ئه‌گه‌ر بالا وه بکشینه پشتی داخوویانیێن ئۆجەلان د ده‌ربارێ پەکەکێ و پرسا کورد دا، گه‌له‌ک گوهه‌رتنێن ڕامانی په‌یدا بوونه. ژ ڕۆژا ڕۆژ پێده یێن پەکەکە و ئۆجالان ناسکرن و ستراته‌ژیا ده‌وله‌تا ترک د ده‌ربارێ پرسا کورد دا تێگهایین دزانینا ئۆجەلان و ڕێخستنا کو، ژ بۆ پرۆژه‌یاکا ده‌وله‌تێ ئاڤاکری چییه و ئه‌و ڕه‌خنه دکران و هه‌ولددان ڕاستیا پەکەکێ بدن ناساندن. لێ مخابن به‌رفره‌هبوونا پەکەکێ ب ده‌سته هێزێن تاری یێن ده‌وله‌تێ سه‌ده‌مه‌ک بنگه‌هین بوو کو، گه‌له‌ک ئنسانا تایبه‌تی جوانێن کورد بێ کو، سیاسه‌تا پەکەکێ ته‌هلیل بکن، بێکو پەکەکێ ناسبکن ب که‌له‌جانه‌ک مەزن ده‌ست ئاڤێتن چه‌کان و ته‌ڤلی پەکەکێ بوون.
پشتی به‌رفره‌هبوونا پەکەکێ به‌شه‌ک ئنسان بێ کو چو پەیوه‌ندیا وان کوردبوونێ ڤه هه‌به، ژ بۆ به‌رژه‌وه‌ندیێن که‌سایه‌تی و ژ بۆ د جڤاتێ دا ببن خوه‌دی که‌سایه‌ت به‌رێ خوه دان پەکەکێ و پرانیا وان که‌سان پەکەکە و هێزا چه‌کداریا پەکەکێ ژ بۆ به‌رژه‌وه‌ندیێن خوه یێن سیاسی و جڤاکی ب کارانین. گه‌له‌ک ژ وان بوون پەرله‌مه‌نته‌ر، بوون سه‌رۆکێن شا‌ره‌داریان و ده‌ما پێوست به‌ره خوه دان ئه‌ورۆپایێ و به‌رژه‌وه‌ندیێن خوه دان پێش هه‌تا وه‌ک ڤێ گاڤێ ژی هه‌م ل ترکیێ و هه‌م ژی ل ئه‌ورۆپایێ خوه‌دی سه‌رمایه‌که‌ک باشن و ژیانه‌ک باش ل سه‌ر خوینا زارۆکێن کوردا ڕێڤه‌دبن.
چه‌پێن نه‌ته‌ویێن ترک یانی که‌مالیستێن نژادپه‌ره‌ست ل سه‌ر ناڤێ پەکەکێ بوون خوه‌دی هێزه‌ک و پارتیێن پەکەکێ یێن له‌گال ڕێڤه‌برن و گه‌له‌ک کورد بزانه‌بوون ب که‌مالیزمێ ژه‌هردان و به‌رێ وان ژ ڕامانێن کوردستانی دان ئالیه‌کی و ئه‌و کرن دژمنێن پارتی و ئالیێن کوردستانی. ئەبدولا ئۆجەلان ب خوه ده‌هان جاران و هه‌ری داوی د نڤیسا د بن ناڤێ “په‌رسپه‌کتیفێن نوو“ ژ کۆنگره‌یا ۱۲مین ئا پەکەکێ را شاندی دا ژی، ب ئاوایه‌ک ژ هه‌موو سنۆرێن ئه‌خلاقی دوور ئێریشێ نرخێن نه‌ته‌وییێن کوردستانێ دکه، حه‌قاره‌تێ ل شێخ سه‌عید، قازی محه‌ممه‌د و بارزانی یێ نه‌مر دکه.
ل ڤێ ده‌رێ تایبه‌تی دخوازم بێژم؛ مخابن وارسێن شێخ سه‌عید نه‌کارین ل که‌سایه‌تا شێخ سه‌عید خوه‌دی ده‌رکه‌ڤن و ببن به‌رسڤه‌ک توند ژ داخوویانیا ئۆجەلان را. بێ گومان ئه‌ڤ یه‌ک مژاره‌ک گه‌له‌ک تایبه‌ته و گه‌ره‌ک ل سه‌ر بێ سه‌کناندن و هه‌تا وه‌ک ڤێ گاڤێ ئه‌و هێزا که‌سایه‌تا شێخ سه‌عید ل سه‌ر جڤاکا کورد هه‌یی ب ئاوایه‌کی بێ نرخاندن و هه‌ولدان بێنە داین کو ئه‌و هێز بکه‌ڤه د بن خزمه‌تا ته‌ڤگه‌را ئازادخوازا کورد دا. ئه‌ڤ یه‌ک داخوازیا شێخ سه‌عیدێ پیرانی ب خوه یه ژی.
نها تایبه‌تی د مه‌دیایا جڤاکی دا به‌شه‌ک د ناڤا پەکەکێ دا و یێن مریدیا ئۆجەلان ب سالان کرین، وه‌ک ژ خەو‌نه‌کێ هشیار ببن هێدی هێدی ب خوه دحه‌سن. ئه‌و ده‌ستپێدکن به‌رته‌که‌ک مه‌زن نشا ئۆجەلان و هه‌لوه‌ستا وی ددن خوویاکرن. هه‌تا ب زاراڤه‌ک دن هه‌ری گۆتنێن پیس دژوونا دکن ئۆجەلان. ئۆجەلان ب خیانه‌تێ تاوانبار دکن.
ئۆجەلان چو جارا ژ بۆ کوردا و به‌رژه‌وه‌ندیێن کوردستانی خه‌بات نه‌کریه. ل ڕۆژهلاتێ کوردستانێ که‌ت د بن خزمه‌تا ده‌وله‌تا ئیرانێ و ژ بۆ ئیرانێ ل دژی ته‌ڤگه‌را ئازادخوازا کورد ل ڕۆژهلاتێ کوردستانێ شه‌ر کر. ل سوروویێ خزمه‌تا رژێما ئەسەد ب سالان کر ، ل باشوور ل دژێ ده‌ستکه‌فتیێن کوردستانێ بوو سیخووره‌ک ب په‌ره و ئه‌رزان یێ به‌خدایێ. ژ خوه باکور هه‌وجه ناکه که کو مرۆڤ به‌حسێ بکه.
نها هنده‌ک پارتییێن کوردستانا باکور، هێدی هێدی سنۆره‌کی تێخن د ناڤبه‌را خوه و پەکەکێ دا. به‌رێ ژی هه‌لوه‌ستا هنده‌ک پارتییان ل هەمبه‌ر سیاسه‌تا پەکەکێ هه‌بوو لێ تێرێ نەکرا. نها ده‌ره‌نگبە ژی دڤێ ڕاستیا پەکەکێ ژ خه‌لکێ را ڤه‌کری بێژن. هه‌تا ڤێ ئاستائه‌نگا هه‌ری مه‌زن د ڕێیا ته‌ڤگه‌را ئازاددیخواز ده ده‌شفره بکن. گه‌ره‌ک هه‌رکه‌س باش بزانە کو، ده‌م، هەدەپە، دەهەپە، دەبەپە، کەنەکە و هه‌ر ڕێخستنا ب داخوازیا پەکەکێ هاتی ئاڤاکرن هه‌موو پەکەکلینه. هه‌موویان ب ته‌نێ خزمه‌تا ڕامانا ده‌وله‌تێ ب ڕێیا ئۆجالان کرنه.
به‌سه ڤێ جا ئالیێن سیاسی و که‌سایه‌تێن کورد، به‌رژه‌وه‌ندیێن ڕێخستنی بدن ئالیه‌کی به‌رژه‌وه‌ندیێن نه‌ته‌وی بدن پێش. به‌رژه‌وه‌ندیێن که‌سایه‌تی مالخرابیا هه‌ری مه‌زنه ژ بۆ ده‌ستکه‌فتیێن نه‌ته‌وی.
گه‌ره‌ک باش بێ زانین هه‌تا پەکەکە و سیاسه‌تا هه‌تا وه‌ک ئیرۆ ڕێڤه‌بری باش نه‌یێ ناسکرن، دێ ته‌ڤگه‌را کورد پێشییا خوه نه‌بینه و د ناڤا تاریتییه‌کێ دا هه‌ولدانا بکه. دڤێ ئه‌و خه‌له‌کا خیانه‌تێ بێ دیتن و ژ ڕایا گشتی یا کوردستانێ را بدن ناساندن.
١١\٦\٢٠٢٥
نێرین/شرۆڤه
ن. فرات
