کۆنێ ڕه‌ش
ئه‌ڤە سێیه‌مین جاره کو دچم زاخۆ، زاخۆکا بادینان.. جارا یه‌که‌مین د سالا ۲۰۰۸ئان دا بوو، ل باخچه‌یێ ئاڤاهیێ قایمقامیێ من سه‌میناره‌ک ل دۆر به‌درخانیان دا. جارا دویه‌مین سالا ۲۰۱۹ئان بوو، من دو پرتووکێن خوه ب ناڤێ (به‌ریا مێردینێ و کوردێنه‌ژبیرکرنێ)، ل زانکۆیا زاخۆ ئیمزاکرن. و ئه‌ڤ به‌شداریا من د کۆنفه‌رانسێ ناڤده‌وله‌تی دا ل دۆر فۆلکلۆرێ کوردی ل زانکۆیا زاخۆ، د ڕۆژێن ۱۱-۱۲ گولانا ۲۰۲۲ئان دا، جارا سێیه‌مینه. ل سه‌ر ڤێ داخوازنامه‌یا سه‌نته‌را کوردی بۆ ڤه‌کۆلینێن فۆلکلۆری ژ زانکۆیا زاخۆ، د ۹ێ گولانا ۲۰۲۲ئان دا، ژ قامشلۆ من به‌رێ خوه دا زاخۆ: (سلاڤ و ڕێز مامۆستا کۆنێ ڕه‌ش.. سه‌نته‌رێ زاخۆ بۆ ڤه‌کۆلینێن کوردی ل فاکۆلته‌یا زانستێن مرۆڤایه‌تی/ زانکۆیا زاخۆ ل ڕێککه‌ڤتی ۱۱ و ۱۲ گولانا ۲۰۲۲یێ دێ کۆنفرانسه‌کێ ناڤده‌وله‌تی ل دۆر فۆلکلۆرێ کوردی گێریت. له‌ورا ئه‌م وه‌کو سه‌نته‌رێ زاخۆ بۆ ڤه‌کۆلینێن کوردی هه‌وه‌یێن هێژا داخواز دکه‌ین کو ل کۆنفرانسی ئاماده ببن. هوون دکارن ب ناڤونیشانێ “فۆلکلۆرێ کوردی ل ڕۆژاڤایێ کوردستانێ” د په‌نه‌له‌کێ دا پشکدارییێ بکه‌ن. هه‌ر ساخ بن/ سەنتەرێ زاخۆ یێ ڤەکۆلینا /۱۹/٤/۲۰۲۲).
ب چوونا زاخۆ را، ژ ره‌خ هه‌ردوو ده‌ستهلاتێن سینۆر ڤه، ب هێسانی ده‌رباسی کوردستانا ئازاد و سەربخوه بووم.. ل زاخۆ، هۆتێلا ژامال، ئه‌ز ژی وه‌ک وان ۸٥ مێڤانێن قه‌ده‌ربلند کو ژ هه‌رچار پارچه‌یێن کوردستانێ (باکور، ڕۆژهلات، ژخوه باشوورێ ب هه‌ردوو شێوه‌زاران هه‌بوون، هه‌م ژی ژ ئه‌ورۆپا و ئه‌ز ژ رۆژاڤا)، هاتبوون، ب گه‌رمی هاتم پێشوازی کرن.
د هه‌ردوو رۆژێن کۆنفه‌رانسێ دا (۱۱-۱۲ گولانێ)، پانه‌لێن کۆنفه‌رانس د چه‌ند هۆلێن زانکۆیێ دا هاتن گه‌راندن.. ۸۳ په‌نالیستان ڤه‌کۆلینێن خوه د ۱۸ روونشتنان دا خوه‌ندن، ته‌ڤ ل دۆر زیلانا زمان و فۆلکلۆرێ کوردی بوون، هندەک چاک و رند بوون، هندەک لاواز بوون.. د ئه‌نجام دا دکارم ببێژم کو ته‌ڤ باش بوون..! باشبوون کو ته‌ڤ ب زمانێ کوردی هاتن خوه‌ندن..
ئه‌ز ڤێ کۆنفه‌رانسێ پیرۆز دبینم و ژێ را شاباش دکم.. و دکارم ببێژم کو ئه‌و دۆکتۆرێن زانکۆیا زاخۆ یێن کو ب کار و بارێن سه‌نته‌رێ زاخۆ ژ بۆ ڤه‌کۆلینێن کوردی رابوون و رادبن هێژانه په‌سن و سپاسیان. نه‌خاسم کو د ڤێ ره‌وشا ته‌نگ و دژوار دا، ئه‌و دکارن رۆناکبیر، نڤیسکار و ره‌وشه‌نبیرێن هه‌ر چار پارچه‌یێن کوردستانێ د بن بانه‌کی دا ل هه‌ڤ بجڤینن.. به‌لێ، ب خێرا ڤێ کۆنفه‌رانسێ من گه‌له‌ک که‌س ژ پارچه‌یێن کوردستانێ ناسکرن و ئاسۆیێ ئاگاهداریێن من فره‌هتر بوون..
ب راستی، ل زاخۆ و زانکۆیا زاخۆ من خوه د کوردستانه‌کا بچووک دا دیت! پانه‌لا من د دویه‌مین رۆژ دا بوو، ب ناڤێ: (فۆلکلۆرێ کوردی ل رۆژاڤایێ کوردستانێ/ (جزیر گه‌نجینه‌یه‌که زمان و زارگۆتنا کوردی یه)، ژ ۱۲ رووپه‌لێن ئا٤ پێک دهات، ل دۆر ره‌وشا فۆلکلۆرێ کوردی ل رۆژاڤایێ کوردستانێ و خه‌باتێن خوه یێن د وی واری دا ب ئاوایەکی به‌رفره‌ه من بەرچاڤ کرن! ئه‌ڤه کته‌ک ژ ئه‌نجاما گۆتنا من: (رۆژا ئیرۆ، زارگۆتن و فۆلکلۆرا مه ل رۆژاڤا؛ چیرۆک، چیڤانۆک، سه‌رپێهاتی، ده‌ستان، ستران، گۆتنێن پێشیان، لیستک، یاری.. بێتر د سینگا به‌له‌نگاز، هه‌ژار و فه‌قیرێن گوندان دا مانه؟ ئه‌وێن کو دووری شارستانیا باژارانه. ئه‌وێن کو هێژ ب چاندنیێ و په‌زخوه‌دیکرنێ مژوول دبن..
د ڤان سالێن داوی دا، ئه‌و ژی هن ب هن کێم دبن و کاله‌مێر ژی هن ب هن دمرن.. پێویسته رۆژه‌کێ به‌ری رۆژه‌کێ، رێکخستنێن مه، سازی و کۆمێن ره‌وشه‌نبیرێن مه، دانهه‌ڤا زارگۆتنا مه ژ خوه را بکن ئه‌رکه‌کی سه‌ره‌که و پیرۆز.. هه‌ر کو کاله‌مێره‌کی مه دمره، هه‌ر کو کورده‌ک دووری زمانێ خوه دکه‌ڤه کوردستانا مه تێ گوڤاشتن و بچووک دبه.. ژ به‌ر کو دیرۆکا مه د فۆلکلۆرێ مه دا یه..). خوه‌ش بوو کو به‌شدارێن هه‌رچار پارچه‌یێن کوردستانێ، هه‌ر یه‌کی د کۆنفه‌رانسا فۆلکلۆرا کوردی دا ل سه‌ر ره‌وشا زمان و فۆلکلۆرێ کوردی د پارچه‌یێ خوه دا راوه‌ستییان و خه‌باتێن خوه یێن د وارێ فۆلکلۆر دا ب ئاواکی به‌رفره‌ه بەر چاڤ کرن! یا هین خوه‌شتر کو د هه‌ردوو رۆژێن کۆنفه‌رانسێ دا ئاماده‌بوونکه قوبه ژ ره‌خ خه‌لکێن زاخۆ ڤه هه‌بوو.. ب حازریا وان پانه‌لێن کۆنفه‌رانسێ دهاتن خه‌ملاندن، نه‌خاسم به‌شداریا ژ ره‌خ که‌چ و خۆرتان ڤه.. ئه‌ڤ یه‌ک ژی جهێ کێفخوه‌شیێ یه..
بێگومان (گۆشت بێ هه‌ستی نینه).. ب هێڤی مه کو د سالێن هاتی دا ئه‌و کێماسیێن ته‌کنیکا د وارێ ده‌ما خوه‌ندنا پانه‌لان دا درێژتر به و به‌لاڤۆکه‌کا رۆژانه ب ئالفابه‌یا ئارامی و لاتینی، ب نووچه و چالاکیێن کۆنفه‌رانسێ بێ به‌لاڤکرن. لێ هه‌ر و هه‌ر ئه‌ڤ قه‌نجی و ڤه‌کرنا ڤی ده‌ری وێ ژ زانکۆیا زاخۆ را بمینه و وه‌ک کو کوردان گۆتیه: (هه‌چی به‌رێ گولا زه‌رێ). زانکۆیا زاخۆ ئا به‌رێ یه. ژخوه گه‌ر و گه‌شتا په‌نالیستان ژ بۆ ئامێدیێ، گۆرێن نه‌مران ل بارزان و باژارێ ئاکره‌یێ زۆر زۆر خوه‌ش بوو.. ژ دل سپاسیێن خوه ژ پرۆف در. نادهم ژاکهسی سه‌رۆکێ زانکۆیا زاخۆ و پرۆف در. هۆگه‌ر تاوفق سه‌رۆکێ کۆنفه‌رانسا فۆلکلۆرا کوردی و ته‌ڤ دۆکتۆرێن زانکۆیا زاخۆ کو ب نه‌فسه‌کا بچووک خزمه‌تا مێڤانان دکرن، پێشکێش دکم. ب هێڤیا کو ئه‌م جاره‌که دن، هه‌ڤ د بن بانێ زانکۆیا زاخۆ دا ببینن.
