نڤیسار

ئێزدى و رەسەناتیا نەتەوەیی

مورا رەسەناتى یا هەر مللەتەکی د زمان، کەلتور و داب و نەریتێن وی دایە، نەخاسمە ئەگەر ل ناف وى مللەتى دا پێکهاتێن ئاینى یێن جودا جودا هەبن و دەستهەلاتەک هەبیت هەڤسەنگیێ و دادپەروەریێ پەیرەوبکەت بو هندێ كو پرنسیپێ هاولاتىبوونێ د سەر جیاوازیێن ئاینى ونەتەوەیی را بیت. چونکە دلنیا بوونا هەر تاکەکی د بازنێ پرنسیپێ هاولاتىبوونێ دا پتر ئنتمائا ویا نەتەوەیی و دیسان هزر و هەستا نەتەوەیی بهێزتر لێ دهێن، چونکە ژ هەمى لایەکێ ڤە ئەو پێکهات یان تاکەک ب تەنا خوژى هەست ب وێ دادیێ دکەن.

ئەم، ل بەرەبابێن پشتى سەرهلدانا پیروز، مە ئێزدى چەوا نیاسى نە مە ل پەروەردا مالێ و پەروەردا مەیا ئاینى ژى هندەک قیەمێن گەلەك بلند هەنە مروڤى بەهایێ خو هەیە و ئاشنا بوونا مە دگەل ئێزدیان لسەر بنەمایەکێ گەلەك گرنگ بویە، ئەوژى کو کوردێن رەسەنن و خودان پێگەهـ و مێژو و ئاینەکن لناڤ وى ئاینى دا زمان و خودا پەرستی هەمى ب کوردى یە لەورا دەمێ ناسناڤێ رەسەناتیێ هاتیە پەخشین ژلایێ جەنابێ سەروک بارزانى ڤە بو تەڤایا مللەتێ کورد تشتەکێ چاڤەرێ کرى بویە و دەست هەلاتێن هەرێمێ ژى بێ جیاوازیا ئاینى سەرەدەرى دگەل هەمى پێکهاتێن ئاینى کریە و نەخاسمە ئێزدیان.

دەمى ئێزدى یان مەسیحى و پێکهاتێن دیێن ئاینى د كەش و هەوایەک ئارام و ئازاد دا رێ ورەسمێن خویێن ئاینى دکن دگەل برایێن خویێن موسلمان و خەلکێ باوەردارێ موسلمان رێزێ ل وان بگریت ب هەمى شێوەکێ وبەشدارى بن ل خوشى و نەخوشێن هەڤدوو گومان تێدا نینە گیانێ لێبورینا ئاینى دێ قولتر لێ هێت و پێکڤەژیانا نەتەوەیی و ئاینى دبیتە بنەمایەک کو هەتا دونیا هەیە کورد شانازیێ پێ بکەت.

 ئەم نەشێن رولێ حکومەتێ و سەروک وەزیران ڤەدەربکەن ژ دورست کرنا ئەڤى کەش و هەوایێ ئارام و ئازاد بو پێکهاتێن دیێن ئاینى، چونکە ب راستى ژى رولێ وان هندە کاریگەرە دلنیا بوونا دایە گشت پێکهاتان کو ل کوردستانێ هیج جیوازیەک دنافبەرا رەش وسپى و موسلمان وئێزدى دا نینە، دبیت لڤێرە یان ل جهەکێ دى هندەک رەفتارێن کەسوکى بهێنە کرن بەلێ ئەو نە دەربرینا مللەتەکی یە و ئەو رەفتارە نەشێن خو ب سەپینن وەکو مورکەکا نەتەوەیێ بەلکو ل بازنێ توندرەویێ دا دهێنە پێناسەکرن و ئەڤە ژى تشتەکێ سروشتى یە کو هندەک کارێن بڤى رەنگى هەبن.

لەورا ئەڤروکە دەنگێن نەشاز لناڤ هندەک گروپێن کرێگرتى هەنە چ موسلمان یان ئێزدى هەول دانا دکن وێ مورکا نەتەوەیی یا رەسەن ژ ئێزدیان ڤەکن ب بەهانەیێن جودا جودا، بەلێ ئەڤ رەسەناتیە یا قولە دگەل مێژویا مللەتێ کورد و یا ب ئاسان نینە ئەڤ رەسەناتیە بهێتە لاوازکرن بەلکو ب هەبونا کەسانێن دلسوز و وەفادار ئەڤ رەسەناتیە دێ بهێزتر لێ هێت.

مرنا میرێ ئێزدیخانێ، نەبتنێ بو ئێزدیان، بەلکو بو گشت پێکهاتێن ل کوردستانێ ژدەست دانەک مەزن بویە و بەشداربوونا بەرفراوانا هەمى پێکهاتان ل رێ ورسمێن پێشەوازى کرنا تەرمێ میرێ ئێزدیخانێ ئاماژە و نیشانا رەسانەتیا کوردێن ئێزدى د مێژوەیێ دا دوپات دکت و جارەکا دیژى پەیامەک دیە بو گشت گروپێن توندرەو کو کوردستان وەکو باخچەیەکێ یە ب گولێن رەنگا ورەنگ جوانە و ئێزدى ژى ئەو گولێن بێهن خوشن لناڤ ئەوى باخچەیێ دا.

رەمەزان نصرالدین کێڤلى

05.02.2019

Back to top button