ئەز فێر بووم ھەر کوردەک ل کیرا دونیایێ بیت برایێ منە و ھەر بوھوستەکا ئاخا کوردستانێ ل کیرێ بیت وەلاتێ منە
مالپەرا مە، سبەهی، ب هەلکەفتا شۆرەشا گولانێ دۆسیەیەک ڤەکریە ل ژێر ناڤێ: ئەز و شۆرەشا گولانێ.
د ڤێ چارچۆڤەیێ دا چەند پێشـەرگەیێ یێن دێرین بەرسڤا پرسێن
مالپەرا مە ددن کو، یەک ژ وان ژی برێز حەسەن نوری یە.
سبەهی: تو وەک پێشمەرگە یێ دێرین، شۆرەشا گولانێ ژ بۆ تە چیە؟
حەسەن نوری: بێ گومان شۆرەشا گولانێ وەک درێژەپێدەرا شورەشا مەزن یا ئیلۆنێ، سەردەمێ ھەری سەخت و دژوارێ کورد و کوردستانێ دئێتە ھەژمارتن. ئێک: ژبەر کو پشتی چەند مەھەکا ژ نسکویا سالا ١٩٧٥ ێ شورشا گولانێ ھاتە راگەھاندن، ھەر وەسا ژی زولما دوژمنی د بلندترین ئاستێن خوە دا بوو. لێ تەڤی وان سەختی و دژواریان ژی شۆرەشا گولانێ شیا قۆناغەکا ھەرە زێرین یا خەبات و تێکوشینا نەتەوەیی و نیشتیمانی تومار بکەت. قۆناغەک ژ بۆ دووبارە کومکرن و رێکخستنەڤەیا ھێز و شیانێن ملەتێ کورد ب گشتی و ھێزێن سیاسی ل سەر ئاستێ عیراقێ و کوردستانێ ب تایبەتی ژ بۆ ھەرفاندنا کەلاتا زولمێ و ستەمێ.
٢- تو چ ژ وێ شۆرەشێ فێر بووی؟
حەسەن نوری: شۆرەش ئالیەکێ تەندروستمەند یێ ئاڤاکرنا کەسایەتی و کارێکتەرا من و ھەمی پێشمەرگەیان بوو. گەلەک وانەیێن ژیانێ ژ شۆرەشا گولانێ ئەز فێر بووم. وانەیا ژ ھەموویان گرنگتر د جەرگێ تەنگاڤیان دا ب ھیڤی بم و ئومێدێ ژ دەست نەدەم، کاری ژ بو یێن دی بکەم و خوە و حەز و ئارەزویێن کەسی ژبیر بکەم. ژ بەر کو پێشمەرگە ئەو کەس بوو، یێ خوە بشەوتینیت داکو قولاچێن تاری رۆھن بکەت. ئەز ژ شۆرەشا گولانێ فێر بووم ھەر کوردەک ل کیرا دونیایێ بیت برایێ منە و ھەر بوھوستەکا ئاخا کوردستانێ ل کیرێ بیت وەلاتێ منە
٣- تە چ دا شۆرەشێ و شۆرەشێ چ دا تە؟
حەسەن نوری: ل گۆر وێ روحا پر شکودار، پاک و بێگەردا خوەنەویست یا شۆرەشێ دایە من، من دلۆپەک ژی نەدایە شورەشێ بەرامبەر کو شۆرەشێ ئوقیانوسەکێ ھێزێ و خوشەویستیا سەرۆک، ئاخ و ئاڤ و ھەوا و ھەڤچەپەرێن من دایە من. ب راستی چو بەراوردی نائێتە کرن بەرامبەر ئەو تشتێ شۆرەشێ دایە من و ھەبوونا من دناڤا شۆرەشێ دا.
ئەز ل دویماھیێ ڤان گوتنێن خوە دێ بێژم: ئەز د وێ باوەریێ دامە کو چو شۆرەش ژ شۆرەشێن کوردستانێ دادپەروەرتر نەبووینە. چو سەرۆک، ل سەرتاسەری شۆرەشێن جیھانێ، ژ سەرۆک مسعود بارزانی فیداکارتر و رێزانتر و راست و دلوڤانتر نەبوویە. د ھەمان دەم دا ژی کەس وەکو جەنابێ وی و مللەتێ کورد بێ نەسیب و بەخت رەش نەبوویە، چما؟ ژ بەر کو د گەرماتیا پێویستیا جەنابێ وی و مللەتێ کورد ب بابێ روحی مەلا مستەفا بارزانی یێ نەمر هەبوو، وەغەرا دووماھیێ کر، د کوپیتکا پێویستیا جەنابێ وی و مللەتێ کورد ب شەھیدێ جوانەمەرگ شەھید ئیدریس بارزانی هەبوو، ئەوی ژی کۆچاداوی کر، لێ تەڤێ ڤێ ژی سەرۆک مسعود بارزانی و ملەتێ کورد ھەر خوەراگرت و رۆژ ب رۆژ شۆرەشا گولانێ پێشکەفت هەتا داویێ بسەرکەفت
حەسەن نوری
