نڤیسین: سەردار هێتوتى
ل كوردستانێ رِەوشا رِێكخراوێن جڤاكێ سڤيل گەلەكا شرِە، نەبوونا وان باشترە ژ هەبوونا وان، ئەو نەشێن تاكەكێ كارا ئاڤا بكەن هەتا كو بشێن جڤاكەكێ ساخلەم ئاڤا بكەن. ئەو ب تنێ ب ناڤ هەنە و ژ بۆ مەرەمێن تاكە كەسى و هندەك جاران ژى ژ بۆ يێن حزبى ھەنە. پتريا رِيێڤەبەرێن وان رێكخراوان هندى دەرمالە هەى د گورِەپانێ دا بوون، رِێكخەر و رِێڤەبەرێن ئاڤاكرنا جڤاكەك سڤيل بوون، لێ دەما دراڤ نەماى ناڤێ وان ژی ب ئێكجارى نەما هەر وەك ئەڤێن ب ناڤ رِێڤەبەرێن ڤان رِێكخراوان د هەبوونێ دا نەبن.
بێسەروبەری د ئاڤاكرنا ڤان رِێكخراوان دا، نەك تنێ كارتێكرنەكا خراب كريە سەر ناڤێ وان، بەلكو كارتێكرن ل جڤاكى ژى كريە و گەلەك جاران د ناڤا كوم و جڤاتان دا ب سڤكاتيڤە باس ل سەر ڤان رِێكخراوان دكەن و ب پالە ژ بۆ بەريكێ و مەرەمێن سياسى ل قەلەم ددەن.
ئازاديا پێكئينانا سەنديكا و رِێكخراوێن سڤيل د جيهانا رِوژئاڤايى دا و ب تايبەت ل وەلاتێن ئەورۆپا ئاراستێ دەولەتان هاتە گوهارتن و نەچار بوون كو دان ب ماف و ئازاديا زيێدەتر يا ڤان سەنديكا و رِێكخراوان بكەن و هەر ئەڤ يەكە ژى بويە ئەگەر كو ئەڤ رِێكخراوە د ئاستێ ژيانا سياسى، ئابوورى و جڤاكى يا وەلاتێن روژئاڤايى دا بشێن رولەكێ مەزن بگێرن.
دگەل كو نەدارى و دەستگورتى و بێ موچەييێ ئەڤرۆ پەرێن خوە ل سەر ئەسمانێ ڤى وەلاتى دا ئيناينە و رِۆژا رون بێ بها كريە لێ د هەمان دەم دا هەر مرۆڤن دشێن هەموو كاودانان بگوهرن و ئەون دشێن وەلاتێن مەزن و بهێز ئاڤابكەن، لێ بەلێ ب سەرپەرشتيا هندەك كەسێن ژێهاتى و بەرەهەڤ، دگەل كو سوشيال ميديايى هەم ب خرابى و هەم ژى ب باشى كاريگەريا خوە هەبويە د ڤێ قوناغێ دا، لێ خرابيا وێ د ڤێ چەندێ دايە كو هەستێ نەتەوەیبوونێ لاوازكريە، ئەو ژى هندەك كەسێن سياسى ل پشت ڤان هژمارێن سوشيال میدیایی هەنە، بەس ئەز د پرسم كانێ ئەو ب دەهان رێكخراوێن هشياريا جڤاكى ئەوێن كو ب شەڤ و رۆژ ژ بۆ ئاڤاكرنا تاكێ كورد درووشمێن مەزن هەلددان؟
