ڕه‌وشا ڕۆژاڤایێ کوردستانێ به‌ر ب کووڤه دچه باش ناھێتە زانین و نرخاندنێن ل سه‌ر ڕه‌وشا هه‌یە تێنه کرن ژی پرانی ژ سیاسه‌تا ل سه‌ر عه‌ردێ دوورن و نه سه‌راستن. هێزێن ڕژێمێ ب ھاریكاریا ڕوسیایێ بەر ب پێش دچە و گه‌له‌ک دەڤەر كۆنترۆل كرنە. ئەمریکا د گه‌ل ھێزێن سوریا دەمۆكراتیك (هەسەدە) هنده‌ک ده‌ڤه‌رێن سوریێ و ڕۆژاڤایێ کوردستانێ کۆنترۆل دکه. ترکیه خالێن گه‌له‌ک ستراته‌ژیک ڤه‌گرتنه و دخوازه باندۆرا خوه زێده‌تر بکه. ڕوسیا د گه‌ل ڕژێمێ ته‌ڤدگه‌ره. د ڤێ ڕه‌وشێ دا گه‌ره‌ک کورد چ بکن؟
به‌ری هه‌ر تشته‌کی دڤێ د ناڤا ته‌ڤگه‌را کوردان دا یه‌کێتیه‌ک و یەكدەنگیەك چێ ببە . گه‌له‌ک جارا به‌حسا ڤێ یه‌کێتیێ دھێتە کرن، د بن چاڤدێریا سه‌رۆک بارزانی دا ۳ په‌یمان د ناڤا ته‌ڤ ده‌م و ئەنجومەنا نشتمانیا كوردێن سوریێ (ئەنەکەسە) دا هاتنه ئیمزا کرن. لێ یه‌ک ژ وان ژی نەكەتە وارێ پراكتیكێ د، ژبەروێ هه‌لوه‌ستا پارتیا كاركەرێن كوردستانێ (پەكەكە) یا نه ڕاست كو ب سەرێ خوە ب تەنێ ل رۆژاڤایێ كوردستانێ د مەشینە ئەو رێكەفتن ل سەر عەردی بێ باندۆر مان.
ئیرۆ ڕه‌وش ل رۆژاڤایێ كوردستانێ هنده‌ک جودایه، ئەمرکا ڤه‌کری دخوازه پارتیا یەكێتیا دەمۆكراتیك (پەیەدە) و هەسەدە ژ قه‌ندل دوور بکه‌ڤن و سیاسه‌ته‌ک دن دووری سیاسەتا پەكەكێ بدن پێشیا خوە. هەسەدێ د ڤێ ده‌ربارێ دا هنده‌ک گاڤ ئاڤێتنه. ژ بۆ یه‌کێتیه‌کی د ناڤا ته‌ڤگه‌را کورد دا فه‌رماندارێ گشتیێ هەسەدێ مەزلوم کۆبانی هنده‌ک داخوویانیێن ئه‌رێنی دانە و دده، هه‌روه‌ها به‌رسڤا داخوازیێن ئه‌نەکەسێ ژی دده. کۆبانی د داخوویانیه‌کێ دا به‌حەسا گرتییێن ئه‌نکەسێ دکه و دبێژه چ ئاسته‌نگی د ڕێیا ڤه‌کرنا ئۆفیسێن ئه‌نەکەسێ دا نه‌مایه.
ئه‌نەکەسە ژی دڤێ به‌رسڤا مەزلوم کۆبانی ب ئه‌رێنی بده و د ڤێ ده‌ربارێ دا هنده‌ک گاڤا پاڤێژه. ئه‌گه‌ر ئه‌نەکەسە ڤێ یه‌کێ نه‌کە دێ بکه‌ڤه د ناڤا شاشیەك سیاسی دا.
ژ بۆنا كو ل ڕۆژاڤایێ کوردستانێ د ناڤا ته‌ڤگه‌را کورد دا یه‌کێتیه‌کا راستەوینە بھێتە ئاڤاکرن، دڤێ پەیەدە، هەسەدە و هێز و ئالیێن ب وان ڤه گرێدایی وه‌سایه‌تا پەکەکێ قه‌بوول نه‌کن و ژ بۆ به‌رژه‌وه‌ندیێن ڕۆژاڤایێ کوردستانێ ته‌ڤبگه‌رن.
هه‌روه‌ها ئه‌نەکسە ژی ژ بۆنا پێكھاتنا یەكێتیەكێ د ناڤ تەڤگەرا كوردی دا ل رۆژاڤایێ كوردستانێ دڤێ ب ئه‌رێنی و گاڤێن بوێرەك باڤێژه. دیارە کو د ئالیه‌کی دا باندۆرا ترکیێ ل سه‌ر هنده‌ک ئه‌ندامێن ئه‌نەکەسێ هه‌یه و ئه‌و که‌س ل گۆرا داخوازیا ترکیێ ژی ته‌ڤدگه‌رن. نابه ڕێڤه‌به‌ریا ئه‌نەکەسێ ڕێ بده ڤان که‌سان و هه‌تا پێوسته وان ژ ده‌ستهلاتداریێ دوور بێخه. پێوه‌ندی د گه‌ل وه‌لاته‌کی تشته‌که، لێ ب ته‌مامی ل گۆرا داخوازیێن وان ته‌ڤگه‌ربگەرن تشته‌ک دنه.
ده‌ما مرۆڤ به‌حسا یه‌کێتیێ بکه پێوسته مه‌رجێن هه‌یین به‌رب چاڤ بگره و ڕاستیه‌کێ ده‌ستنیشان بکه. نابه ته‌نێ هه‌ما بێژن دڤێ یه‌کێتی ئاڤاببە. هه‌ر ئالیێ به‌ھسا یه‌کێتیێ بکه، دڤێ پرۆژه‌یا خوه ژی ب زه‌لالی ئاشکه‌ره بکه.
د ڤێ پێڤاژۆیێ دا به‌رپرسیاریا هه‌ری مه‌زن دکه‌ڤه ل سه‌ر ملێ ئه‌نەکەسێ. دڤێ ئه‌نەکەسە ڤێ به‌رپرسیاریا خوه ب جهبینه و هێشتا چالاکتر پرسا یه‌کتیێ بنرخینه و د ناڤا خوە دا ئاسته‌نگێن هه‌نە ژ هۆلێ ڕاکه.
2020.01.29
ئەنالیز/ ن.فرات
