ئیسمائیل بەشیكچی كەنگی خوە كوشت
بەشەك ژ نڤیسا: ئیبراھیم گۆجلو
نێرین و پێشنیارێن ئیسمائیل به‌شیکچی…
هه‌ر کورده‌ک ئیسمائیل به‌شیکچی ژ نێزیک ڤه ناس دکه و ڕۆلا وی د پرسا کورد و کوردستانێ دا، خه‌بات و که‌دا وی یا ژ بۆنا کورد و کوردستانێ باش دزانه. دنیا ژی وی وه‌ک کوردولۆگه‌کی ب ناڤ دکه و ناس دکه. ئه‌و که‌سه‌کێ ب ناڤووده‌نگه. وی قاسی و هه‌تا زێده‌تر کورده‌کی ژ بۆنا پرسا کورد و کوردستانێ د زیندانێ دا مایه. د دادگه‌هان دا ژی هه‌ر ده‌مێ وی پرسا کورد و کوردستانێ و باوه‌ریێن خوه پاراستیه.
ئه‌و نە ب تەنێ وه‌ک کوردولۆگه‌کی لێ گه‌له‌ک ده‌مان وه‌ک چالاكڤانەكێ کورد و کوردستانێ هه‌لوه‌ست نیشان دده.
د پرسا ده‌وله‌تا فه‌ده‌رال یا کوردستانێ و خه‌ته‌ری و ئێریشا پەکەکێ ل هه‌مبه‌ری ده‌وله‌تا فه‌ده‌رال یا کوردستانێ نێرینێن خوه د ڤان ڕۆژێن داوی دا ژی دیار کر. پێشنیارێن خوه ژی ب زه‌لالی پێشكەش كرن.
ئیسمائیل به‌شیکچی ب ناڤێ “هه‌ڤکارییا پەکەکێ و حه‌شدا شه‌عبی ل هه‌رێما کوردستانێ” نڤیساند و گۆت کو: “شنگال هه‌رێما کوردانه. هه‌تا نیڤا سالێن 1970یان ل شنگالێ یه‌ک مالباته‌ک عه‌ره‌ب نەبوویه. سه‌دام حسێن، ژ بۆنا شنگالێ بعه‌ره‌ب که، سالا 1975 و پشتی وێ ده‌ست بجهکرنا مالباتێن عه‌ره‌ب ل ڤێرێ کریه. ئیرۆ ژی پەکەکە/کەجەکە هه‌ول دده كو شنگالێ ژ کوردستانێ دوور بخه و ڤەقەتینە، ژ بۆنا ڤێ یەكێ ژی ل شنگالێ ب حه‌شدا شه‌عبی ڕا د ناڤا تەڤگەر و هه‌ڤکاری دا یه. ئیرۆ ل شنگالێ پەکەکە/کەجەکە بوویه پارێزڤانێ به‌رژه‌وه‌ندیێن ئیرانێ.”
“رێڤه‌به‌رییا هه‌رێما کردستانێ قاده‌که کو ل جاده‌یان، ل کۆلانان، ل ئاشخانه‌یان، ل کافه‌یان، ل ئۆتێلان، ل دبستان-زانینگەھان، ل سووک- بازارێ، ل مزگه‌فتێ، ل مه‌سجیدێ، ل پارلامه‌نتۆیێ-ل وه‌زاره‌تێ، ل به‌له‌دییێ، ل ئارتێشێ، ل جه‌م پۆلیسان… ل هه‌ر ده‌رێ ده‌نگێ کوردان ڤەدده. قاده‌که کو هاتییه ڕزگارکرن. ل هه‌ر جهی هه‌وایا کورد/کوردستانێ تێ سه‌ندن. ژ نێزیک ڤه تێ زانین کو ژ بۆ بده‌ستخستنا ڤان ده‌ستکه‌فتان ژی به‌ده‌لێن پر گران هاتنه دایین. دڤێ ب بالداری ستاتویا هه‌رێما کوردستانێ بێ پاراستن. هه‌ولدانا هلوه‌شاندنا ڤێ ستاتویێ، ب تەنێ کارێ هێزێن دژی کورد، دژی کوردستانێ یه.”
به‌شه‌ک نڤیسا به‌شیکچی بێ ئانالیز کرن، دیار دبه کو به‌س نێرین و ئانالیزێن خوه پێشکێش نه‌کریه. پێشنیارێن خوه ژی ڕێز کرنه. گۆتیه کو:
1-دڤێ پەکەکە/کەجەکە ژ بۆ ناسینا سه‌روه‌رییا حکومه‌تا هه‌رێما کوردستانێ بێ دەعوەت کرن.
2-ئەگه‌رسەروەریا ھەرێما كوردستانێ ناسنه‌که دڤێ ژ هه‌رێمێ دەركەڤە .
3-ئەگه‌ر دەرنەكەڤە دڤێ ب سه‌پاندنا رێكێن ئیداری و جه‌زایی ڕوو ب ڕوو بمینه.”
هه‌لوه‌ستا من ل هه‌مبه‌ری پێشنیارێن ئیسمائیل به‌شیکچی…
ئه‌ڤ هه‌لوه‌ستا ئیسمائیل به‌شیکچی گۆری باوه‌ریا من خوه‌دیێ کێماسی به ژی، هه‌لوه‌ستا ڕێزداریێ یه و زه‌لاله.
کێماسیا ئیسمائیل به‌شیکچی ئه‌وه کو ئه‌و دبێژە ئه‌م جاره‌ک دن، سه‌روه‌ریا ده‌ستهلاتداریا ده‌وله‌تا فه‌ده‌رال یا کوردستانێ بینن بیرا پەکەکێ، پشت ڕا ژ بۆنا دەرخستنا پەکەکێ بلا بریار بێ داین.
ئه‌ز و گه‌له‌ک کوردپه‌وه‌ر، 400 کوردێن نڤیسکار، ڕۆناکبیر، ڕۆژنامه‌ڤان، حقوقزان، ژن و مێرێن کارمه‌ند، سیاسه‌تڤان دبێژن کو ئێدی مه‌سه‌له ژ مه‌رحه‌لا بالکشاندنێ ده‌رباس بوویه. له‌ورا 30 ساله کو بالا پەکەکێ تێ کشاندن. لێ پەکەکێ هه‌ر ده‌مێ ئێریشێن خوه زێده دکه. ئه‌نجاما ڤان ئێریشان بوویه ئەگەر کو ب هه‌زاران پێشمه‌رگه شه‌هید ببن.
ئه‌و پێشنیارا بالکشاندنێ، نیه‌تا ئینسانی یا باش و کورده‌واریێ یه. لێ پەکەکێ هه‌ر ده‌م نیه‌تا باش ژ بۆ بەرژەوەنیێن خوە ئیستیسمار دکه. زرارێ دده ده‌وله‌تا فه‌ده‌رال یا کوردستانێ. نووها ژی مژار هاتیه وێ قۆناخێ کو پەکەکە دخوازه ده‌وله‌تا فه‌ده‌رال یا کوردستانێ ژهۆلێ ڕاکه.
لۆما ئه‌ز دبێژم کو پرسگرێک د خالا دویه‌مین و سه‌یه‌مین دا یه. ئه‌ز د وێ باوه‌ریێ دا مه کو پەکەکە خالا دویه‌مین ژی جیبجی ناکه و ژ ھەرێما كوردستانێ دەرناكەڤە.
پەکەکە خوه ژ شه‌ر ڕا ئاماده دکه.
دڤێ ده‌وله‌تا فه‌ده‌رال یا کوردستانێ ژی خوه ب هه‌ر ئاوایی ژ شه‌رێ پەکەکێ و ھەڤالبەندێن وێ و پالپشتێ وان ده‌وله‌تێن کۆلۆنیالیست ڕا خوه ئاماده بکە.
به‌شیکچی ده‌ما ژ پەکەکێ ڕا ئالیکاری کر خوه کوشتبوو. نوها ژنووڤه ڕابوو سه‌ر پیان
پەکەکێ ب ڕێیا نڤیسكارێ خوە ،یه‌کۆ ئادل، د “ئۆزگور پۆلیتیکا”یێ دا ئێریشی جڤاکناس و کوردولۆگ ئیسمائیل به‌شیکچی کر. به‌شیکچی تا‌وانبار کر. لێ د ناسنامه‌یا ئیسمائیل به‌شیکچی دا ئێریشی هه‌موو ڕه‌وشه‌نبیر و سیاسه‌تڤانێن ل دژ پەکەکێ کر. گۆت کو: “به‌شکچی خوه کوشت!”
پشت ڕا ژی ده‌ره‌و و بێ حورمه‌تیا خوه ڕێز دکه. ڕاستیان به‌ره‌ڤاژی دکه.
ئه‌و ژی باش دزانه کو پەکەکە پرۆژه‌یا ده‌وله‌تا که‌مالیست یا ترکه. لێ ئه‌و دخوازه کو ده‌وله‌تا فه‌ده‌رال یا کوردستانێ هه‌ڤالبه‌ندێ ده‌وله‌تا ترک نیشان بده.
ئه‌و نڤیسكارێ پەكەكێ د نڤیسا خوە دا تێكەلیێن پەکەکێ یێن قرێژ ب ده‌وله‌تا ئیرانێ، حەشدی شەعبی و ده‌وله‌تا ئیراقێ را ڤه‌دشێره. ئه‌و شه‌رفرۆشیا خوه بنپه‌رده دکه، ئیسمائیل به‌شیکچی وه‌ک شه‌رفرۆش نیشان دده.
ئه‌م ل ده‌ره‌و و سه‌خته‌کاریا نڤیسکارێ ده‌ره‌وین بنێرن:
ئەو نڤیسكار دێبژە: “لێ هند که‌س ژی کو، ئیسمائیل به‌شیکچی ژی د ناڤ وان دا یه، ب داخویانی و کرنێن خوه ڕاسته‌راست خوه دکوژن. ئه‌و داخویانی ژ بۆ که‌سه‌کی کو هنده ئێش کشاندیه، د زندانان دا مایه و به‌شه‌ک گرینگ ژ ته‌مه‌نێ خوه د ڕیا تێکۆشینا زانستێ دا فه‌دا کریه، شه‌رم و خه‌بینه‌ته.
“ئه‌ڤ ژ بۆ که‌سه‌کی کو ب ئیدیایا زانست و زانیاریێ ڕادبه شه‌رمه‌که مه‌زنه. دڤیابوو به‌شیکچی وه‌که ترکه‌کی دۆستێ کوردان د ڤێ بابه‌تێ دا بێ ئالی و ژ بۆ ئاڤاکرنا ئاشتیه‌کا ناڤخوه‌یی بخه‌بتیا. دڤیابوو به‌شیکچی به‌رده‌ڤکیا پەدەكێ و چ هێزێن سیاسی یێن کوردان ژی نه‌کرا. دڤیابوو به‌شیکچی وه‌که که‌سایه‌تیه‌کی پێباوه‌ر ژ بۆ هه‌موو کوردان ل جهه‌کی تایبه‌تی بسه‌کنیا. لێ مخابن نڤیسا وی ژ جه‌وهه‌رێ ڤه ل دژی شۆره‌شێ یه و وه‌که به‌لاڤۆکا پاراستن و میتێ ئه‌نجام دده.”
نڤیسکارێ خوولامێ پەكەكێ د داویێ دا دبێژه کو: “مخابن به‌شیکچی ب داخویانیا داوی، که‌ت خزمه‌تا شه‌ری و ژ ئالیێ مەعنەوی ڤه خوه کوشت. ئه‌ڤ شه‌ر ژی ته‌نێ ب کێری دژمنان تێ.”
به‌شیکچی خوه نه‌کوشت، وه‌ک که‌سه‌کی ب ویژدان و کوردولۆگ و کورد-کوردستانحه‌ز ل هه‌مبه‌ری خرابیا پەکەکێ هه‌لوه‌ست نیشان دا.
ده‌ما کو ئیسمائیل به‌شیکچی ژ پەکەکێ ڕا پشتگر بوو، ئه‌و ل سه‌ر سه‌رێ هه‌ڤالبه‌ندێن پەکەکێ بوو. له‌ورا وێ ده‌مێ ب هه‌زاران جوان ژ پەکەکێ ڕا دابوو قه‌زه‌نچ کرن. ل گۆر به‌وه‌ریا من وێ ده‌مێ به‌شیکچی خوه کوشتبوو. لێ پشتی ده‌مه‌کێ ده‌ما دیت كو تێكەلیێن پەکەکێ ب̇ کورد و کوردستانێ را نینە، ژ نووڤه ڤه‌گه‌ریا ڕاستیا خوه. ژ کورد و کوردستانێ، ژ ڕێخستنێن کوردستانێ ڕا خوه‌دی ده‌رکه‌ت.
2020.12.25
لینكا نڤیسا ئیسمائیل بەشیكچی
