ئیمام: ئەمریکا گڤاشتنه‌کا بهێز ل ته‌ڤده‌مێ دکه
مەحەمەد سەدیق ئیمام، د به‌رسڤا پرسێن ڕۆژه‌ڤاکورد ده دبێژه:هه‌ڤپه‌یمانیا ناڤده‌وله‌تی ب چ ئاوایی ل ڤان ده‌مێن هه‌ستیار دا ده‌ست ژ ڤێ ده‌ڤه‌را ستراته‌ژیک به‌رناده ، به‌رژه‌وه‌ندیێن وان و ئیسرائیلێ دخوازه کو دگه‌ل هه‌ڤپه‌یمانێن خوه یێن کورد و ترک په‌یوه‌ندیێن خوه بهێزتر لێ بکن
ڕۆژه‌ڤاکورد: ل ڕۆژاڤایێ کوردستانێ ده‌رفه‌ته‌ک دیرۆکی خوویا دکه. کورد ژی نه یه‌کالینه. ب دیتنا وه چ پێوسته بێ کرن ژ بۆ ئه‌ڤ ده‌رفه‌ت ژ ده‌ست نه‌چه؟
م س ئیمام: ب نێرینا من، مفا دێ ژ ڤێ ده‌لیڤێ هێته دیتن ده‌ما هێزێن سه‌ره‌کی وه‌کی ته‌ڤده‌م و ئه‌نکسه ب هه‌ڤ ڕا ئه‌نیه‌ک کوردستانی دابمه‌زرینن، وێ ده‌مێ دێ هێزه‌کا خورت ل مه‌یدانێ دروست به کو بکاربه به‌رسڤا گشت پێشبینیان بده و ل جهێ ڕازیبوونا هه‌ڤپه‌یمانیا ناڤده‌وله‌تی دا به ، ل ئالیێ دی ترکیه وێ نه‌چار به ڤێ ئالته‌رناتیفێ قه‌بوول بکه، ئه‌گه‌ر بخازه په‌یوه‌ندیێن خوه ب ئەمریکایێ ڕا قوت نه‌که .! ئەمریكا ژ ئالیێ خوه ڤه گڤاشتنه‌کا بهێز ل ته‌ڤده‌مێ دکه ژ بۆ کو ڕازی ببه ڕه‌وشێ نۆرمالیزه بکه و هه‌ڤپه‌یمانیه‌کێ ب ئه‌نکسێ ڕا بکه
ڕۆژه‌ڤاکورد: ڤه‌کشاندنا هێزێن ئه‌مه‌ریکی چ باندۆرێ ل هه‌رێمێ دکه و ب تایبه‌تی ژ بۆ ڕۆژاڤایێ کوردستانێ چ سه‌ناریۆ هه‌نه؟
م س ئیمام: ل گۆر زانیاری و نووچه‌یێن داویێ، په‌یڤا ڤه‌کشاندن، ب دیتنا من نه‌مایه، ئه‌ز دکارم بێژم (دوباره ڕێکخستن ). له‌شکه‌رێن ئەمریكایێ دێ کێمتر بن، لێ ل جییێ وان دێ هێزێن ده‌وله‌تێن ئه‌ورۆپی وێ ڤاله‌هیێ پر بکن، له‌وما چ باندۆر نابه.
هه‌ڤپه‌یمانیا ناڤده‌وله‌تی ب چ ئاوایی ل ڤان ده‌مێن هه‌ستیار دا ده‌ست ژ ڤێ ده‌ڤه‌را ستراته‌ژیک به‌رناده ، به‌رژه‌وه‌ندیێن وان و ئیسرائیلێ دخوازه کو دگه‌ل هه‌ڤپه‌یمانێن خوه یێن کورد و ترک په‌یوه‌ندیێن خوه بهێزتر لێ بکن ژ بۆنا کو ل به‌ر سینگا پلانێن ئیران و ڕووسیایێ ڕاوه‌ستن.
ڕۆژه‌ڤاکورد: ئه‌نکس ژ ده‌ستپێکا شۆره‌شا سوری ڤه، ب ئۆپۆزسیۆنا سوری ڕه یه و ب وێ ڕه په‌یامه‌ک ژی ئیمزه کریه. پید/ته‌ڤده‌م ژی ژ ده‌ستپێکێ ڤه و هه‌تا نها ب ڕه‌ژمێ ڕه یه. ل گۆر وه ژ ڤان هێزان چ تێ خوه‌ستن؟
م س ئیمام: ئه‌گه‌ر لهه‌ڤهاتنه‌که (بگارانتی) ژ ئالیێ هه‌ڤپه‌یمانا ڤه د ناڤبه‌را هه‌ردو ئالییان دا؛ ته‌ڤده‌م و ئه‌نکس هات ئیمزا کرن ، وێ ده‌مێ دێ هه‌ردوو ئالی بێ منه‌ت بن و دێ خوه ژ ئیلتزامێن که‌ڤن دوور ڕاگرن.
ڕۆژه‌ڤاکورد: باندۆرا هێزێن ناڤنه‌ته‌وی و یێن هه‌رێمی ل سه‌ر پێشه‌رۆژا سوریه بوویه یه‌که‌م، گه‌لۆ د ڤی واری ده کورد دکارن چ بکن و چه‌وه سودێ ژ ڤێ ڕه‌وشێ بگرن
م س ئیمام: هه‌ر وه‌که من د به‌رسڤا پرسیارا یه‌کەم دا دیار کری، کورد ب یه‌کرێزییا خوه دێ بکاربن ده‌فاکتویه‌کێ به‌رهه‌ڤ بکه‌ن، وه‌که ل باشوورێ کوردستانێ د سالا ۱۹۹۱ێ هاتی دامه‌زراندن . وێ ده‌مێ دێ ترکییه ژی نه‌چار به وێ ڕه‌وشێ قه‌بوول بکه هه‌ر وه‌که ل باشوور چێ بووی..
ئه‌گه‌ر سوریه ده‌ستووره‌کا نوو په‌سند بکه پشتی ئاشتی ل وی وه‌لاتی به‌رقه‌رار به، دێ ڕۆژاڤا پێشکه‌فتنه‌کا مه‌زن ب خوه ڕا بینه ژ به‌ر کو ده‌ستوور دێ، بێ گومان، مافێن ڕۆژاڤا گارانتی بکه و دێ مفایێن ترکیێ ژی گه‌له‌ک مه‌زن بن، ئه‌ڤ چه‌نده دێ باندۆرا خوه یا ئه‌رێنی ل سه‌ر ڕه‌وشا کودستانا باکور ژی بکه.
ئه‌گه‌ر ڕه‌وش وه‌که ئیرۆ ژی بمینه، بێ چاره‌سه‌ریه‌کا سه‌رتاسه‌ری، دێ ڕۆژاڤا ب یه‌کرێزیا خوه و ب یه‌کگرتنا ڕێزێن خوه ژ ئارامترین ده‌ڤه‌رێن سوریێ به.
لێ تشتێ هه‌ری گرنگ ئه‌ڤه کو نه ئه‌نکس و نه ته‌ڤده‌م هزر بکن کو ب سه‌رێ خوه یه‌ک ب ته‌نێ بکاربه حکومداریێ ل ڕۆژاڤا بکه نابە .
وانه‌یێن مێژویێ نیشا مه دایه کو نه‌لهه‌ڤکرن و بێتفاقیێ ئه‌م د ڤی ڕه‌وشێ دا هشتنه.
