ئه‌ڤ شه‌رێ بێ ئارمانج حه‌تا که‌نگی به‌رده‌وام به‌

شه‌ره‌ک کۆر د ناڤبه‌را هێزێن ئه‌وله‌هیا ترکیێ و چه‌کدارێن پککێ ده‌ به‌رده‌وامه‌. ترکیه‌ د ڤان ده‌مێن داوی ده‌ ل گه‌له‌ک ده‌ڤه‌ران ل همبه‌ر پککێ ئۆپه‌راسیۆنا دکه‌. وه‌زاره‌تا به‌رگریێ و وه‌زاره‌تا ناڤخوه‌ یا ترکیێ گه‌له‌ک داخویانیا د ده‌ربارێ ڤان ئۆپه‌راسیۆنان ده‌ ددن. داخوویانیێن ترکیێ د ڤێ ده‌ربارێ ده‌ چقاس ڕاستن نایێ زانین.

لێ تێ خویا كرن کو پکک ژ هێزا خوه‌ ڕۆژ ب ڕۆژ دکه‌ڤه‌ و ئۆپه‌راسیۆنێن ڤان داویان باندۆره‌ک مه‌زن ل پککێ کریه‌. هه‌ری داوی وه‌زیرێ ناڤخوه‌ یێ ترکیێ دا خویاکرن کو، هێدی جوان وه‌ک به‌رێ ته‌ڤلی پککێ نابن و ناچن سه‌رێ چیا. وه‌زیرێ ناڤخوه‌ دبێژه‌ : ئیسال ته‌نێ 95 که‌س ته‌ڤلی پککێ بوونه‌ و چوونه‌ سه‌رێ چیا ، لێ سالا 2015 ێ ئه‌ڤ هێژمار 3881 که‌س بوو.

هه‌روه‌ها سوله‌یمان سۆیلو دبێژه‌: سالا 2018 ێ 349 چه‌کدارێن پککێ ژ ده‌ڤ پککێ به‌ردانا و خوه‌ ڕاده‌ستی هێزێن ئه‌وله‌هیا ترکیێ کرنه‌. ژ ڤان 146 ب ڕێیا کو قانع بوونه‌ هاتنه‌ و ته‌سلیم بوونه‌.

ل همبه‌ر ڤان داخویانیێن ترکیێ، پکک دده‌ خویاکرن کو، ل هنده‌ک ده‌ڤه‌ران ئێریشێ ئارتێشا ترکی کرنه‌ و هژمارا کوشتیان ژ رایا گشتی رە دده‌.

د ڕاسییا خوه‌ ده‌ ئه‌ڤ شه‌ره‌ک کۆره‌ و باندۆره‌ک گه‌له‌ک نه‌رێنی ل کوردێن باکور دکه‌. دێ ئه‌ڤ شه‌رێ بێ ئارمانج حه‌تا که‌نگی به‌رده‌وام به‌ نایێ زانین. لێ تشته‌ک هه‌یه‌ کو ل سه‌ر ڤی شه‌ری بازرگانێن چێبوونه‌ و هه‌تا به‌رژه‌وه‌ندیێن بازرگانێن شه‌ر هه‌بن دێ ئه‌ڤ مالوێرانی به‌رده‌وام به‌.