ئەركا باكوریان ل ھەمبەر باشوور
نوری چەلیك
ئه‌ز دخوازم د ڤێ نڤیسا خوه دا پێدڤیتیا مناقه‌شه‌یا پرسگرێکا چاره‌سه‌ریا پەكەكێ یا كو ب ته‌ره‌فێ کوردان ڤه گره‌دایی و ب تایبه‌ت ژی ئه‌رکا سه‌ر ملێ کوردێن باکورێ کوردستانێ بدم دیار كرن. ئیرۆ هه‌رێمه‌ک ژ وه‌لاتێ مە کوردان، باشوورێ کوردستانێ، به‌ر ب ده‌وله‌تە‌کا سه‌ربخوه ڤه دچه، پێنگاڤێن پاشه‌رۆژا سه‌رخوه‌بوونا کوردستانێ ل وێ پارچەیا كوردستانێ تێن ئاڤێتن.
دڤێ ئه‌ڤ سه‌ربلندی جھێ دلخوەشیا هه‌ر کورده‌کی به، هه‌ر کورده‌ک ده‌ستێ ئالیکاری و پشتگریێ درێژی ڤێ پارچەیا كوردستانێ بکه دا کو ڕۆژه‌ک به‌ری ڕۆژه‌کێ کورد چاره‌نڤیسا خوه ب ده‌ستێ خوه بنڤیسن.
د ده‌مه‌ک وه‌ک ئیرۆ دا کو داگیرکه‌رێن کوردستانێ ب هه‌ر ئاوایی ئێریشی باشوور دکن و دخوازن ده‌ستکه‌فتیێن هه‌یی ژ هۆلێ ڕاکن، مافێ چو کورده‌کی نینە کو ڤێ ئارامی و ئاهه‌نگییا هه‌یی ژ بۆ به‌رژه‌وه‌ندییێن ئۆل ئان هه‌ره‌ما خوه تەڤ بده.
سه‌رۆک و ده‌زگه‌هێن باشوورێ کوردستانێ ژی دڤێت ل گۆر حه‌قیقه‌ت و به‌رژه‌وه‌ندییێن کوردستانێ خزمه‌تێ بکن. د ئاڤابوونا هه‌ر ده‌وله‌ت و ده‌زگه‌هه‌کێ دا خه‌له‌تی و کێماسی چێدبن. سازکرن و برێکووپێکبوونا وێ ده‌وله‌تێ هه‌وجه‌یی ب زه‌مانه‌کی دوور و درێژ هه‌یه.
هه‌لبه‌ت دڤێ ئه‌و خه‌له‌تی یان کێماسییێن کو تێن دیتن ب زمانه‌کی برا‌تی و دۆستانی بێن ڕه‌خنه کرن. لێ گاڤا ڕه‌خنه ژ ڕه‌خنه‌بوونا خوه ده‌رکه‌ت و بوو چه‌کا پاراستنا به‌رژه‌وه‌ندییێن هه‌رێمی، وێ ده‌مێ سینۆرێن ڕه‌خنه‌کرنێ ژ هۆلێ تێن ڕاکرن و دژمناتی ده‌ستپێدکه. ئه‌ڤ ژی خزمه‌تا دژمن و خێرنه‌خوازێن کورد و کوردستانێ یه.
ئه‌ز باوه‌ر ناکم (ژ بلی سه‌رۆک و هندەك ڕایه‌دارێن پەكەكێ) کورده‌ک ڕابه بێژه:”ئه‌ز کوردستانه‌کا سه‌ربخوه یان ژی فه‌ده‌رال ناخوازم”. د دلێ هه‌ر کوردی دا خه‌ون و خه‌یالا کوردستانا مه‌زن و یه‌کگرتی هه‌یه. لێ شه‌رتان وسا کریه کو ئه‌م بخوازن و نه‌خوازن، کوردستان چوار پارچه یه، کورد د وه‌لاتێن خوه دا ژ هه‌ڤ هاتنه تاروومار کرن. 4 هه‌رێمێن جودا و هه‌ر یه‌ک ژ وان دخوازه ب سه‌رێ خوه ببه هه‌رێمەكا سه‌ره‌کی.
گاڤا ئه‌م هه‌ژمارا کوردان بدن سه‌ر هه‌ڤ، باکورێ کوردستانێ به‌شێ هه‌ری مه‌زنه. گاڤا ئه‌م ل گۆرا هه‌ژمارێ بلڤن، هنده‌ک دکارن بێژن كو دڤێ باکوری سه‌په‌رشتیا کوردا بکن. لێ كەدوارێ هه‌یی مرۆڤان مه‌جبوری ده‌فاكتۆیا هه‌یی دکه کو، ئه‌و ژی ئه‌وه هه‌رێمه‌ک ژ هه‌رێمێن کوردستانێ ئازادیا خوه بده‌ست خستیه.
دڤێ ئه‌م کورد ڤێ ده‌ستکه‌فتنێ د قادا ناڤده‌وله‌تی دا باش ب کار بینن دا کو هه‌رێمێن دن ژی ب کاربن وان ده‌ستکه‌فتنا ب ڕیه‌کا یاسایی بێخن ڕۆژه‌ڤا جیهانێ. کوردێ ل هه‌رێمێن نه ئازاد کری د ڤی واری دا خوه‌دی مافن. لێ وه‌ک مه ل ژۆر ژی به‌حس کر، پارچه‌بوونا کوردستانێ کورد د هه‌ر واری دا تاروومار کرنه. ژ به‌ر ڤێ ژی، دڤێ په‌نجه‌را ڕۆناهیا باشوورێ کوردستانێ وه‌ک ڕۆناهیا چاڤان بێ پاراستن. و دڤێ ئه‌م چو فه‌رقیێ نه‌خن ناڤبه‌را نەتەوەیا ا خوه دا.
چەوا کو سه‌رۆکێ نەمر مسته‌فا بارزانی د ده‌ما خوه دا گۆتبوو: “چ که‌سێ کو ڕوحێ نه‌ته‌وه‌پارێزیێ پێ ڕا چێنه‌بووبه، دێ ڕۆژه‌ک ژ ڕۆژان خیانەتێ ل گه‌لێ خوه بکه” ئه‌ڤ گۆتن ژ بۆ ئیرۆ و ژ بۆ هه‌ر ده‌مێ ژی ده‌رباس دبه.
ئیرۆ پرسگرێکا سه‌ره‌کی یا د ناڤ کوردان دا، پرسگرێکا پەكەكێ و کوردێ ده‌رڤەیی پەكەكێ یه. هه‌ر چقاسی هه‌بوونا پەكەكێ ل قه‌ندیل و ل ده‌ڤه‌رێن دن ژبۆ حکوومه‌تا کوردستانێ سه‌رێشاندنه‌کێ ب خوه ڕه بینه ژی، دڤێ ژ باشوورییان زێده‌تر ئه‌م کوردێن باکور سه‌رێ خوه ب ڤێ پرسگرێکێ ڤە بێشینن.
د داخویانی و هه‌لوه‌ستێن هنده‌ک ڕایه‌دارێن پەكەكێ دا ئاشكەرا دبە کو، تێكەلیێن هه‌رێما کوردستانێ ب داگیرکه‌رێن جیران ڕا ئه‌و نه‌ره‌حه‌ت کرنه. ئەگه‌ر پەكەكە بشێت ئەگەرێ نه‌ره‌حه‌تیا خوه ل سه‌ر ئه‌ساسێ کوردایه‌تیێ ژ ده‌وله‌تا فه‌ده‌رال یا کوردستانێ ڕا زەلال بكە، ئه‌ز باوه‌ر دكەم دێ وه‌ک ده‌وله‌ت، هه‌رێما کوردستان ژی شێت چاره‌سه‌ریه‌کێ ژ نه‌ره‌حه‌تیا پەكەكێ ڕا ببینه. ژ خوه به‌یانێن سه‌رۆکێ کوردستانێ یێ د وی واری دا پر زه‌لالن. سه‌رۆکێ کوردستانێ د هه‌ر دەرفەتێ دا تەئكیدێ ل سەر چاره‌سه‌ریا ب ڕێیا دیالۆگ، بێچه‌کبوون و ده‌مۆکراتیک دكە.
دڤێ ئه‌م باکوری ھەر ژ نها بزانین کو، ئه‌گه‌ر سبەھی یان دوسبە باکورێ کوردستانێ ئازاد بوو، دێ ئه‌ڤ پرسگرێکا پەكەكێ ل باکور ژی ده‌ستپێبکه. پرسگرێکا هه‌یی پرسگرێکا ته‌مامێ کوردستانێ ژی به، دڤێ ئه‌م باکوری ژ ئیرۆ پێدا ب به‌رپرسیاری ته‌ڤ بگه‌رن و خوه‌دی سیاسه‌ته‌ک نه‌ته‌وەیی بن. یان نە، سبەھی ئه‌م ژی دێ ببن قوربانێ شده‌تا پەكەكێ. وێ گاڤێ ئه‌م ژی دێ كەڤن وێ ڕه‌وشا کو نها ل باشوور د ناڤبه‌را داگیرکه‌رێن کوردستانێ و هه‌موه‌لاتیێ وێ‌دا هه‌یە.
پرسگرێکا چاره‌سه‌ریا پرسگرێگا پەكەكێ و خوه‌دیلێده‌رکه‌تنا وێ، نه ئه‌رکا باشووره. ئه‌گه‌ر ل باشوور پرسگرێکا نەھێلانا پەكەكێ هه‌به، ئه‌رکا پێشین دکه‌ڤه سه‌ر ملێن باکورییان بخوه و دڤێ ئه‌و ل خوه و ل ده‌سکه‌فتیێن خوه خوه‌دی ده‌رکه‌ڤن.
دڤێ د سه‌ری دا پەكەكە ب ڕێیێن ده‌مۆکراتیک ل چاره‌سه‌رییا ڤێ پرسگرێکێ بگه‌ره. لێ گاڤا پەكەكە وان ده‌ستکه‌فتیێن کوردان بکه قوربانا شه‌خس یان هه‌رێمه‌کێ، دڤێ ئه‌م کوردێن باکور ب ده‌نگه‌ک بلند نه‌ڕازیبوونا خوه ل هەمبه‌ر هه‌لوستێن پەكەكێ یێ نه د به‌رژه‌وه‌ندیا مڵه‌تێ کورد دا رابگەھینن. ئه‌و ڕۆژ ژی ئیرۆ یه…. چونكی پەكەكێ ژ نوو ڤه ده‌ست ب پرۆپاگاندا دژبه‌ریا پارتیا دەمۆكراتا كوردستانێ (پەدەکە) و با‌رزانیان کریه و ب دەرەو و بۆختانان دخوازه ل باشوورێ کوردستانێ هه‌موه‌لاتی ب ناڤێ “خوەپاراستنێ” ل دژی حكوومەتا كوردستانێ و سەروەریا ھەرێما كوردستانێ سەرھلدانێ بكن. ژ بەر ڤێ یەكێ ژی دڤێ ته‌مامێ کوردان ب .ده‌نگه‌کێ بلند بقیرن و بێژن ئێدی به‌سه زلما پەكەكێ
2021.08.29
