ئالیەکێ ڤی شەڕی یەکێتی یە لێ ئالیێ دی کی یە
ئالیەکێ ڤی شەڕی یەکەتی یە، وەرن بێژنە من، کانێ ئالیێ دی کی یە؟
سالا 1994ێ د سەروبەندێ دەستپێکا شەرێ براکوژیێ دژی پارتیا دەمۆكراتا كوردستانێ (پارتی)، بدەستپێشخەریا یەکێتیا نیشتمانیا کوردستانێ (یەكێتی)، پیرەژنەکا هەولێری یا کورە ل بەر دەرگەهێ مالا خوە یا روونشتی بوو، پرسیار کر و گۆت: ئەز دزانم ئالیەکێ ڤی شەڕێ براکوژیێ جەلالینە، لێ وەرن ژ من ڕا بێژن، کانێ ئالیێ دی یێ شەرێ ڤێ جارێ دژی یەکێتیێ کیە؟
دیرۆکا یەكێتیێ وەسا خویا دکە، کو ئەو بێ شەر ناژین. بۆ هەر کەس و ئالیەکی یا ئاشکرا بووی كو ئەو هوگرێن شەرکرنێ نە. ڤێجار شەرێ ئازادیێ بە یان ژی شەڕێ کوردکوژیێ بە، بۆ وان نە خەمە. یا گرنگ بۆ وان شەڕە.
ب گۆتنەك دی، یەكێتی ب ھەبوونا شەری ژیانا خوە یا سیاسی و رێكخستنی بەردەوام دكە، ناكۆكیێن خوە پێ ڤەدشێرە و شەرێ د ناڤبەرا باسك و گرۆپێن ناڤخوەیا خوە دا بێدەنگ دكە.
هەر ژ سالا 1964ێ هەتا بەری شەڕێ ئازادکرنا عیراقێ سالا 2003ێ ژ ئالیێ ئەمریکایێ ڤە، شەرێ وان بێڤەبڕ دژی پارتی بوو.
و هەروەسا شەرێن لا بلا ژی دژی سوسیالست، کۆمونیست، پاسۆک، بزاڤا ئیسلامی و پەکەکە .. .. هتد دا هەبوون.
لێ داخا وان یا گران و دەردێ وان یێ بێ دەرمان کولکا بەرڕانی یا ڤێ جارێ ئەوە، کو پارتی و سەرۆک بارزانی شەڕێ براکوژیێ یێ حەرام کری و ب چو رەنگەکی شەڕی دژی وان ناکە، تەڤی چەندین دەلیڤێن شەرپێفروتنێ ب پارتی. یا ژ هەموویان زیق و بەرچاڤتر، خیانەتا 16ێ ئوکتوبەرا 2017ێ بوو. لێ پارتی هەر خوە ژ شەڕێ کوردکوژیێ پاراست و نەچۆ بن وی باری.
پشتی کو کەسێ دەستپێشخەریێن براکوژیێ یێن وان نەپەژراندین، ڤێ جارێ ئەو بخوە بەربوونە گیانێ خوە.
هەر ژ شەڕێ بالەڤكرنا فلمێن رووت ل دژی ھەڤ. شەڕێ کوشتنا دەنگێن نەرازی ب چەکێن بێدەنگ. شەڕی ژەهرپێدانێ. شەڕێ ڕاگەهاندن و شەرمەزارکردنی. شەڕێ ئیرهابا فیکری، ئەنجام گەهاندە شەڕێ رووبرووبوونێ و هێرشبرنێ و هەستی شکاندنێ. ئانکو شەڕێ ناڤخوەیا یەکەتیێ و یێ ناڤمالا تالەبانی بخوە.
نها ئەگەر ئەو پیرەژنا 1994ێ مابیت، ئینشائەڵڵا ژیێ وێ یێ هزار ساڵی بیت، پێتڤی ناکەت کو بێژیت ئالیێن دی یێ ڤی شەڕێ دژی یەکەتیێ کینە، ئێکسەر دێ بێژیت شوکور بۆ خودێ، شەڕێ وان، شەڕێ دەستهەلاتا ناڤا یەکەتیێ و ناڤمالیا تالەبانی بخوە یە.
