نڤیسار

ئه‌ڤ ده‌ستپێکه‌که‌ ژ بۆنا پەکەکێ

بووبێ ئه‌سه‌ر

ژ هه‌ر ده‌ستپێکه‌کێ ڕا دیماھیك و ژ هه‌ر  دیماھیكێ ڕا ژی ده‌ستپێکه‌ک هه‌یه‌.  گه‌له‌ک ژ مه‌، ئه‌م بوونە شاهدێ وێ یه‌کێ کو دیکتاتۆری، کینداری و مالوێرانکرن هه‌تا هه‌تایێ بەردەوام  ناکه‌.

لۆما ژی هه‌ر ده‌ستپێکه‌ک دیماھیكا وێ هه‌یه‌. ڤیجار ئه‌و دیماھیك دێ چەوا به‌، ب چ ڕه‌نگ و ئاوایی بمه‌شه‌ گرێدایی جڤاکێ یه‌.

دیسا ئه‌م بوونه‌ شاهدێ وێ یه‌کێ کو هلوه‌شاندنا سازوومانا دیکتاتۆران ژ ناڤا خوه‌ دا ده‌ست پێ دکه‌ و داوی لێ هاتیه‌ و تێ. باوه‌ریا من ئه‌وه‌ کو وێ دیماھیكا پەكەكێ  ژی وه‌ها به‌. لۆما من گۆت ئه‌ڤ ده‌ستپێکه‌که‌…

دیکتاتۆری نه‌ هه‌تا هه‌تایی یه‌. ڕۆژا وان ژی دێ ھێت و وه‌که‌ تو نۆکا ل که‌ڤری دایی پارچه‌ پارچه‌ دبه‌. ئه‌و پارچه‌بوون  نووژه‌نیه‌کێ و یه‌کێتیه‌کا خورت، ل سه‌ر هیمێ پاراستن و ئازادیا وەلات  ب خوه‌ ڕا دئینە تینه‌.

هه‌ر وه‌ها هه‌ر پارتی و ڕێخستنا دکتاتۆر ژی نه‌ هه‌تا هه‌تایێ یه‌. ئه‌و پرانی ب ده‌ستێ سه‌رده‌ستێن خوه‌دیێ خوه‌ تێنه‌ دامه‌زراندن دا کو ل گۆر به‌رژه‌وه‌ندیا وان کار و خه‌باتێ بکه‌ن. هه‌تا نها پەكەكێ  ژی ئه‌و کری یه‌.

ل گۆر ڤێ ژی داگیرکه‌رێن مه‌ تم لێ خه‌بتینه‌ دا کو هێزەكا خورت یا کوردان چێنه‌به‌. ژ بۆنا ڤێ ژی تم کار کرنه‌ و د گه‌له‌ک واران دا ب سه‌ر ژی که‌تنه‌. لێ وه‌که‌ مه‌ گۆت هه‌ر تشت چو جاران نه‌ هه‌تا هه‌تا یێ یه‌.

ده‌ما داگیرکه‌ران دیتین کو ته‌ڤگه‌را وه‌لاتپارێزان ل باکورێ کوردستانێ ڕۆژ ب ڕۆژ خورت دبه‌، ب هێز دبه‌ و دبه‌ خوه‌دی قوه‌ته‌کا بێ هه‌مپا. ئها وێ ده‌مێ، ئەو ژ نووڤە دفکرن و فکرین کو چاوا ڤێ تێک ببن.

له‌ورا ژی ئه‌ڤ نه‌هات حه‌سابێ داگیرکه‌رێن ترک وه‌که‌ باڤ و کالێن خوه‌ کرن و ڕێخستنه‌ک ژ کوردان و ل سه‌ر ناڤێ وان دامه‌زراندن دا کو ب ڕێیا وێ پێشیێ ل ته‌ڤگه‌را ئازادیخواز بگرن. هه‌ر وه‌ها ژی کرن و د گه‌له‌ک واران دا ب سه‌ر ژی که‌تن.

لۆما د وێ که‌لا که‌لا گه‌رما ته‌ڤگه‌رێن وه‌لاتپارێز گه‌ش و خورت دببوون (1960-1980) کاربده‌ستێن ترکان ژی د ناڤا وێ که‌له‌ که‌لێ دا پەكەكە  دامه‌زراندن، دا کو وێ پێلا وه‌لاتپارێز بشکێنه‌. هه‌ر وه‌ها ژی بوو. لێ نه‌ ب گه‌له‌مپه‌ری.

مه‌ گه‌له‌ک جاران ئه‌ڤ مژار نڤیسی یه‌ و گۆتیه‌. لۆما هه‌وجه‌ ناکه‌ ئه‌م دیسا ل تشتێن به‌رێ ڤه‌گه‌رن. لۆما من خوه‌ست بێژم کو ژ پەكەكێ  ڤه‌قه‌تاندنا به‌رپرسێ مەزن ئۆزگور ژیاندا ل گۆر من ده‌ستپێکا هلوه‌شاندن و داویئانینا پەكەكێ  یە.

هه‌تا نها نه‌ د ناڤا پەكەكێ  دا و نه‌ ژی ژ ده‌رڤەیی وان چقاسی کار و خه‌بات هاتبه‌ کرن ژی مه‌ نکاری بوو، وێ هلوه‌شینن و ڕووچکێ وێ یا ڕاست کو خزمه‌تکارێ داگرکه‌رانه‌، ده‌رخن هۆلێ.

ژ به‌ر کو د ده‌ما شه‌ر و په‌ڤچوونان ده‌ تو نکاری ڕاستیێ بێژی، ته‌ گۆت ژی نایێ دیتن و خوه‌ندن. له‌ورا ئه‌و ڕاستیا د ناڤا گوڵه‌یێن ژ بۆنا نەھێلانا کوردان دا دهاتن ته‌قاندن، زه‌همه‌ت بوو کو تو ڕاستیێ ب نه‌زانان بده‌ی زانین و قه‌بوولکرن.

ترکان ڕه‌وشا خورتبوونا ته‌ڤگه‌را کورد ل باکورێ کوردستانێ باش فێمکربوون لۆما وان ب ڤێ زانه‌بوونا خوه‌،   ڕێخستنا خوه‌ یا ب ناڤێ پەكەكێ  باش ب کار ئانین. نه‌هشتن و مه‌جال نه‌دان ئه‌ندامێن پەكەكێ  دا کو بکاربن بفکرن و ڕاستیێ ببینن.

لێ چ دبه‌ بلا ببه‌، داویئانینا ده‌وله‌ت، پارتی و که‌سێن خوه‌دی قوه‌ت و یێن دیکتاتۆر ژی ب ده‌ستپێکا ژ هه‌ڤکه‌تنا د ناڤا خوه‌ دا ده‌ست پێ دکه‌.

ئیرۆ ئه‌م پر ب ڕه‌حه‌تی دکارن ئێدی ڤێ د ناڤا پەكەكێ  دا ژی ببینن. لۆما ڤه‌قه‌تاندن وئاشکه‌ره‌ کرنا بوویه‌ر و کریارێن پەكەكێ  ئێدی تێنه‌ قه‌بوولکرن و دیتن.

ژ به‌ر ڤێ ئه‌ز دبێژم؛ ڤه‌قه‌تاندنا ئۆزگور ژیاندا ژ پەكەكێ  وێ ببه‌ ده‌ستپێکه‌ک دا کو ئێدی ئه‌م   ببینن كا دێ چەوا ئه‌ڤ ڕێخستنا دیکتاتۆر و یا ل سه‌ر ده‌ستێ داگیرکه‌ران، ژ بۆنا چنەكرنا کوردان هاتبوو دامه‌زراندنێ، تێک هه‌ره‌.

ئێدی داویا پەكەكێ  تێ دیتن. ژ به‌ر کو هلوه‌شاندنا ئاڤاهیه‌کێ ب کشاندنا که‌ڤره‌کی ژ ئەساسێ وێ ده‌ست پێ دبه‌. ئێدی پەكەكە  چو شه‌رێ بکه‌ نه‌مایه‌. یان دێ ئێریشی باشوورێ کوردستانێ بکه‌ و پێشمێرگه‌ یێن قه‌هره‌مان بکوژە یان دێ ژ نوودا ل کوشتنا ناڤا خوه‌ دا ڤه‌گه‌ره‌ و ده‌ست پێ بکه‌.

ژ بۆنا زارۆکێن مه‌ یێن د ناڤا پەكەكێ  دا نه‌یێن کوشتن، دڤێ مالباتێن زارۆکێن وان گه‌ریلان، پێویسته‌ ده‌ست ب خوه‌پێشاندانان بکن، سه‌مینه‌ر و کۆنفه‌رانسان ل دار بخن دا کو بکاربن زارۆکێن خوه‌ ژ ناڤا وی ئاشێ کوردان دهێره‌، خلاس بکن.

دڤێ ئه‌و گه‌ریلا یێن دوروست کو ژ بۆنا ئازادیا مله‌تێ خوه‌ ته‌ڤلی وێ ڕێخستنا کورد کوژ بوو بوون، مه‌جال دیتن ژێ بره‌ڤن و بکه‌ڤن ناڤا هێزا پێشمێرگه‌یان. هه‌گه‌ر ڤێ نه‌کن وێ گه‌له‌ک ژ وان بێنه‌ کوشتن. تالیا تالی ژی دێ وانێن ل قەندیلێ (ترکیه‌ و ئران) ڕوونشتنه‌ ب ئۆپه‌راسیۆنه‌کێ دێ هه‌رن ترکیێ دەڤ خوه‌دی و خالانێن خوه‌.

دڤێ مه‌دیایا کوردی ب گه‌له‌مپه‌ری وه‌که‌ کەمپانیایه‌کێ ده‌ست ب ئاشکه‌ره‌کرنا کریار، بوویه‌ر و خرابیێن پەكەكێ ژ خه‌لکێ ڕا ئاشکه‌ره‌ بکن.

د ڤێ ده‌رهه‌قێ دا ئەرشیڤه‌کا مه‌زن د ده‌ستێ پارتی و ڕێڤه‌برێن باشوورێ کوردستانێ ده‌ هه‌یه‌، دڤێ ئه‌و ژی ئێدی ده‌ست پێ بکن وانا ژ ڕایا گشتی ڕا ئاشکه‌ره‌ بکن دا کو گه‌ریلا و خه‌لک ژی ئێدی ڕاستیێ ب چاڤێن خوه‌ ببینن و ب گوهێن خوه‌ ببهیزن…

ل گۆر من ژ پەكەكێ ڤه‌قه‌تاندنا  ئۆزگور ژیاندا ده‌ستپێکا هلوه‌شاندنا وێ ب خوه‌ یه‌. ئه‌م دێ گوهدار بن و بشۆپینن

Back to top button