ئه‌م کورد مله‌ته‌کێ وه‌ها نه کو نکارن ڕاستیا خوه ببینن لێ ئه‌م ڕاستیا هه‌می مله‌تێن ل ڤێ جیهانێ دژین، دبینن، دزانێن شروڤه‌یێن خوه ل سه‌ر وان دکن. لێ مخابن ئه‌م نکارن ڤێ ژ بۆنا خوه بێژن، ببینن و شرۆڤه بکن.
ئه‌م کورد مله‌ته‌کی وه‌ها نه کو ڕێیا ئه‌م تێرا دچن، ئه‌م دزانن خەفك ل به‌ر مه ڤه‌کرینه و دکه‌ڤن وێ خەفكێ. لێ دیسا ئه‌م هه‌ر دخوازن د وێ ڕێیێ را هه‌رن. لۆما ئه‌م ب سه‌ر ناکه‌ڤن.
ئه‌م کورد مله‌ته‌کی وه‌ها نه کو ئه‌م تم به‌حسا باشیێن هندەك ڕه‌وشه‌نبیرێن داگیرکه‌رێن خوه دکن و ب زمانێ وان به‌رهه‌مێن خوه دئافرینن. لێ ئه‌م نکارن به‌حسا یێن خوه بکن، پەسنێن وان بكن دا کو پتر ژ بۆنا گه‌لێ خوه کار و خه‌باتێ بکن و به‌رهه‌مێن خوه ب زمانێ خوه بئافرینن. لێ ئه‌م وان نابینن ژ به‌ر چاڤێن مه ژ بۆنا مه کور بوونه.
ئه‌م کورد مله‌ته‌کی وه‌ها نه کو ئه‌م فێم ناکن و ئه‌م نکارن تشتێن باش و خه‌راب یێن پارتیێن کوردستانی ببینن وان و یێن دگیرکه‌ران و هه‌ڤالبه‌ندێن وان ژ هه‌ڤ جوودا بکن.
ئه‌م کورد مله‌ته‌کی وه‌ها نه کو ئێدی نه‌ما دکارن باشی و شاشیان ژ هه‌ڤ جوودا بکن. نکارن و نابینن بێ دۆست و دژمن کی نه؟
ئه‌م کورد مله‌ته‌کی وه‌ها نه کو پارتی و ڕێخستنێن قاشۆ ژ بۆنا ئازادی و سه‌رخوه‌بوونا کوردستانێ هاتنه دامه‌زراندن ببینن. لۆما ئه‌م وان هه‌میان د یه‌ک مێزینێ ده دنرخیننن. ژ به‌ر ڤێ ئه‌م نکارن ببینن بێ سه‌رۆک و هندەك ژ ڕێبه‌رێن پارتیان، بێ وان چاوا ژ بۆنا به‌رژه‌وه‌ندیا خوه و مالباتا خوه ب کار تینن.
ئه‌م کورد مله‌ته‌کی وه‌ها نه کو نکارن و ناخوازن ده‌ڤ ژ زمانێ داگیرکه‌رێن خوه به‌ردن کو ئه‌و ب وی زمانی مه ددن کوشتن و ژناڤ دبن. ئه‌م فێم ناکن کو زمان هه‌بوونه. ئه‌م وێ هه‌بوونێ ب ده‌ستێن خوه دکوژن.
ئه‌م کورد مله‌ته‌کی وه‌ها نه کو داگیرکه‌رێن مه چقاسی تەعدا و ئێشکه‌نجه ل مه دکن ئه‌م پتر دبن حه‌زکەرێن وان. ناڤێ مه‌زنێن وان ل زارۆکێن خوه دکن.
ئه‌م کورد مله‌ته‌کی وه‌ها نه کو ئه‌ندامێن پارتیێن سیاسی بوونه مریدێن سه‌رۆک و ڕێڤه‌برن خوه. ب ڤێ هه‌لوه‌ستێ مه ڕێ دایه وان سه‌رۆکان کو چ دخوازن وێ دکن. له‌ورا ڕه‌خنه‌کرنا وان هاتیه قه‌ده‌خه‌کرن.
ئه‌م کورد مله‌ته‌کی وه‌ها نه کو ده‌ما تو ڕه‌خنه‌یه‌کێ ل سه‌رۆک و ڕێڤه‌برێن پارتیان دکه، یه‌ک سه‌ر ئه‌ندامێن وان کو هه‌ڤالێ ته نه، دۆستێ ته‌نه، مرۆڤێن ته‌نه، ئێریشێ تینه سه‌ر ته کو تو ده‌نگێ خوه ده‌رنه‌خی. لۆما سه‌رۆکێن مه ژی ل گۆر کێفا خوه ڕێخستنێ ب کار تینن.
ئه‌م کورد مله‌ته‌کی وه‌ها نه کو وه‌لاتێ مه ژ ته‌ره‌ف داگیرکه‌ران، وێران بوویه و دبه، زمانێ مه نه‌هشتنه، عاده‌تێن مه ڕاکرنه، هێشتا ژی هندەك پارتیێن مه دبێژن؛ ئه‌م ب سه‌ر که‌تنه و به‌حسا براتیا گه‌لان دکن.
ئه‌م کورد مله‌ته‌کی وه‌ها نه کو ب سه‌دان سالن ئه‌م به‌عسا یه‌کیتیێ دکن. لێ مخابن هه‌ر کو دچە ئه‌م پتر پارچه دبن. لێ ئه‌م نکارن ل گه‌ل هه‌ڤ و ب هه‌ڤره ڤێ چاره‌سه‌ر بکن.
ئه‌م کورد مله‌ته‌کی وه‌ها نه کو مه ئه‌وقاسی به‌ده‌ل دایه، ب هه‌زاران خه‌لکێ مه جانگۆری بوونه، هاتنه دارڤه‌کرن، کۆچبه‌ر بوونه. لێ هێشتا ژی ئه‌م نه‌بوونە خوه‌دیێ خوه و سه‌رۆکه‌کی کو کێشه‌یا کورد ل باکورێ کوردستانێ چاره‌سه‌ر بکه.
ئه‌م کورد مله‌ته‌کی وه‌ها نه کو هه‌تا نها گه‌له‌ک شۆره‌شێن مه یێن ژ بۆنا ئازادی و سه‌رخوه‌بوونا کوردستانێ ب ده‌ستێ هندەك کوردێن دن تێک چوونه. لێ مخابن هێشتا ژی مه ده‌رسه‌ک ژ ڤێ نه‌گرتیه.
ئه‌م کورد مله‌ته‌کی وه‌ها نه کو هێشتا ئه‌م نه‌بوونە نه‌ته‌وه‌یی. ده‌ما هزرا نه‌ته‌وایه‌تیێ ب مه کوردان ڕه کێم به، ئه‌م نکارن به‌رژه‌وه‌ندیا گه‌لێ خوه بدن سه‌ر یا خوه. لۆما هه‌تا ئه‌م به‌رژه‌وه‌ندیا خوه د سه‌ر یا گه‌لێ خوه ڕه بگرن ئه‌م ئێ زوو ب زوو نکاربن خوه ئازاد بکن.
ئه‌م کورد مله‌ته‌کی وه‌ها نه کو نکارن که‌سێن دلسۆزێن وه‌لاتێ خوه و که‌سێن دلسۆزێن خوه و مالباتێن خوه ژ هه‌ڤ جوودا بکن و ل گۆر وێ ته‌ڤبگه‌رن و ببن خوه‌دی هه‌لوه‌ست…
ئه‌م کورد مله‌ته‌کی وه‌ها نه کو داگیرکه‌رێن خوه دکن ڕێبه‌ر و سه‌رۆکێن خوه. لێ ئه‌م تێناگەھن کو ئەو دێ چ جاران نه ژ بۆنا مه، لێ وێ هه‌ر ژ بۆنا گه‌لێ خوه ته‌ڤبگه‌رن.
بووبێ ئه‌سه‌ر
2019.10.25
