پەرلامه‌نته‌رێ ڕحایێ یێ ده‌م پارتییێ و برازیێ ئەبدولا ئۆجەلان، ئۆمه‌ر ئۆجەلان د پەرله‌مه‌نتۆیا ترکیێ دا بەحسا ناڤه‌رۆکا هه‌ڤدیتنا خوه و ئۆجالان کر.
ئۆمه‌ر ئۆجەلان دەربارێ هەڤدیتنا خوە یا ب ئۆجەلان را گۆت: ئەبدۆلا ئۆجەلان د هه‌ڤدیتنێ دا تفاقێن کورد-ترکان ژ سوولتان سه‌نجه‌ر هه‌تا ب مه‌لیکشاه، ژ ئیدریسی بیتلیسی هه‌تا یاڤووز سه‌لیم، ژ ئەبدولحامید خان هه‌تا مستافا که‌مال تێکلیێن کورد-ترکان نرخاندن و گۆت: کورد و ترک چاوا ب هه‌ڤ را گهەشتنه ڤێ قۆناغێ. تفاق، تێکلی و پرسگرێکێن ده‌م ب ده‌م ڕوو ددن ب ئاشکه‌ره نرخاند. پێشنیارێن خوه یێن چاره‌سه‌ریێ هه‌بوون. ل گه‌ل ڤێ یه‌کێ گۆت، ‘ئه‌م دکارن ڤێ پرسگرێکێ ب دیالۆگێ چاره‌سه‌ر بکن.”
ئۆمه‌ر گۆت کو، ئۆجەلان گۆتیه:”یا ڕاست مه دکاری بوو سالا ۲۰۰۰ێ ئه‌ڤ پرسگرێک چاره‌سه‌ر بکرا. سالا ۱۹۹۹ان ژی من گۆت، ئه‌ز دێ خزمه‌تێ ژ چاره‌سه‌ریا مه‌سه‌له‌یا کورد-ترک را بکم. د سالا ۲۰۰۰ّێ دا ژی من گۆت، نها ژی دبێژم. لێ به‌لێ مژار به‌ر ب ئالیه‌کی جودا ڤه کشاندن. گۆتن، ‘ئاپۆ ژ بۆ خوه ڕزگار بکه ڤێ یه‌کێ دکه. ئه‌م هین ژی ل نوقته‌یا هاتنه، هین ژی مه‌سه‌له‌یا ل پەرلامه‌نتێ تێ ئاخافتن ئه‌ڤه. سال ۲۰۲٤ێ هین ژی شه‌ره، نه‌چاره‌سه‌ری یه.”
ئۆمه‌ر ئۆجالان گۆت: که‌یفا ئۆجەلان خوه‌ش بوو، ب هێز بوو، هایا وی باش ژ ڕۆژه‌ڤێ هه‌بوو و ب ئاشکه‌ره‌یی گۆت، ئه‌و ئاماده یه د مژارا چاره‌سه‌ریێ دا ئینیسیاتیفێ ل خوه بگره. ئۆمه‌ر ئۆجەلان، وها پێ دا چوو: ” ئۆجەلان گۆت؛ ‘بێگومان ده‌ما ئه‌م د په‌یامێن خوه دا قالا شه‌رت و مه‌رجان دکن، ئه‌ز قالا شه‌رت و مه‌رجێن ژ بۆ شه‌خسێ خوه ناکم. ئه‌ز ژ بۆ شه‌رت و مه‌رجێن شه‌خسی نابێژم؛ ئه‌ز ژ بۆ ئاماده‌کرنا زه‌مینا چاره‌سه‌ریێ دبێژم. هنده‌ک ڕۆژنامه‌ڤانێن خوه وه‌که ‘مه‌دیایا موخالفەت نیشان ددن گۆتنێن مانیپولاتیف دکن. هنده‌کان ژی قالا وه‌لاتێن سێیه‌مین کرن، هنده‌ک قالا وه‌لاتێن گارانتۆر و هنده‌ک ژی ل گۆری خوه نرخاندنێن جودا دکن. بێگومان مه‌دیایا ده‌ستهلاتداریێ ژی ژ هێلا خوه ڤه هه‌ول دا ڤێ هه‌ڤدیتنێ به‌ره‌ڤاژی بکه لێ مه‌سه‌له جدی یه. ل پێشیا مه پێڤاژۆیه‌کا دیرۆکی هه‌یه؛ ئه‌م دکارن ژ هێلا ئه‌رێنی ڤه، ژ هێلا پۆزەتیف ڤه ڤێ پێڤاژۆیێ ڤه‌گوهه‌رینن پێڤاژۆیه‌کا مه‌زن یا ئاشتیه‌کا ب ڕوومه‌ت. ژ خوه که‌سه‌ک ناخوازه پشتی وێ بفکره.”
ئۆمه‌ر ئۆجالان وها دۆماند: “بێگومان ل سه‌ر خه‌زه‌یێ ژی ئاخڤی، ل سه‌ر ڕۆژهلاتا ناڤین و ئیسرائیلێ ئاخافتن هاتن کرن. ده‌ر حه‌قێ کوردێن ل ئیراق، سووریێ و ئیرانێ نرخاندن کر. پێشنیارێن وی پێشنیارێن هه‌ری ماقوول بوون. حکومه‌تا ترکیێ ئان ژی ڕایه‌دارێن ترکیێ گه‌لۆ وێ ل به‌ر ڤێ مه‌سه‌له‌یێ بێن؟ گه‌لۆ وێ زه‌مینا ڤێ ئاماده بکن ئان نا؟ مه‌سه‌له هنده‌ک ژی د ڤر دا ختمی یه. بێگومان قالا ڕۆژاڤا کر. بوویه‌رێن ل سووریێ ژ نێز ڤه دشۆپینه. چه‌نده‌ک که‌نالێن ته‌له‌ڤیزیۆنێ دشۆپینه و ل ڕۆژه‌ڤا خوه سه‌روه‌خته.”
ئۆمه‌ر ئۆجلان د ئاخاڤتنا خوه دا گۆت: ئه‌م، د ناڤا سیاسه‌تا ده‌مۆکراتیک و د چارچۆڤه‌یا ده‌ستوورا بنگه‌هین دا سیاسه‌تێ دکن. ڕێخستنا وی ژی گۆت کو ئه‌و دێ هه‌تا داویێ ب بریارێن برێز ئۆجەلان را بن. لێ به‌لێ هنده‌ک ده‌ردۆر هه‌ول ددن ڕه‌وشێ ته‌ڤلهه‌ڤ بکن.”
تێبنیه‌ک: ژخوه ئه‌ڤ هه‌ڤدیتن د بن چاڤدێریا میتێ دا پێکهاتیه. بالکێشه کو پشتی ده‌مه‌ک درێژ به‌حسا ناڤه‌رۆکا ڤێ هه‌ڤدیتنێ ل پەرله‌مه‌نتۆیا ترکیێ دا دکه. ژ ئالیه‌ک دن دخوه‌یێ که‌یفا ئۆجەلان خوه‌شه و چو گازندا ژ ته‌جریتا کو پەکەکە ڕۆژانه ژ بۆ خوه‌پێشاندان دکه نینە. پێڤاژۆ زیزه و بانگا ئۆجەلان ژ بۆ پەکەکێ دێ گرنگ به. ده‌وله‌ت نها زه‌مینەیا ڤێ ئاماده دکه، لێ بوویه‌رێن سوریێ و ڕووخاندنا رژێما ئه‌سەد ئه‌ڤ پێڤاژۆ و ستراته‌ژیا ترکیێ د ده‌ربارێ ئۆجەلان دا پچه‌کی پاش کەت.
