ئه‌م کورد چما ب سه‌رناکه‌ڤن
بووبێ ئه‌سه‌ر
ئه‌م ب سه‌رناکه‌ڤن، ژ به‌ر کو ئه‌م ژ هه‌ڤ حه‌ز ناکن. ئه‌م ب سه‌رناکه‌ڤن، ژ به‌ر کو هەرتم ئه‌م ل دژی هه‌ڤ کار دکن. ئه‌م سه‌رناکه‌ڤن، ژ به‌ر کو ئه‌م ل هه‌مبه‌ر هه‌ڤدو حه‌سوودن. ئه‌م ب سه‌رناکه‌ڤن، ژ به‌ر کو ئەم داگیرکه‌رێن خوه د سه‌ر خوه ڕا دگرن.
به‌لێ گه‌له‌ک تشتێن دن ژی هه‌نه کو مرۆڤ دکاره ل سه‌ر ڤێ زێده بکه. لێ ل گۆر باوه‌ریا من خالا هه‌ری گرنگ کو ئه‌م نکارن ب سه‌رکه‌ڤن، ئه‌م هێشتا ژی نه‌بوونه نه‌ته‌وه‌په‌ره‌ستێ گه‌لێ خوه. ئه‌م هێشت فێر نه‌بووینە کو به‌رژه‌وه‌ندیا گه‌لێ خوه د سه‌ر یا خوه و پارتیێن خوه ڕه بگرن. لۆما ژی هه‌تا ئه‌م هۆسا بن، ئه‌م دێ ب سه‌رنه‌که‌ڤن.
وه‌که مله‌ت و وه‌که گه‌ل ئه‌م هێشتا فێر نه‌بووینە کو ئه‌م قیمه‌ت و ڕوومه‌تا هێژاییێن خوه بزانین، ژ بۆنا به‌رژه‌وه‌ندیا گه‌لێ خوه وان بپارێزین. ئه‌م فێر بووینه کو هه‌گه‌ر ئه‌م د ناڤ د کاروباره‌کی دا بن، ئه‌و کار تێک بچە ژی نه خه‌ما مه یه.
ژ بەر کو ئەز د کۆمیته‌یه‌کێ دا نە بووم ئەندام، ژ بۆنا کو ئه‌ز ژی به‌شداری جڤینێ ببم بانگی من نه‌کرنه، ئه‌ز ژی پشتگریێ نادەم وێ جڤینێ حەتا ئەگەر گەلەک د قازانجا گەلێ مە ژی دا بە.
ژ به‌ر کو ئه‌م کوردێن باکورێ کوردستانێ فێری ئاقلداینێ بوونه و د ناڤا کارێن پراکتیکدا نینن، لۆما ژی ئه‌م ب سه‌ر ناکه‌ڤن. ئه‌م ژ کارێ کۆڵه‌کتف حه‌ز ناکن، هه‌ر پارتی، هه‌ر شه‌خس ب سه‌رێ خوه دخوازە ته‌ڤبگه‌رە و دگه‌رن، لۆما ئه‌م ب سه‌ر ناکه‌ڤن. ئه‌م ب سه‌ر ناکه‌ڤن، ژ به‌ر کو ڕه‌وشا باکورێ کوردستانێ ل به‌ر چاڤانه وێرێ تێک چوو یه، ژ بۆنا وێ پارچەیێ تشته‌کی ناکن لێ ب پارچەیێن دن ڤه مژوولن.
ژ خێرا خوه‌دێ ڕا مه شیابا دیرۆکا خوه ناس بکین، کێماسی و بوویه‌رێن د وێ دیرۆکێ دا قەومینە دوباره و سێباره نه‌کربانە. ژ خێرا خوه‌دێ ڕا مه شیابا سوود ژ دیرۆکا خوه وەرگرن دا ئه‌م شیابانە ب سه‌رکڤن.
لێ هه‌زار جار مخابن کو ئه‌م ڤانا یه‌کێ ژی پێک ناینن، دیرۆکا خوه ناسناکن، سه‌ده‌مێن کو ئه‌م نکارن ب هه‌ڤره کار بکن نابینن ئان دبینن لێ دیسا ژی ئه‌م وێ کێماسیا ژ دیرۆکا ٦۰۰ هه‌زار سالان دا هه‌تا ڕۆژا ئیرۆ پێک هاتیه و تێ، نابینن.
تو ژ کیژان کوردی/ێ گوهداری بکەی، هه‌می یه‌ک تشتی دبێژن: ”ئاخ مه ژی ده‌وله‌ته‌ک هه‌با دێ حالێ مه ژی نه ئه‌ڤ حال با”. هه‌ر تێ گۆتن کو ”چ تشتێن دهێتە سه‌رێ مه ژ به‌ر بێ ده‌وله‌تبوونا مه یه”. لێ دیسا ژی ئه‌م قیمه‌تا ده‌وله‌تا خوه یا کو ئیرۆ ل باشوورێ کوردستانێ هه‌یه نابینن و نزانن.
لێ هه‌زار مخابن ئیرۆ مه ده‌وله‌ته‌کا فه‌ده‌رال هه‌یه و ئه‌ڤ ده‌وله‌ت ژ ته‌ره‌ف گه‌له‌ک که‌س و پارتیان ڤه ژی هێشتا نا‌یتە دیتن و ناس ناکن. تشتێن کو ده‌وه‌له‌تا مه یا کوردی دخوازە بکه، گه‌له‌ک کوردێن مه ل هه‌مبه‌ر وێ هندەک تشتێن دن دکن.
هه‌لبه‌ت ئەڤە هه‌می ب سه‌رێ خوه نابه، گه‌له‌ک ده‌ستێن تاری د ناڤا مه دا هه‌نه. داگیرکه‌رێن مه هه‌ر ل سه‌ر کارن دا کو یه‌کێتیا گه‌ل پێک نەهێت. که‌مالیست ب ڕێیا ئیدیۆلۆژیێ پێشڤه‌روو(!) د ناڤا مه ده نه دا کو نه‌هێلن یه‌کتیا مه کوردان چێ ببه.
لێ یا هه‌ری گرنگ ژی ئه‌وە کو ئه‌م ب خوه نه ته‌مامن. ژ به‌ر هندەک سه‌ده‌مێن من ل ژۆر گۆتین و هندەک ژی یێن هوون بێژن.
بنێرن و ببینن کو ئه‌م هه‌رکه‌س ژ بێده‌وله‌تبوونێ عاجزن و هه‌ر بەحسا بێدەولوتبوونێ دکن؛ ”ئاخ مه ژی ده‌وله‌ته‌ک هه‌با”،دبێژن.
لێ ئیرۆ ده‌وله‌ته‌کا مه هه‌یه، هه‌زار مخابن ئه‌م ل دژی وێ ده‌وله‌تا کو دخوازە ژ بۆنا مه کوردان تشتێن باش بکه، ده‌ردکه‌ڤن.
ئه‌م باش دزانن بێده‌وله‌تی مرنه. لێ ئه‌م وێ مرنێ ب ده‌ستێ خوه دکن. د ژیانا کوردان دا جارا ئه‌ولە ب سه‌رپه‌ره‌شتیا ده‌وله‌تا کوردی ژ بۆنا کوردێن ل ده‌رڤه‌یی وه‌لات خه‌باته‌کا پیرۆز هاته کرن. ده‌زگه‌هه‌ک ب ناڤێ ”کۆنفه‌ده‌راسیۆنا ڕه‌ڤه‌ندا کوردستانی” ژ بۆنا کارێ کوردێن ل دیاسپۆرایێ هاته دامه‌زراندن، دا کو ئێدی کورد ژی بێ خوه‌دی نه‌مینن.
لێ هندەک کوردان ته‌حەمولا ڤێ نه‌کرن، ژ به‌ر کو بۆ کۆنگرەیا هەولێرێ نه‌هاتبوون بانگکرن، دلگران بوون و ل هندەک کەسێن دن یێن وەک خوە گەریان و پەیدا کرن و ڕۆژا ٢٠٢٢/١/٢٢ ب ناڤێ ”دیاکورد” وان ژی کۆمیته‌یه‌ک ئانگۆ ده‌زگه‌هه‌ک ل دژ یا ب ناڤێ ”کۆنفه‌ده‌راسیۆنا ڕه‌ڤه‌ندا کوردستانی” دامه‌زراندن.
هه‌لبه‌ت دامه‌زراندنا ڤێ نه ب سه‌رێ خوه بوو. هندەک پارتی یێن باکورێ کوردستانێ کو ژ خوه ڕا دبێژن: ”ئه‌م کورد و کوردستانی نه” و ل گه‌ل هندەک ده‌زگه‌هێن ل باشوورێ کوردستانێ کو هه‌می ژ بارزانیان نه‌خوه‌شحالن و گه‌له‌ک ژی ژ ئاپۆیێن فه‌دیۆک/شەمۆک کو ژ بۆنا ناڤارۆکا ”کۆنفه‌ده‌راسیۆنا ڕه‌ڤه‌ندا کوردستانی” تێک ببن ئه‌ڤ کار کرنه. ل گۆر من ئه‌ڤ دامه‌زراندنا دیاکورد ل هه‌مبه‌ر ”کۆنفه‌ده‌راسیۆنا ڕه‌ڤه‌ندا کوردستانی” کورد هاتیه دامه‌زراندن دا کو ل ئه‌ورۆپایێ کار نەهێتە کرن.
ژ به‌ر کو ل هه‌می جیهانێ ل سه‌ر ناڤێ مله‌ته‌کی یه‌ک ته‌ڤگه‌را دیاسپۆرایێ هه‌یه، لێ یێن مه کوردان بوونه دو دەزگە. کا ئیجار دێ چاوا کار بکن؟ کیژان ژ وان دێ ده‌ستهلات به کو مافێ کوردێن ل دیسپۆرایێ بپارێزن؟ هه‌لبه‌ت دێ حکومه‌تا هه‌رێما کوردستانێ به، لێ ب ئاڤابوونا دو ناڤاندێن دیاسپۆرایێ دێ هندەک ئاسته‌نگی ده‌رکه‌ڤن پێش. ژ خوه ئارمانجا ئاڤاکرنا (دیاکورد)ێ ژی ئه‌ڤه کو ئاستەنگیان ل پێشیا خەباتێن (ناڤەندا رەڤەندا کورد) چیکە.
چو ده‌ما شه‌خسان خوه کرن ئالتارناتیفا ده‌وله‌تا خوه، هوون بزانبن ئه‌و نه ژ خێرا وی کاری ڕا یه. مه‌سه‌له دبه ئاسته‌نگکرنا کارێ داسپۆرایێ کو ژ بۆنا کورد ڕۆناهیێ نه‌بینن. لۆما دڤێ ب چو ئاوایی ”کۆنفه‌ده‌راسیۆنا ڕه‌ڤه‌ندا کوردستانی” خوه نێزیکی کاروبارێ “دیاکورد” ێ نه‌کن.
د ده‌ستپێکا هه‌ر کاره‌کی دا دێ کێماسی هه‌بن، یا گرنگ ئه‌وه مرۆڤ ب هه‌ڤره وان کێماسیان چارەسەر بکە دا کو کار باشتر و ل گۆر به‌رژه‌وه‌ندیا گه‌ل ب ڕێڤه بچە. ل دژبه‌ری وێ کارکرن خوه خوەکوشتنە و ناناسکرنا دەولەتا خوە یە
