پارتیا كاركەرێن كوردستانێ (پەکەکە) ئێش و زارێن ڕۆژاڤا ژ خوه ڕا کر پرۆپاگاندا و ڤێ یه‌کێ ژی وه‌سا کر کو وه‌که به‌رێ کورد و جیهان پشتگیریێ نه‌دن ڕه‌وشا گه‌لێ کورد ل ڕۆژاڤایێ کوردستانێ.
پشتی ئێریشا ترکیێ بۆ سه‌ر ڕۆژاڤایێ کوردستانێ، جیهان هه‌موو ل سه‌ر ڕه‌وشا گه‌لێ کورد ل ڕۆژاڤایێ کودستانێ هاته ده‌نگ و هه‌ر وه‌لاته‌کی باوئاوایه‌کی ده‌نگێ خوه بلند کر و نه‌رازیبوونا خوه ل هه‌مبه‌ر ئێریشا ترکیێ بۆ سه‌ر ڕۆژاڤایێ کوردستانێ دیار کر. چەند ده‌وله‌ته‌کێن کێم نه‌بن، هه‌ما بێژه هه‌موو ده‌وله‌تان ل دژی داگیرکرنا ڕۆژاڤایێ کوردستانێ و باکورێ سوریێ ده‌رکه‌تن، پرسا کورد که‌ته د ڕۆژه‌ڤا جیهانێ دا، پرسا کورد که‌ته سه‌ر مێزا نه‌ته‌وه‌یێن یه‌کگرتی و پارلامنه‌تۆیا یه‌کێتیا ئه‌ورۆپایێ.
ئه‌ڤ جارا یه‌که‌م بوو کو ب ڤێ جۆشا مه‌زن ڕایا گشتیا یا ئەمریکایێ ل پرسا کوردی خوه‌دی ده‌ردکڤه و ل دژی بریارێن سه‌رۆک دۆنالد ترومپ ڕاوه‌ستن، ڕه‌وشا ڕۆژاڤایێ کوردستانێ و ئێریشا ترکیێ بۆ سه‌ر کوردان مژرا گه‌رم یا جڤینێن کۆنگه‌رس و ساناتا ئەمریکایێ بوو.
ژ بلی باکورێ کوردستانێ، کورد ل هه‌ر ده‌رێ، ل سه‌رتاسه‌ری جیهانێ داکه‌تن جاده و کۆلانان و ب میتنگ، خوه‌پێشاندانان و ب چالاکیێن جودا ئێریشا ترکیێ بۆ سه‌ر ڕۆژاڤایێ کورددتانێ شه‌رمه‌زار کرن.
لێ مخابن، پەکەکێ ڤێ جارێ ژی ئه‌و هه‌یه‌جان و پشته‌ڤانیا مه‌زن یا جیهانێ ژ بۆ پرسا کورد ل ڕۆژاڤایێ کوردستانێ به‌رهاڤێتی کر و ب هنده‌ک تشتێن بچووک و درووشمێن ناڤەرۆك ڤالا دلێ ڕایا گشتیا جهانێ و کوردێن ده‌رڤه‌یی سیاسه‌تا پەکەکێ سار کر و ب وێ ته‌ڤگه‌را خوه پەکەکێ پشتەڤانیا جیھانێ كر قوربانیا بەرژەوەندیێن خوە یێن حزبی و ب ڤێ یەكێ ئێدی هێدی-هێدی ئه‌و هه‌یه‌جان و پشتگریا جیھانی نامینە و ئه‌ڤ ده‌لیڤا زێرین ژی ژ ده‌ست دچه.
وه‌که چ؟
د هه‌موو میتنگ و خوه‌پێشاندانێن پشتگریا ڕۆژاڤایێ کوردستانێ و شه‌رمه‌زارکرنا داگیرکه‌ریا ترکیێ دا ل شوونا کو وێنه‌یێن شه‌هیدان، وێنه‌یێن بریندارێن چه‌کێ فسفۆرێ و کیمیایی، وێنه‌یێن ژن و زارۆکێن بریندار و گوند و وارێن کاڤلکرێ هلده‌ن، پەکەکێ و ئالیێن ب وێ ڤه گرێدایی، وێنه‌یێن سه‌رۆکێ خوە عه‌بدولا ئۆجه‌لان، ئالا و سه‌مبۆلێن پەکەکێ هلدان، ده‌ست ب درووشم و سلۆگانێن سیاسه‌تا پەکەکێ کر منا: ئازادییا ئۆجه‌لان ئازادیا کوردانه، ئازادی ژ بۆ ئۆجه‌لان …..
پەکەکێ ب ڤێ ته‌ڤگه‌را خوه ڕه‌وش، ئێش و ئازارێن خه‌لکێ ڕۆژاڤایێ کوردستانێ ئیستیغلال کر و ژ بۆ پرۆپاگاندا خوه‌یا حزبی بکه بکارانی. ده‌ما ڕایا گشتی یا جیهانێ و کوردێن ده‌رڤه‌یی سیاستا پەکەکێ ئه‌و یه‌ک ب چاڤێن خوه دیت، ئێدی خوه ژ چالاکی و پیشاندانان ڤه‌کێشا و جیهان ژی وه‌ک به‌رێ ل سه‌ر چالاکیێن پشتەڤانیا ڕۆژاڤایێ کوردستانێ نه‌گه‌رمه.
NH
2019.11.06
