پێڤاژۆیا “ترکیه‌یا بێ ته‌رۆر” به‌رده‌وام دکه. لێ جاردن هنده‌ک بوویه‌رێن بالکێش ڕوو ددن. به‌ری دو ڕۆژان میتێ ل باشوورێ کوردستانێ ئۆپه‌راسیۆنه‌ک ل دارخست و ل گۆرا ڕاگەهاندنا مه‌دیایا ترکی ، د ڤێ ئۆپه‌راسیۆنێ دا میتێ دو کارمه‌ندێن خوه کو، د ده‌ستێ چه‌کدارێن پەکەکێ دا دیل بوون، ئازادکرن. یه‌ک د ئۆپه‌راسیۆنێ دا ژیانا خوه ژ ده‌ست دا یه‌ک ژی ب ساخی هاته ئازاد کرن. ته‌رمێ کارمه‌ندێ کو ژیانا خوه ژ ده‌ست دایی ژی برن ئه‌نقه‌ره سپارتن ئاخێ.
د ڤێ ده‌ربارێ دا، ڕۆژنه‌مه‌ڤان و نڤیسکارێ ڕۆژنامەیا حوریه‌تێ ئەبدولقادر سه‌لڤی نڤیسه‌ک نڤیسی و تێدا بەحسا ڤێ ئۆپه‌راسیۆنێ کر. سه‌لڤی دبێژه: “ته‌شکیلاتا ئیستیخباراتا نه‌ته‌وه‌یی (میت) ێ د نهێنیه‌ک مه‌زن دا ئۆپه‌راسیۆنه‌ک گرینگ پێک ئانی. میتێ د وێ ئۆپەراسیۆنێ خوە دا دو ئه‌فسه‌رێن میتێ یێن کو ژ ئالیێ پەکەکێ ڤه هاتبوون گرتن، د ئۆپه‌راسیۆنه‌کا نه‌په‌نی دا ئازادکرن و برن ترکیه‌یێ.”
دوهی ژی د پەرله‌مه‌نتۆیا ترکیه‌یێ دا کۆمسیۆنەک ژ پارتیێن سیاسی هات ئاڤاکرن و د بن سه‌رۆکاتیا سه‌رۆکێ پەرله‌مه‌نتۆیێ دا جڤینا خوه یا یه‌که‌مین کر. هه‌روه‌ها بریاره کو جڤینا بێ دا سه‌رۆکێ میتێ و وه‌زیرێ به‌رگریێ ژی ئاماده‌بن.
د ڤێ ده‌ما کو، هه‌رکه‌س و د سه‌ری دا باخچه‌لی و ئۆجەلان له‌زێ ل جیبجیکرنا پێڤاژۆیێ دکن، ئه‌ڤ ئۆپه‌راسیۆنا میتێ تێ چ واته‌یێ؟ گه‌لۆ نه بالکێشه کو، که‌سه‌کێ ل سه‌ر ڤێ یه‌کێ ده‌ڤێ خوه ڤه‌نه‌کر و نرخاندنه‌ک نه‌کر.
پێڤاژۆ دێ چه‌وا ڕێڤه‌هه‌رە هێژا نه دیاره. ده‌وله‌تێ ئۆجەلان و ده‌م پارتی کرنه د بن باسکێن خوه ڤە پێڤاژۆیه‌کی ب ڕێڤه دبن. لێ د هه‌مان ده‌مێ دا میت ل دژێ پەکەکێ ئۆپه‌راسیۆنان دکه. وه‌ک گه‌له‌ک جارا تێ گۆتن، چه‌کدانانا پەکەکێ باشه. هلوەشاندن و نەمانا پەکەکێ ژ هه‌موویێ باشتره. لێ گه‌لۆ دێ چه‌کدارێن پەکەکێ ل باشوورێ کوردستانێ دەست ژ چه‌کان به‌ردن یان نا؟ ئه‌ڤ هێژا نایێ زانین. گه‌لۆ دێ ل شنگالێ ڕه‌وشا چه‌کدارێن پەکەکێ کو د خزمەتا حه‌شدا شه‌عبی دانە دێ چه‌وا به؟ ئه‌ڤ هه‌موو پرسن و که‌سه‌ک به‌حس ژێ ناکه.
ڕۆژاڤایێ کوردستانێ هەسەدە ب ئاوایه‌کی ل سه‌ر داخوازا ئۆجەلان و دیزاینکرنا ترکیێ و پشتگریا ئەمەرکایێ ته‌ڤلی ئارتێشا سوریه دبه.
چ د دمینه؟ ئه‌گه‌ر پەکەکە د ڕاستیا خوه دا ل باشوورێ کوردستانێ خوه بێ چه‌ک بکه و خوە هلوەشینە، ئه‌ڤ یه‌ک ژ بۆ ده‌ستکه‌فتیێن باشوورێ کوردستانێ وه‌ک گەرانتییەکێ یە.
وه‌ک دن ئه‌نجام دیارن؛ دێ ده‌وله‌ت ل گۆرا پێوستیا خوه هنده‌ک گوهه‌رتنا د ده‌ستوورێ دا بکه، گرتیێن پەکەکێ ئازاد بکە و هنده‌ک گاڤێن د به‌رژه‌وه‌ندیا ده‌وله‌تێ دا پاڤێژه.
مخابن د ڤێ پێڤاژۆیێ دا ئالیێ کوردا نینە.. ئه‌ڤ ب خوه سەقەتییا هه‌ری مه‌زن یا ڤێ پێڤاژۆیا”ترکیه‌یا بێ ته‌رۆر”ە.
