ئه‌ردۆگان ژ بەر دو ئەگەران ژ مسته‌فا کازمی دترسە
مالپه‌را ئه‌هوال یا ترکی د ڕاپۆرته‌کێ دا به‌حسا وێ یەكێ دکه كو ڕه‌جه‌ب تەیب ئه‌ردۆگانێ سه‌رۆکێ ترکیێ ژ مسته‌فا کازمی سه‌رۆکوه‌زیرێ عیراقێ دترسە كو تخووبه‌کی ژ بۆ ھنارتنا به‌رهه‌مێن ترکیێ بۆ عیراقێ ده‌ینه و ب نێزیکبوونا ژ سعودیێ ژی عیراق بكەڤە د ناڤ به‌ره‌یێ دژایه‌تیکرنا ترکیێ دا.
ڕاپۆرت ب سه‌ردێرا “ترکیا ویه‌که‌م جه‌رباندنا حکومه‌تا کازمی” هاتیه به‌لاڤ کرن و به‌حسا دلگرانیا ترکیێ دکه به‌رانبه‌ر ب حکومه‌تا نوو یا عیراقێ. د ده‌ستپێکا ڕاپۆرتێ دا به‌حسا وان هه‌ولان دکه کو د ده‌مێن ده‌رباسبوویی دا ترکیێ خوه‌ستیه هه‌لوه‌ستا مسته‌فا کازمی سه‌رۆکوەزیرێ نوو یێ عیراقێ ل ھەمبەر ترکیێ بزانە.
ئه‌ردۆگان ب ئێریشێن ئارتێشا ترکیێ هه‌لوه‌ستا کازمی دجه‌ربینه
مالپەرا ئەھوال د راپۆرتا خوە دا دنڤیسە کو هاکان فیدان سه‌رۆکێ هه‌والگریا ترکیێ ب نهێنی سه‌ردانا عیراقێ کریه و ب په‌یوه‌ندیێن خوه یێن که‌ڤن وه‌کی ده‌رفه‌ت دیتیه و خوه‌ستیه د گه‌ل مسته‌فا کازمی بپه‌یڤه. ژ به‌ر کو مسته‌فا کازمی ژی به‌رێ سه‌رۆکێ هه‌والگریا عيراقێ بوو و په‌یوه‌ندی د گه‌ل ھەڤپیشەیێ خوە یێ ترکی هه‌بوو. ئه‌هوال دبێژه عیراق و ترکیێ ب فه‌رمی به‌حسا وێ سه‌ردانا هاکان فیدان نه‌کریه.
ژ بلی وێ سه‌ردانا فیدان، ل گۆر مالپەرا ناڤبۆری، ھەر ژ ده‌ستبکاربوونا کازمی، ترکیێ هه‌ولدایه کازمی ژ بۆ ئالیێ خوە ڕابکێشە. ژ بۆ وێ یه‌کێ ژی ئه‌ردۆگان ڕاسته ڕاست د گه‌ل ده‌ستبکاربوونا کازمی په‌یوه‌ندی پێڤه کریه و پاشێ ژی به‌رپرسێن وه‌زاره‌تا ده‌رڤه‌یا ترکیێ و فاتیه یلدز بالیۆزێ ترکیێ ل عیراقێ سه‌ردانا کازمی کرنه.
ترکیێ چه‌ند ئارمانجه‌ک ژ ڕاکێشانا کازمی ژ بۆ ئالیێ تركیێ ھەبوون: یه‌که‌م: ھنارتنا به‌رهه‌مێن ترکیێ ژ بۆ عیراقێ به‌رده‌وام بە کو سالانه دگهه 20 ملیار دۆلاران. ژ بلی وێ ژی ترکیا دخوازه د ئۆپه‌راسیۆنێن دژی پەکەکێ دا به‌رده‌وام بە، ڕاپۆرتێ بالکشاندیه سەر زالەك دن كو ئەو ژی سه‌ردانا مه‌زلووم عه‌بدی سه‌رۆکێ هێزێن سووریا ده‌مۆکرات (ھەسەدە) یا بۆ عیراقێ یه. ڕاپۆرت دبێژه كو ترکیێ ب وێ یه‌کێ دلگرانه کو ئالیێن کوردی یێن سووریێ نێزیکی هه‌ڤ دبن و عیراق ژی په‌یوه‌ندی د گه‌ل هەسەدە دا هه‌یه.
مالپەرا ئەھوال د راپۆرتا خوە دا چه‌ندین جاران دووپات دکه كو ئارمانجا سەرەكی یا ئێریشا لەسشەكرێ تركیێ یا چەند رۆژێن بووری بۆ سەر چه‌کدارێن پەکەکێ نه‌بوویه، لێ ئارمانج ژێ جه‌رباندنا حکومه‌تا نوو یا عیراقێ بوویه. ب تایبه‌تی کو وێ حکومه‌تێ ڕه‌د کریه كو په‌یوه‌ندیێن ئابۆری وه‌کی به‌رێ دگەل تركیێ مسوگەر و به‌رده‌وام بن. ھەروەسا عیراقێ ب فه‌رمی نه‌رازیبوونا خوه ل سه‌ر ئێریشا ڕۆژا یه‌کشه‌ما ده‌رباسبوویی یا ترکیێ ل سه‌ر باره‌گه‌هێن پەکەکێ ده‌ربریه.
ترکیا ژ نێزیکبوونا سعودیێ و عیراقێ دلگرانه
د چه‌ند سالێن ده‌رباسبوویی دا ترکیێ گرینگیه‌کا مه‌زن ب عیراقێ دایه، ئەگەرا سه‌ره‌کی ژی په‌یوه‌ندیا ئابۆری بوویه، ژ بلی وێ ژی چه‌ندین جاران پرسگرێك د ناڤبه‌را حکومه‌تا عیراق و ترکیێ دا دروست بوونه، ب تایبه‌تی ل سه‌ر وان به‌نداڤێن کو ب ناڤێ “لیسو” ترکیێ ل سه‌ر ڕووبارێ دیجله دروست کریه و ل هاڤینا 2018ێ ئاڤ ل سه‌ر عیراقێ گرتیه و زیانه‌کا ئابۆری یا مه‌زن گەهاندیه عیراقێ.
لێ به‌لێ ئه‌ڤ ل سه‌رده‌ما حکومه‌تێن به‌رێ بوو، نها نایێ زانین هه‌لوه‌ستا حکومه‌تا نوو ل به‌رانبه‌ر ترکیێ چ دبە کو ل حه‌فت مه‌هێن ده‌رباسبوویی ده‌ستبکار بوویه، ژ بلی وێ ژی ئه‌ڤ حکومه‌ت د پەیامێن خوە دا تەئكیدێ سەر سەربخوەییا عیراق و سەیاسەتا وێ یا دەرڤە دكە.
ئه‌ردۆگان چما ژ مسته‌فا کازمی دترسێ؟
ئه‌ڤه پرسیارا ڕۆژنامه‌یا “ئه‌هوال” یا ترکی یه و دو ئەگەرێن سەرەكی دیار دكە كو ئەردوگان ژ كازمی دترسە: ڕاپۆرت دبێژه كو ترکیا ژ وێ یەكێ دترسە عیراق هه‌لوه‌سته‌کا یه‌ک ئالیکه‌ر ل به‌رانبه‌ر له‌شکه‌رکێشیا ترکیێ دا هه‌بە و ب تایبه‌تی ئه‌گه‌ر ئه‌و هه‌لوه‌ست د وارێ په‌یوه‌ندیا بازرگانی دا بە. ژ به‌ر کو ترکیا بازاره‌کێ مه‌زن یێ به‌رهه‌مێن خوه ژ ده‌ست دده.
ئەگرەك دن ژی ئەوە كو مسته‌فا کازمی د گه‌ل ده‌ستبکاربوونێ هه‌ول دده نێزیکی سعودیێ ببە، بڤێ یەكێ ژی عیراق دكەڤ به‌ە ناڤ بەریێ سعودیێ و مسرێ کو ئه‌و ژی ل دژی به‌رژه‌وه‌ندیێن ترکیێ کار دکن. ب ڤێ یه‌کێ ژی ترکیه نه‌یاره‌که دن ل باشوور ژ بۆ خوه چێدکه.
