یێن كو بخوازن ئێریشی سەر پەدەكێ بکن و سڤکایه‌تیێ ب بهایێن گه‌لێ کوردستانێ بکن، داویێ ھەر دێ ئەو باجا كریارێن خوه بدەن. (مه‌سعود بارزانی)
وه‌ک تێ زانین ئه‌ڤه ده‌مه‌که پارتیا كاركەرێن كوردستانێ (پەكەكە) ب مه‌دیا خوه و داخوویانیێن رێڤه‌به‌رێن قه‌ندیل ب ئاوایه‌ک دژوار ئێریشی سەر پارتیا دەمۆكراتا كوردستانێ (پەدەكە) دکه. مه‌دیا پەكەكێ نرخاندنێن خه‌یالی د ده‌ربارێ پەدەكێ دا دکه. رۆژانه مه‌دیا پەكەكێ د ده‌ربارێ پەدەكێ دا سه‌ناریۆیه‌کێ ئاماده دکه و د مه‌دیا خوه دا دوه‌شینه. پەكەكە گه‌له‌ک ڤه‌کری وه‌ک ئاژانده‌یه‌کی ب جھ بینه، خوه و ده‌ردوورا خوه ژ شه‌ره‌کی دژی پەدەكێ را ئاماده دکه.
پشتی ل هه‌ڤهاتنا حوکومه‌تا کوردستانێ و یا ئیراقێ د ده‌ربارێ شنگالێ دا، د ناڤا پەكەكێ دا ترس و لەرزەكێ ده‌ست پێ کر. پەكەكێ ئێریشێن خوه زێده‌تر کرن. هه‌ری داوی به‌رپرسێ ئاساییشا گومرکا سه‌رزێری، غازی سالح ئالیخان رۆژا پێنچشه‌مێ 2020.10.08 ژ ئالیێ چه‌کدارێن پارتیا کارکه‌رێن کوردستانێ ڤه هاته شه‌هید کرن.
نها ژی ل به‌غدایێ هنده‌ک چه‌کدارێن حه‌شدا شه‌عبی ئێریشێ ئاڤاهیا (لقی پێنج) پەدەكێ کرن. ئه‌ڤ یه‌ک ژی ده‌لیله‌ک هه‌ری به‌ر ب چاڤه کو، پەكەكە، حه‌شدا شه‌عبی و هه‌ڤالبه‌ندێن وان یانی به‌ره‌یێ خیانه‌تا 16ێ جۆتمه‌ها 2017ێ ب هه‌ڤرا ب ئاوایه‌ک پلانکری ئێریشێ سەر پەدەكێ دکن و ئه‌ڤ ئێریش که‌ته د واره‌ک پراكتیکی دا.
ل ڤێ ده‌رێ دو خالێن گه‌له‌ک گرینگ ده‌ردکه‌ڤن پێش.
یه‌که‌م: ل هەمبه‌ر ڤان ئێریشان پەدەكێ ب ته‌نێ دیتنا خوه ژ رایا گشتی را راگەهاندیه و ڤان ئێریشان شه‌رمه‌زار دکه. لێ گه‌لۆ پەدەكێ باوه‌ری ب وێ یه‌کێ هه‌یه کو، ته‌هدیدا هه‌ری مه‌زن ل سه‌ر باشوورێ کوردستانێ و ده‌ستکه‌فتیێن دیرۆکی یێن کوردا پەكەكە و هه‌ڤالبه‌ندێن خوه نه؟ ئه‌گه‌ر پەدەكە نه د ڤێ باوه‌ریێ دا به، ره‌وشا هه‌یی و پەكەكێ ب خوه باش شرۆڤه نه‌که نکاره ته‌هدیدا هه‌یی ببنه. گه‌لۆ وه‌ک پرسه‌کێ، د ناڤا ره‌فێن پەدەكێ دا، د ناڤا دام و ده‌زگه‌هێن پەدەكێ دا، د ناڤا مه‌دیا پەدەكێ دا سه‌مپاتیزانێن پەكەكێ هه‌نه یان نا؟ ژ زاخۆ هه‌تا هه‌ولێر چقاس پەكەكەیی هه‌نه و چالاکیێن کو دکن چقاس تێ زانین؟ وه‌ک دن هنده‌ک ده‌زگه‌هێن پەكەكێ ڤه گرێدایی ب چ سیفەت ل باشوورێ کوردستانێ لقێن خوه ڤه‌دکن؟ گه‌لۆ ل گۆرا ده‌ستورا کوردستانێ یاسایینه؟
ئه‌ڤ چه‌ند پرسێن سه‌ره‌که‌نه. پێوسته پەدەك ل سه‌ر ڤان پرسا سه‌رێ خوه پیچه‌کی بێشینه.
دویه‌م: ل هەمبه‌ر ڤان ئێریشێن پەكەكە ل دژی پەدەكێ دکه، هه‌لوه‌ستا ئالیێن سیاسی چییه؟ گه‌له‌ک پارتی و رێخستن ل کوردستانێ ده‌ما بوویه‌ره‌ک دقەومە، د جھ دا داخوویانیا ده‌رتێخن. گه‌له‌ک جارا کامپانیا ژ بۆ “یه‌کێتیه‌ک نه‌ته‌وەیی“ ل دارتێخن. به‌حسا یه‌کێتیا “کوردا“ دکن. باشه ئیرۆ ده‌ما ئا‌شکه‌ره پەكەكە ئێریشێن دژوار دبه سه‌ر پەدەكێ چما بێ ده‌نگن؟ ئه‌وێن ئیرۆ ل هەمبه‌ر ڤان ئێریشان بێ ده‌نگن، نابە سبه‌ھی ده‌ما پەدەكە وه‌ک مافه‌ک ره‌وا خوه بپارێزه، وه‌ک جاران بقێرینن و ده‌ست ب داخوویانیا بکن و به‌حسا هه‌موو گۆتنێن کو ناڤه‌رۆکا وان ژ ئالیێ پەكەكێ ڤه هاتی ڤاله‌کرن بکن. وه‌ک “ شه‌رێ براکوژی“ وه‌ک “یه‌کێتیا نه‌ته‌وەیی“ و وه‌کی دن.
ل به‌غدایێ ده‌ما ئێریشێ ئاڤاهیا پەدەكێ کرن سڤکاتی ب ئالا کوردستانێ کرن، سه‌رۆک بارزانی د داخویانا خوە دا بالا هه‌رکه‌سه‌کی دکشنه و دبێژه: یێن كو بخوازن ئێریشی سەر پەدەكێ بکن و سڤکایه‌تیێ ب بهایێن گه‌لێ کوردستانێ بکن، داویێ ھەر دێ ئەو باجا كریارێن خوه بدەن.
نووچه/ئانالیز
2020.10.19
