‌ مریدان ته‌ڤبگه‌رن وێ نکارن ببن یه‌ک.

ژ به‌ر ڤێ، دڤێ ئه‌م لێ بخه‌بتن کو دەستپێكێ کوردێن باکور بکن نه‌ته‌وه‌یی و  پاشی دا‌م و ده‌زگه‌هێن خوه‌ دامه‌زرینن. پارتی و ته‌ڤگه‌رێن خوه‌ ئاڤا بكن.

هه‌گه‌ر پارتیێن مه‌ دخوازن ژ بۆنا گه‌لێ خوه‌ کار و خه‌باتێ بکن، دڤێ ل گۆر به‌رژه‌وه‌ندیا وی ته‌ڤبگه‌رن. هه‌گه‌ر ئه‌و بخوازن ب باوه‌ریه‌کا نه‌ته‌وه‌یی  پێنگاڤان به‌ر ب ئازادیێ دا‌ باڤێژن، دڤێ زووترین ده‌م  یه‌کیتیه‌ک  نه‌ته‌وه‌یی ئاڤا بکن.

هه‌گه‌ر وه‌ها نه‌کن ل گۆر من هه‌می پارتی و ته‌ڤگه‌رێن نها هه‌نه‌، دبن ئاسته‌نگ دا کو باکورێ کوردستانێ ئازاد نه‌به‌. لێ دڤێ ئه‌م هن ئیستیسنه‌یان ل به‌ر چاڤان بگرن.

وه‌لاته‌ک ب ڕێبه‌ریا پارتیێن خوه‌دی مرید کو هه‌ژمارا وان ب قاسی تلیێن ده‌ستانه‌، ئازاد نابه‌. وه‌لاته‌که‌ ب پارتیێن قه‌لس کو وه‌که‌ ئه‌شیره‌کێ ژی نابن ئازاد نابه‌.

هه‌گه‌ر ده‌ردێ پارتی، ڕێخستن و ته‌ڤگه‌رێن باکورێ کوردستانێ ژ بۆنا ئازادیا وه‌لات به‌، دڤێ ڕۆژه‌کێ به‌ری ڕۆژه‌کێ خوه‌ د بن سیوانه‌ک ‌ نه‌ته‌وه‌یی دا بکن یه‌ک، دا کو بکاربن ل هه‌مبه‌ر داگیرکه‌رێن خوه‌ ببن خوه‌دی هێز، قوه‌ت و گۆتن.

Back to top button