د سیاسه‌تا نه‌ته‌وه‌یا گه‌لێ کورد دا هندەک شه‌خسیه‌ت هه‌نه کو ب رۆل و ئه‌رکێن خوه، مۆهرا قه‌هره‌مانیێ، ئاشتی و یه‌کتییێ ل دیرۆکا گه‌لێ کورد خستنه. ژ وان نه‌مران یه‌ک ژی ئیدریس بارزانی بوو.
ئیدریس بارزانی د شه‌ر و ته‌کۆشینا ئازادیا کوردستانێ دا رۆله‌کێ تایبه‌ت هه‌بوو کو ئه‌و نه ته‌نێ شه‌رڤان و د ڤی واری دا له‌شه‌که‌ری بوو. نه‌مر ب هه‌لوه‌ست، کریار و بوویه‌رێن خوه وه‌که رێڤه‌بره‌کی پەدەکێ تم ئالیێ وی یێ لهه‌ڤکرن و ب هه‌ڤره‌کارکرنا پارتیێن هه‌یی، یێن ل باشوورێ کوردستانێ د بن سیوانه‌کا نه‌ته‌وه‌یی دا، وان بگەهینه هه‌ڤ، ل پێش بوو.
ئه‌ڤ خوسووسیه‌تا نه‌مر ئیدریس بارزانی ب کێم سه‌رۆک و رێڤه‌برێن کوردستانێ و جیهانێ ژی را هه‌بوو ئان هه‌نه. ژ بۆنا کو ئه‌و بکاربه هه‌می رێخستن و پارتیێن باشوورێ کوردستانی د بن سیوانه‌کا نه‌ته‌وه‌یی دا بکه یه‌ک، گه‌له‌ک خه‌بات و هه‌ولدان کر. د ڤێ هه‌لوه‌ستا خوه یا نه‌ته‌وه‌یی دا ب سه‌ر که‌ت.
ژ به‌ر یه‌کیتی و بهه‌ڤره‌کارکرنا پارتیێن کوردستانی گه‌له‌ک زه‌همه‌ت بوو و هێ ژی وه‌ها یه. لێ نه‌مر ئه‌و زه‌همه‌تی ب که‌د و هه‌لوه‌ستا خوه، چ پارتیێن ل باشوورێ کوردستانێ هه‌بوون، ب خه‌باتێن دوور و درێژ، ب هلمفره‌هیه‌که جامێرانه و ب هه‌لوه‌ستا خوه یا نه‌ته‌وه‌یی، هه‌ولا دامه‌زراندنا ئه‌نیا نه‌ته‌وه‌یی دا.
هه‌لبه‌ت ئه‌ڤ نه کاره‌کی هێسان بوو کو که‌سه‌ک بکاربه پارتیێن کوردستانی د بن کۆنه‌کی نه‌ته‌وه‌یی دا ژ بۆنا به‌رژه‌وه‌ندیا گه‌لێ خوه بگەهینه هه‌ڤ. ده‌ما داگیرکه‌ران وه‌لاتێ مه کوردستانا شرین پارچه کرن و ل هه‌ڤ پارڤه کرن، ب ڤێ یه‌کێ هه‌ولا کو کورد نه‌بن یه‌ک و ب هه‌ڤره کار نه‌کن، مه‌ژیێ وان ژی داگیر کر. هه‌لوه‌ستێن وان یێن نه‌ته‌وه‌یی ب رێیا سیخور و زلامێن خوه ژ هه‌ڤ به‌لاڤ کر. ئه‌ڤ هێ ژی به‌رده‌وامه.
ژ به‌ر وێ داگیرکرنێ بوو کو یه‌کیتییا گه‌لێ کورد پێک نه‌دهات. لێ نه‌مر ئیدریس بارزانی ئه‌ڤ یه‌کا باش دزانی بوو و ل گۆر وێ هه‌لوه‌ست گرت، کار و خه‌باتێن بێ وه‌ستان دۆماند. ب ڤێ خه‌باتا خوه، نه‌مر ژ هه‌می پارتیێن کوردستانی یێن باشوورێ کوردستانێ بەرەیەکێ نه‌ته‌وه‌یی پێک ئانی کو ئه‌ڤ نه کاره‌کی هێسان بوو، لێ نه‌مر پێک ئانی بوو.
ب سایا دامه‌زراندنا بەرەیێ کوردستانی ئیرۆ ئه‌م وه‌که کورد ل باشوورێ کوردستانێ خوه‌دیێ خوه و وه‌لاته‌کی ئازادن. به‌لێ ئه‌ڤ ب ته‌کۆشینا بارزانیان یا سه‌د سالان و ب دامه‌زراندنا ئه‌نیا نه‌ته‌وه‌یی یا کو ب پێشه‌نگیا نه‌مر ئیدریس بارزانی هاتبوو دامه‌زراندن، کورد ل باشوورێ کوردسانێ بوونه خوه‌دیێ پارچه‌ک ژ وه‌لاتێ خوه یێ ئازاد.
ژ به‌ر وێ هه‌لوه‌ست، کریار و پێکانینا به‌ره‌یێ کوردستانی بوو کو کوردان ناڤێ نه‌مر کرن ئه‌ندازیارێ ئاشتی و یه‌کیتییا گه‌لێ کورد. هه‌گه‌ر نه ژ وێ بەرەیێ کوردستانی با، دبوو کو ئیرۆ ئه‌م نه خوه‌دیێ خوه و ئازادیا باشوورێ کوردستانێ بوونا. خوه‌زی ئه‌ندازیاره‌کی وه‌که نه‌مر ل باکورێ کوردستانێ ژی په‌یدا ببا.
د ناڤ ته‌ڤگه‌ر و پارتیان دا په‌یداکرنا ئه‌ندازیارێن ئاشتی و یه‌کیتییێ زه‌همه‌ته. لێ نه‌مر ژ بۆنا کوردستانه‌کا سه‌ربخوه، هه‌می به‌رژه‌وه‌ندیا خوه یا سه‌خسی و حزبی ل ئالیەکی دانی و ته‌نێ کار و خه‌باتا خوه یا تالی کر ژ بۆنا دامه‌زراندنا ئه‌نیا نه‌ته‌وه‌یی. ژ به‌ر کو نه‌مر باش دزانیبوو هه‌گه‌ر یه‌کتییا کوردان پێک نه‌یێ ئازادی و سه‌رخوه‌بوونا وه‌لاتێ وان ژی دێ پێک نه‌یی.
ئیدریس بارزانی وێ پێکانینا خوه و خوه‌دی هه‌لوه‌ستا خوه یا نه‌ته‌وه‌یی هه‌تا کو کورد ل سه‌ر روویێ جیهانێ بژین، ئه‌و دێ ژی وه‌ک ئه‌ندازیاره‌کی ئاشتی و یه‌کتییێ د دلێ هه‌ر کورده‌کی دا بژی. هه‌ر چقاسی ئه‌و فزیکی نه د ناڤا مه دا به ژی. لێ ئه‌و ب فکر و رامانێن خوه د دلێ هه‌ر کوردپه‌روه‌ره‌کی دا زیندی دژی و دێ بژی.
لۆما ئه‌ز دبێژم: ئه‌ندازیارێ ئاشتی و یه‌کیتتیا گه‌لێ کورد ئیدریس بارزانی نه‌مره. ئه‌و د دلێ مه دا هه‌ر دژی و وێ بژی. سه‌ر و به‌ژنا خوه ل به‌ر خه‌باتێن وی دته‌وینم. بلا دلێ وی ره‌حه‌ت به کو ئیرۆ زارۆکێن وی یێن وه‌که شاگرتن وی بوون، خوه‌دی ل کوردستانێ ده‌رکه‌تنه و وێ هه‌ر ده‌رکه‌ڤن.
