ئێریشێن داعش و ھەلوەستێن بالکێش
باشوورێ کوردستانێ ده‌ڤه‌رێن کوردستانی یێن ده‌رڤه‌یی ئیدارەیا حکومەتا هه‌رێما کوردستانێ د بن خه‌ته‌ریه‌ک مه‌زن دانه. تایبه‌تی پشتی خیانه‌تا ۱٦ێ ئۆکتۆبه‌رێ هه‌تا وه‌ک رۆژا ئیرۆ ئاسایشا وان ده‌ڤه‌ران د بن گەفان دایە و له‌یزتکه‌ک مه‌زن ل سه‌ر وان ده‌ڤه‌ران هه‌یه. تێ زانین کو که‌رکوک و به‌شه‌ک مه‌زن ژ پارزگەها مووسل ئاخا کوردستانێ یه و کورد لێ دژین نها گرێدایی حکومه‌تا ناوه‌ندی یا ئیراقێ نه. ل هنده‌ک جهان کورد ب ده‌فاکتۆ ده‌ستهلاتن و ده‌ڤه‌رێن کو د بن کۆنترۆلا کوردان دا یه ئاسایشا وەلتیێن وان دەڤەران پاراستیە.
دەڤەرێن کو د بن کۆنترۆلا حکومه‌تا به‌غدایێ دانه، ڤاله‌هیه‌ک ئه‌منی په‌یدا بوویه و ته‌رۆرستێن داعشێ د ڤان ده‌ڤه‌ران دا خوه ڕێخستن دکن و جار جارا ئێریشی گوندێن کوردان دکن و گه‌له‌ک هه‌موه‌لاتیێن کورد شه‌هد دکن و هه‌ولددن وان ده‌ڤه‌ران ژ کوردان ڤاله بکن.
هه‌ولێر و به‌غدا ژ بۆ ڤالاهیا ئه‌منی ژ هۆلێ ڕاکن چەند رێکەفتن ئیمزا کرنه و دخوازن هێزێن هه‌ڤبه‌ش ل ڤان ده‌ڤه‌ران ب جه بکن. لێ به‌غدا ل سەر پێکانینا لیوایێن هەڤبەش خەمسارە و ڤێ یه‌کێ گه‌له‌ک ب جدی وەرناگرە و چاڤێ خوه ژ ئێریشێن داعشێ ڕا دگره.
لێ یا بالکێش ئه‌وه کو ئاشکەرایە ئێریشێن داعش د ڤی ده‌می دا دکە سەر گوندێن کوردان ب که‌یفا به‌غدایێ یه ژی. ژ به‌ر کو حه‌شدا شه‌عبی ژی ژ بۆ کو ڤان ده‌ڤه‌ران ژ کوردان ڤاله بکه ب رێیا عەرەبێن هاوردە ئه‌رد و زه‌ڤیێن کوردان داگیر دکن و ته‌عدایه‌ک مه‌زن ل گوندیێن کورد دکن. د ڤێ خالێ دا چه‌کدارێن پەکەکێ ژی ڕێ ددن حه‌شدا شه‌عبی و هه‌تا ل هنده‌ک ده‌ڤه‌رێن وه‌ک مه‌خموور و شنگالێ هه‌ڤکاریا وان ژی دکن و وه‌ک ملیسێن حه‌شدا شه‌عبێ ته‌ڤدگه‌رن.
ل سەر هه‌رێما کوردستانێ له‌یزتکه‌ک مه‌زن هه‌یه و به‌غدا، حه‌شدا شه‌عبی، پەکەکە و داعش هه‌ڤکاریا هه‌ڤ دکن و گه‌له‌ک جارا ئه‌ڤ هێزێن هەنێ چاڤێن خوه ژ ته‌ڤگه‌را ته‌رۆرستێن داعشێ ڕا دگرن.
ل سه‌ر هوورگلیێن ئێریشا مه‌خموور ل چیایێ قه‌ره‌چۆخ گه‌له‌ک تشت هه‌نه کو، هه‌ڤکاریا حه‌شدا شه‌عبی و پەکەکێ ل گه‌ل داعشێ ددن خوویاکرن. به‌ری هه‌ر تشته‌کی چه‌کدارێن داعشێ د به‌ر چه‌په‌رێن حه‌شدا شه‌عبی و چه‌کدارێن پەکەکێ ڕا ده‌رباس بوونه و ئێریشی گوند کرنه. ده‌ما پێشمه‌رگه د هه‌وارا وان چوونه حه‌شدا شه‌عبی و پەکەکێ ڕێ نه‌دایه پێشمه‌رگه‌یان کو هه‌رن پێشیا چه‌کدارێن داعیشێ بگرن. ئه‌ڤ بوویه‌ر ڕاستیه‌که و د ڤێ ده‌ربارێ دا به‌لگه هه‌نه و هه‌تا هێزێن پێشمه‌رگه د ڤێ ده‌ربارێ دا دگه‌ل چه‌کدارێن پەکەکێ و حه‌شدا شه‌عبی هه‌ڤدیتن کرنه و ئەگەرا ڤێ هه‌لوه‌ستا وان پرسینه.
پێدڤیە، د سه‌ری ده پەدەکە، حکومه‌تا هه‌رێما کوردستانێ و هه‌موو دام و ده‌زگه‌هێن کوردستانی، باش تێبگەهن کو، له‌یزتکه‌ک مه‌زن و هه‌ڤکاریه‌ک به‌رفره‌ه بۆ ژناڤبرنا هه‌رێما کوردستانێ هه‌یه. ئه‌گه‌ر ئه‌ڤ له‌یزتک نهێتە دیتن ، چاره‌سه‌ر ژی دێ گه‌له‌کێ زه‌حمه‌ت ببه. د ڤێ قۆناغا کو ته‌ڤگه‌را کورد تێرا ده‌رباس دبه، ئارمانجه‌کا هێزێن ناڤبووری ئه‌وه کو خاکا ئازاد یا کوردستانێ ژناڤ ببن و چو ده‌ستکه‌فتیان ژ بۆ کوردان نه‌هێلن.
د ڤێ ده‌ربارێ ده پێوسته جار ب جارا، ئه‌گه‌ر ئاسایشا گشتی نه‌به ئاسته‌نگ، هێزێن ئەمنی و پێشمەرگە ڕاستیا هنده‌ک بوویه‌ران و تایبه‌تی هه‌لوه‌ستا حه‌شدا شه‌عبی و پەکەکێ ژ گه‌ل و رایا گشتی یا کوردستانێ ڕا ئاشکه‌ره بکن. د ڕاستیێ دا هه‌تا مرۆڤ که‌سێن ل هەمبه‌ر خوه ناس نه‌که پاراستن ژی گه‌له‌کێ زه‌حمه‌ت دکه‌ڤه.
مه‌دیایا پەکەکێ د ڤێ ده‌ربارێ دا، پەدەکێ تاوانبار دکه و دبێژه: “ژ به‌ر خه‌مساریا پەدەکێ پێشمه‌رگه و هه‌موه‌لاتی شه‌هید بوونه.“ نووچه‌یێن د مه‌دیایا پەکەکێ دا دهێنە به‌لاڤ کرن ب ته‌نێ پەدەکێ تاوانبار دکن و د هه‌مان ده‌می دایا دلێ خوە ژی دبێژن.
د ڕۆژنامه‌یا ئۆزگور پۆلتتکا د به‌شه‌ک نووچه‌یا خوه دا دبێژه: “ژ چیایێ قه‌ره‌چووخ هه‌تا حه‌مرینێ پێشمه‌رگه ل هه‌مبه‌ری ئێرشێن چه‌ته‌یێن داعشێ هاتنه بجهکرن و ژ به‌ر کێمبوونا هێز و نه‌بوونا چه‌کێن پێویست، ڕۆژانه خوین درژه. ته‌ڤی ڤێ ژی پەدەکە ل شوونا کو چەکان و هێزا زێدە ژ بۆ ڤان سنۆران بشینە، پەدەکە چه‌ک و هێزێ دشینه هه‌رێمێن پاراستنا مه‌دیایێ و ل هه‌مەبه‌ری گه‌ریلا چه‌په‌ران چێدکه.”
ل هنده‌ک هه‌رێمێن ل سه‌ر سینۆر هه‌تا ب فره‌هیا ٤۰ کیلۆمه‌تره‌یان، ڤالاهی هه‌یه. ته‌ڤگه‌را چه‌ته‌یێن داعشێ هه‌یه و ئێرش دکن. هه‌ر کو دچه ڕه‌وشا ڤان هه‌رێمان خه‌رابتر دبه.“
یان مه‌دیایا پەکەکێ ڤه‌کری دبێژه کو، بلا پەدەکە خوه ژ ده‌ڤه‌رێن کو پەکەکە دخوازه داگیر بکه بده ئالیه‌کی. ئه‌گه‌ر ڤێ نه‌کن دێ داعیش ئێریشێن ب ڤی جوره‌یی بکن و ئه‌و ژی دێ ڕێ بدن ڤان ئێریشان.
پرانیا ئالیێن سیاسی ل هه‌موو به‌شێن کوردستانێ ئه‌ڤ ئێریێشن ته‌رۆرستێن داعشێ شه‌رمه‌زار کرن. لێ هنده‌ک ئالیێن کورد ئه‌ڤ یه‌ک نه‌کرن و بێ ده‌نگ مان. گه‌لۆ گه‌ره‌ک مرۆڤ ژ وان ڕه چ بێژه؟ پێدڤیە ئه‌ڤ ھەلوەستێ وان ئالیێن بێ دەنگ ھەر کەس باش بزانە و ببینە.
٢٠٢١/١٢/٥
نێرین/شرۆڤه
