ئینکارکرنا “نه‌ته‌و-ده‌وله‌ت”بوونا کوردان، دژده‌رکه‌تنا سه‌رخوه‌بوونا کوردستانێ، پاراستنا یه‌کده‌وله‌تبوون و یه‌کپارچەییا ترکییێ وه‌ک ڕێیا قه‌ده‌رێ دانینه به‌ر کوردان و کوردان ب ڤان ده‌ک و دۆلابان دخاپینن، ژ خه‌تا نه‌ته‌وی ب دوور دخن.
که‌مالیزمێ وه‌ک ئیدیۆلۆژییه‌ک هه‌ڤبه‌ش د مه‌ژییێ کوردان دا دکۆلن.
ب ڤی ئاوایی دخوازن کوردان ژ خه‌تا نه‌ته‌وی و نه‌ته‌وپه‌روه‌رییێ سار بکن و چاڤره‌شی بکن.
کوردێن کو ل نه‌ته‌وا خوه و سه‌رخوه‌بوونا وه‌لاتێ خوه خوه‌دی ده‌ردکه‌ڤن ژی ب تۆهمه‌تێن وه‌ک “نه‌ته‌وپه‌روه‌رێن پاشڤه‌روو” ب ناڤ دکن. ئه‌ڤ تۆهمه‌تێن سڤک و دووری ئاقلان ژی هه‌لبه‌ت ژ سه‌رێ کانییێ، ئانگۆ ژ ده‌لهیزا ده‌وله‌تا ترک دپژقن و په‌شکان ل کوردان دخن.
ئۆجەلان د هه‌ڤدیتنا هه‌ری داوین دا هەدەپە فراند به‌ر په‌رێ ئه‌سمانان و کوردێن کو ل دژ ده‌ردکه‌ڤن ژی دیسا مۆهرا “نه‌ته‌وپه‌روه‌رێن پاشڤه‌روو” ل وان خست. د ڤر دا گۆتنێن ئۆجەلان و که‌مال بورکای هه‌ڤدو ته‌مام دکن. ئانكو، هەدەپە و پارتیا که‌مال بورکایی ب راستی ژی ژ بۆ نه‌ته‌وپه‌روه‌رییا کورد بێ ئاسته‌نگکرن هاتنه ئاڤاکرن.
مله‌تێ کورد د دیرۆکا خوه دا هه‌ر فه‌داکاری کریه. ب مال و جانێ خوه ڤه پشتگری دایه دۆزا خوه، دۆزا کورد و کوردستانێ. لێ چ هاتبه سه‌رێ ڤی مڵه‌تێ مەزلووم، هه‌ر ب ده‌ستێ سه‌رۆک و ڕێڤه‌برێن وی هاتیه سه‌رێ وی.
که‌سێن کو سه‌رۆکاتی و ڕێڤه‌برییا ڤی مڵه‌تێ فه‌داکار کرنه، فه‌داکاری و دلسۆزییا مڵه‌تێ کورد یان ژ بۆ به‌رژه‌وه‌ندییێن خوه و یان ژی ژ بۆ به‌رژه‌وه‌ندییێن ده‌وله‌تێن داگیرکه‌ر ب کار ئانینه.
ژ به‌ر کو ڕوحێ نه‌ته‌وی، ئه‌ڤین و ئه‌ڤیندارییا کورد و کوردستانێ ب وان ڕا نەبوویە و نینە، ژ وان ڕا بكارئانینا ھەموو رێیان حەلالە. ژ به‌ر ڤێ، کورمێ دارێ ژ دارێ ده‌ردکه‌ڤه.
که‌سێ کو ئه‌ڤیندارێ تشته‌کی نه‌به نکاره خوه د به‌ر وێ ئه‌ڤینێ دا قوربانی بکه.
چاوا کو ئۆجەلان د نڤیس و هه‌ڤپه‌یڤینێن خوه دا دگۆت “به‌نده کورد ئاشک یۆکتور – ئه‌شقا کوردی ب من ڕا نینە” تام د ڤێ ده‌ربارێ دا که‌مال بورکای ژی د نڤیسا خوه‌یی 2021.08.31 دا دا خویاکرن گۆ؛ چو ئه‌شقا نه‌ته‌وە- ده‌وله‌تێ پێرا نینە. و ئه‌شق و ئه‌ڤینا کورد و کوردستانێ، وه‌ک ئۆجەلان، ب وی و ڕێڤه‌برێن دەبەپێ، هەدەپێ و هاکپارێ ڕا ژی نینە.
ژ به‌ر ڤێ ژی، گەلەك ب هێسانی دکارن که‌د، خوھدان، خوین و ده‌رفه‌تێن کو ب خوینا شه‌هیدان هاتنه بده‌ستخستن، فه‌دا بکن و دکن ژی.
ئیرۆ خوین و خوھدانا شه‌هیدێن کوردستانێ ژ بۆ (ئیزم) ئا که‌مال بورکای و یێن وه‌که وی هاتنه فه‌داکرن.
ژ بۆ ده‌مۆکراتیک جمهوورییه‌تا ترکۆ، ژ بۆ یه‌کپارچەیی و یه‌کرێزییا ده‌وله‌تا ترکۆ هاتنه فه‌داکرن.
هه‌لبه‌ت کورد ژی نه کوردێن به‌رێ نه. ب هه‌زاران کوردپه‌روه‌ر و نه‌ته‌وپه‌روه‌ر د ناڤ ڕه‌ف و بنگه‌ها پەکەکە، دەبەپە و هاکپار ڕێ دا هه‌نه.
ئه‌و کوردێن کو ب مال و جانێ خوه، هه‌ر تشتێن خوه ژ کوردستانه‌ک سه‌ربخوه ڕا فه‌دا کرنه، دێ ل که‌د و خوھدانا خوه ژی خوه‌دی ده‌رکه‌ڤن و دێ بێده‌نگ نه‌مینن.
دێ بێده‌نگ نه‌مینن کو پارتییێن چه‌قلماست وه‌ک هاکپار و هەدەپە ل سه‌ر خوینا زارۆکێن وان بچەرن. وێ بێده‌نگ نه‌مینن و ڕازی نا‌بن کو دژبه‌رێن نه‌ته‌و-ده‌وله‌ت ولۆ ب هێسانی خوینا زارۆکێن وان د تاسا زێرین دا پێشکێشی که‌مالیستێن ترک بکه.
وێ بێده‌نگ نه‌مینن کو هنده‌ک تاجرێن سیاسی ل سه‌ر پشتا که‌چ و خۆرتێن وان بازرگانییا خوینێ بکن. تام د ڤێ حه‌ساسیێ دا، ئه‌ز ژ که‌مال بورکای دپرسم:
ئۆجەلان ب ئێریشکرنا نه‌ته‌وپه‌روه‌را، ئانگۆ ملیه‌تچیا وه‌زیفەیا خوه و ئەركێ خوە ب جھ دکه؛ گه‌لۆ یا تو دکی چیه؟
نێزیک لێ نه دوور، هه‌لبه‌ت دێ ل دژ ڤێ کمباخیا وه ده‌نگ ژ کوردێن فه‌داکار و خوه‌دی خیره‌ت ده‌رکه‌ڤه.
2021.09.05
