سه‌رۆککۆمارێ ترکییێ ڕه‌جه‌پ تەیییپ ئه‌ردۆگان، پشتی سه‌ردانا خوه یا چینێ د بالافرێ دا ژ ڕۆژنامه‌ڤانان را گۆت، “کی ڤێ پێڤاژۆیێ تێک بده دێ به‌ردێلا وێ بده.”
ڕۆژنه‌مه‌ڤانان د ده‌ربارێ سیاسه‌تا ته‌ڤاهی یا ترکییێ دا پرس ژ ئه‌ردۆگان کرن. ڕۆژنه‌مه‌ڤانه‌کی ئه‌ڤ پرس کر:
پرس: گۆتنێن وه “که‌سێن کو به‌رێ خوه بدن ئه‌نقه‌ره و شامێ دێ ب سه‌ر بکه‌ڤن، لێ یێن کو قیبلا خوه وندا بکن و ل هەڤالبەندێن نوو بگه‌رن دێ وندا بکن” د ناڤ ئیسرائیلێ دا نه‌ره‌حه‌تیه‌ک مه‌زن چێکریه وداخویانیێن ل دژی ترکییێ دانه. گه‌لۆ ئیسرائیل هه‌ول دده کو ب ئاڤێتنا گاڤان ب ڕێیا یەپەگێ ل سووریه‌یێ پێڤاژۆیا هه‌ڤگرتنا نه‌ته‌وه‌یی و براتییا به‌رده‌وام یا ل ترکییێ سابۆته بکه؟ گه‌لۆ ئیسرائیل بوو کو، ته‌ڤی په‌یمانێ، ڕێ ل به‌ر ته‌ڤلیبوونا یەپەگێ د ناڤ ئارتێشا سووریه‌یێ دا گرت؟
به‌رسڤا ئه‌ردۆگان: ئه‌م ل جیرانێ خوه سووریه‌یێ بەختەوەری و ئاشتیه‌ک مایینده دخوازن، و ئه‌م یه‌کیتی و هه‌ڤگرتنێ گرینگ دبینن. بوویه‌رێن داوی نیشان دان کو بێئارامیا ل سووریه‌یێ هه‌ری زێده باندۆرا خوه ل مه دکه. دڤێ ئه‌م ڤێ یه‌کێ باش بزانن. ئه‌م دێ چاڤێن خوه ژ که‌سێن کو دخوازن ل ئاخا سووریه‌یێ بێئارامیێ بئافرینن نه‌گرن، و حکومه‌تا شامێ ژی ڕازی نابه. ئه‌م دخوازن سووریه، ب هه‌موو ڕه‌نگێن خوه ڤە، یه‌کگرتی به و وه‌لێ بمینه. سه‌رۆککۆمارێ سووریه‌یێ ئه‌حمه‌د شه‌رع و ڕێڤه‌به‌ریا وی نێرینێن مه پارڤه دکن. لێ وه‌کی ل هه‌موو هه‌رێمێن کو شه‌ره‌کی ئه‌وقاس درێژ ده‌رباس کرنه، گه‌له‌ک که‌س هه‌نه کو دخوازن ل سووریه‌یێ بەرەلایێ بچینن. ئه‌م دزانن ئه‌و کی نه. ژ به‌ر ڤێ یه‌کێ، ئه‌م د سووریه‌یێ به‌رنەدن. ئه‌م دێ هه‌ر تم ل کێله‌کا وان بن. ب ئیزنا خوه‌دێ، که‌س نکاره ڕێ ل به‌ر سه‌رهلدانا سووریه‌یێ بگره. سه‌رله‌شکه‌رێن کو ژ کاۆسێ سوود وه‌ردگرن، ڤێ جارێ دێ وندا بکن. گه‌لێ سووریه‌یێ، ب هه‌موو به‌شێن خوه ڤە، چ عه‌ره‌ب، کورد، ترکمه‌ن، عه‌له‌وی، سوننی، ئان کرستیان، دێ ب سه‌ر بکه‌ڤه. ئه‌ز دخوازم ڤێ یه‌کێ پر ئاشکه‌ره بکم: هه‌ر که‌سێ کو هه‌ول بده ڤێ پێڤاژۆیێ تێک بده، دێ به‌ده‌لا وێ بده. کورد، ل کو ده‌رێ بژین، خوشک و برایێن مه نه. که‌س نکاره مه ژ هه‌ڤ جودا بکه. که‌س نکاره براتییا مه یا هه‌رهه‌یی را که‌مینێ ده‌ینه. ئه‌م ب بریارن. چاوا کو گۆشت ژ هه‌ستیێ نایێ ڤه‌قه‌تاندن، براتییا مه ژی نایێ ڤه‌قه‌تاندن. گه‌ر ئه‌م ب پێشبینی، ئاقلمه‌ندی و ئاقلێ سه‌لیم ته‌ڤبگه‌رن، هه‌ر پرسگرێک دکاره وه‌ره چاره‌سه‌ر کرن. لێ بێیی نیه‌تا باش، پرسگرێکێن هه‌ری هێسان ژی دکارن بکه‌ڤن ڕه‌وشه‌ک بێ چاره‌سه‌ریێ دا.
پرس: پشتی بریارا هلوه‌شاندن و بێچه‌ککرنا ڕێخستنا ”ته‌رۆریست” ئا پەکەکێ، کۆمیسیۆنا پەرله‌مه‌نتۆیێ یا کو د چارچۆڤه‌یا پێڤاژۆیا “ترکیه‌یا بێ ته‌رۆریزم” دا هاتیه دامه‌زراندن، دێ پێشی چ گاڤێن به‌ربچاڤ باڤێژه؟ ل سه‌ر ڤێ مژارێ هن نیقاش هه‌نه. گه‌لۆ کۆمیسیۆن دێ ڕێزکنامه‌یێن قانوونی ژی د ناڤ خوه دا بگره؟ د قۆناخا یه‌که‌م دا هێڤیێن وه چ نه؟
به‌رسڤ: کۆمیسیۆنا هه‌ڤگرتنا نه‌ته‌وه‌یی، براتی و ده‌مۆکراسیێ، کو د ناڤا مه‌جلیسا مه‌زن یا نه‌ته‌وه‌یی یا ترکیه‌یێ دا هاتیه دامه‌زراندن، ب به‌شداریه‌کا به‌رفره خه‌باتێن خوه ددۆمینه. من ب سه‌رۆکێ مه، نومان کورتولموش، را ل سه‌ر خه‌باتێن کۆمیسیۆنێ ب ته‌له‌فۆنێ ئاخڤی. مه ب دلسۆزی ئه‌ڤ پێڤاژۆ گەهاندنه قۆناخه‌کێ. ئه‌و دێ ب هه‌مان بریارداریێ د پاشه‌رۆژێ دا ژی به‌رده‌وام بکن. ئه‌ز باوه‌ر دکم کو، د داویێ دا، ترکیه دێ پرسگرێکه‌ک ٤۰ سالی ژ هۆلێ ڕاکه و ب یه‌کیتی و یه‌کگرتی به‌ر ب پاشه‌رۆژێ ڤه بمه‌شه. د مژاره‌کا وها یا تێکلداری پاشه‌رۆژا ترکیه‌یێ دا، یا باش ئه‌وه کو، مرۆڤ نه ل سه‌ر گۆته‌گۆتان، لێ ل سه‌ر داخویانیێن کو ب جددیه‌تا ده‌وله‌تێ هاتنه کرن بسه‌کنه. مه هه‌م نه‌خشه‌رێیا خوه و هه‌م ژی ئارمانجا خوه ب زه‌لالی دیار کریه. چاڤکانیێن کو ژ بۆ تێکۆشینا ل دژی ته‌رۆرێ هاتنه ڤه‌قه‌تاندن، ئێدی دێ به‌ر ب پێشکه‌فتن، هلبه‌رین، ڤه‌به‌رهێنان و کار ڤه وه‌رن ڕێکرن. سه‌رکه‌تییێن ترکیه‌‌ک بێ ته‌رۆر دێ هه‌می ترکیه بن، و سه‌رکه‌تییێن هه‌رێمه‌ک بێ ته‌رۆر دێ هه‌می گه‌لێن برا یێن ل هه‌رێما مه بن.
