دکارم بێژم کو پشتی سالێن دوور و درێژ، ب ئاماده‌بوونا پارتییێن کوردستانی جارا ئه‌ول و ب گرسه‌یه‌ک باش نه‌ورۆزا گه‌لێ مه ل هه‌ر چار پارچەیێن کوردستانێ هاته پیرۆز کرن.
ئاگرپێخستنا ڤێ نه‌ورۆزێ جه‌مه‌دا (قه‌شا) دلێ هه‌می کوردستانیان،حه‌لاند. دبه کو پشتی پارچه‌بوونا کوردستانێ و هه‌تا نه‌ورۆزا ۲۰۲٥ئان ب ڤی ئاوایی، ب ڤی ڕه‌نگی و ب ڤێ گرسه‌یێ نه‌ورۆز نه‌هاتبوو پیرۆزکرن.
بێده‌نگیا کوردان یا سه‌د سالی د نه‌ورۆزا کۆلنێ دا هاته شکاندنێ. یه‌که‌م جار و ب گرسه‌یه‌ک وه‌ها هاته ئیسپاتکرن کو کورد ژ بۆنا مافێ خوه یێ ڕه‌وا یه‌کن. هێ نه‌مرنه، زیندینه و ل سه‌ر لنگانه. ئه‌ڤ هه‌بوون و ئه‌ڤ گرسه‌یی ژ دنیایێ را ژی وه‌که مه‌ساژه‌کێ هاته دایین کو وێ چو هێز و قوه‌ت دێ نکاربه کوردان ژناڤ ببە.
هه‌ر وه‌ها نه‌ورۆزا ۲۰۲٥ئان ب چۆشێن مه‌زن ل هه‌ر چار پارچەیێن کوردستانێ ب ئالا ڕه‌نگین هاته پیرۆز کرن. ئه‌ڤ نه‌ورۆز دێ ببه ده‌ستپێکا تێکچوونا ئیخانه‌تێ یا کو چو ماف ژ کوردان ڕه نه‌خوه‌ستبوون و ناخوازن.
چاوا کو کوردێن ژ هه‌ر چار پا‌رچەێن کوردستانێ، پشتی تێکچوونا کۆمارا کوردستانێ ل مه‌هابادێ بێده‌نگ بوون. ژ قودووم (بێ تاقات) که‌تبوون و ب شۆره‌شا ئیلۆنێ، کورد ژ نوو دا زیندی بوون. ل خوه های بوون کو هێ نه‌قه‌دیانن. ئاگرپێخستنا ڤێ نه‌ورۆزێ ژی کورد ژ نوو دا زیندی کر.
ڤێ نه‌ورۆزێ دا زانین کو دۆزا گه‌لێ کورد ل هه‌ر چار ارچەیان مافه‌کی ڕه‌وا و هه‌قێ وانه. د نه‌ورۆزا ل ئه‌لمانیا کۆلنێ کو ب سه‌رپه‌ره‌شتیا ڕه‌ڤاندا ناڤه‌ندا کوردستانی یا ل سه‌ر پێشنیار و داخوازا سه‌رۆک بارزانی هاتبوو دامه‌زراندن، کوردێن ئه‌ورۆپایێ ژ نوو دا ڕاکر سه‌ر لنگان. ڕوحه‌ک نه‌ته‌وه‌یی دا کوردێن هه‌ر چار پارچەیان، ل سه‌ران سه‌رێ ئه‌ورۆپا و ل کوردستانێ.
ڤێ نه‌ورۆزێ ب ئه‌ورۆپیان ژی دا زانین کو کورد ته‌نها دۆزا مافێ خوه دکن. کورد نه ته‌رۆریستن. کورد نه خه‌رابکه‌رن. و دا زانین کو کورد نه پەکەکە نه. ژ به‌ر کو هه‌تا نها گه‌له‌ک ده‌وله‌تێن ئه‌ورۆپایی کورد و پەکەکە دکرن یه‌ک. پێکهاتنا ڤێ نه‌ورۆزێ، ب ئه‌ورۆپیان ژی دا زانین کو کورد ته‌نێ دۆزا مافێ خوه یێ ڕه‌وا دکن.
کوردان د ڤێ نه‌ورۆزێ دا مەساژه‌ک باش دان ئه‌ورۆپیان کو کورد دۆزا مافێ خوه ب ڕێ و مەتۆدێن ده‌مۆکراتیک دکن. دا زانین کو ته‌رۆر نه کارێ کوردانه. هاته فێم کرن کو یێن مافێ کوردان نه‌دخوه‌ستن، هه‌تا نها ب ته‌رۆرێ دخوه‌ستن کوردان وه‌که ته‌رۆریستن نیشان بدن.
لێ هه‌زار جاران سپاس کو باشوورێ کو ب سه‌رپه‌ره‌شتیا بارزانیان و پەدەکێ هاتیه ئازادکرن کو ئه‌و بوویه وه‌که سیوانه‌کێ کو هه‌می کوردان ژ ته‌رز و بارانێ بپارێزه.
بارزانیان ب شۆره‌شا ئیلۆنێ کورد زیندی کربوون. ب ئاماده‌کاریا ڤێ نه‌ورۆزێ ژی یه‌کتیا کوردان د هه‌ر چار پارچەیان دا پێک ئانین. ژ به‌ر کو هاته فێمکرن، هه‌تا کورد نه‌بن یه‌ک، دێ نه‌گەهێژن ماف و هه‌قێ خوه. دژمنێ کوردان یێن هوندر و ژ ده‌رڤه گه‌له‌کن و ب هێزن. لێ هێزا هه‌ری مه‌زن کورد و یه‌کتیا وان ب خوه یه.
لۆما هاته فێم کرن و زانین کو ئاگرپێخستانا ڤێ نه‌ورۆزێ، دێ ببه ئاگرپێخستنا یه‌کتی و ب هه‌ڤراکارکرنا پارتیێن کوردستانی ل هه‌ر چار پارچەیان.
مه دیت و هاته زانین کو ئاگرپێخستنا نه‌ورۆزێ ل قادێن ئه‌ورۆپا و ل هه‌ر چار پارچەیێن کوردستانێ بوو جهێ کێف و شاهیان. ئه‌ڤ هه‌لوه‌ست، کێفخوه‌شی، شاهی وێ ببه تۆڤێ یه‌کتیا ڕه‌سه‌ن یا ناڤا کوردان. ب ئالا ڕه‌نگین، ئاگرپێخستنا ڤێ نه‌ورۆزێ، دێ ببه گاڤا ئه‌ول و به‌رده‌وامیا دامه‌زراندنا ئه‌نیه‌ک نه‌ته‌وه‌یی، ل هه‌ر چار پارچەیێن کوردستانێ.
د ڤێ نه‌ورۆزێ دا دڤێ کورد باش گوهێن خوه بدن مه‌ساژ و شیره‌تێن سه‌رۆک مه‌سعود بارزانی. جه‌نابی وی ب ڤی ته‌مەنێ خوه و ب وان ته‌جروبه‌یێن خوه، وه‌که سه‌رۆکه‌کی کوردان، داخواز دکه کو کورد یه‌کتیا خوه پێک بینن و دۆزا مافێ خوه یێ ڕه‌وا بێ توند و تووژیێ بخوازن.
د ڤێ نه‌ورۆزێ دا هاته فێمکرن و زانین کو نه‌بوونا یه‌کتیه‌کا ل سه‌ر ئەساسێ نه‌ته‌وه‌یی ئه‌م دێ نه‌گەهژن چو قاناغان. ئه‌ڤ مه‌ساژ باش هاته خوه‌ندن و ب هێڤیمه ژ نها و پێدا وێ ئه‌ڤ مه‌ساژ و داخوازا سه‌رۆک بارزانی ل هه‌ر چار پارچەیێن کوردستانێ پێک بێ.
