چیرۆکا ئەلهویێ بەهدینان
سەنتەرێ کۆماتە یێ بەردەوامە د خزمەتا دیرۆکا زێرینا قارەمانێن کوردستانێ دا
چەند مەهەک بوو ئەم وەک سەنتەرێ کۆماتە لگەل دەکۆمەنت هاوسا توڕا مەدیایا رووداو و مالباتا شەهیدی، ئەم مژوولی کارەکی دەکۆمەنتاری بووین ل سەر شەهید شەعبان غەفار (ئەلهویێ بەهدینان).
بخۆشحالی ڤە پشتی ئەڤ فلمە ل چەند دەڤەرەکێن جودا یێن کوردستانێ هاتیە تۆمارکرن، وەکی دەڤەرا شخو، بەرواری بالا، دەڤەرا زاویتە و سەرێ شەرمنێ، ئەم شیاین کارەکی ژ هەژی مەزنیا ڤی شەهیدی پێشکشی گیانێ وی یێ نەمر بکەین.
یا ژ وێ ژی دلخۆشکەرتر ئەو بوو کو ئەم شیاین دوهی 27/3/2025 ڤی فلمی ل هۆلا کۆنفرانسان یا زانکۆیا دهۆکێ نیشابدەین ب ئامادەبوونا پتر ژ 1100 هەڤال و هەڤچەپەرێن شەهیدی و خەلکێ دەڤەرێ.
یا کو هێشتا بها دایە ڤی شەهیدی و دیرۆکا وی، ئامادەبوونا جەنابێ فازل میرانی بەرپرسێ دەستەیا کارگێریا مەکتەبا سیاسی یا پارتییا دەموکراتا کوردستان و بەڕێز ئاکو محەمەد بەرپرسێ توڕا مەدیایا رووداو بوو.
دەستپێکێ پەیڤەک ژ ئالیێ بەڕێز ئاکو محەمەد ڤە هاتە خواندن و پاشی سەیدایێ فازل میرانی ژی پەیڤەکا پڕ بوها پێشکێش کر، د دووڤ دا کاک دلشاد، کوڕێ شەهید شەعبانی، پەیڤا مالباتێ پێشکێش کر و دوماهیێ ژی فلمێ دەکومێنتاری هاتە نیشاندان کو پچەک کێمتر ژ سعەتەکێ بوو.
دوماهیێ ژی مالباتا شەهیدی هەموو مێڤان مێڤانکرنە خورانگەها گەڤەڕکێ بۆ شیڤێ.
ل دوماهیێ ئەم وەک سەنتەرێ کۆماتە ژ دل و جان سپاسیا جەنابێ کاک نێچیرڤان بارزانی جێگری سەرۆکێ پارتییا دەمۆكراتا کوردستان دکەین بۆ پشتەڤانیا جەنابێ وان کو ئەم بشێین ڤێ خزمەتێ پێشکێشی دیرۆکا قارەمانێن کوردستانێ بکەین.
سوپاس بۆ کاک ئاکو محەمەد کو بۆ مە دەرگەهەک ڤەکر دا کو ئەم بشێین خزمەتا دیرۆکا ڤان قارەمانان بکەین.
سوپاس بۆ هەڤالێن دەکۆمەنت هاوسا توڕا مەدیایا رووداو کو کارکرن لگەل وان جهێ دلخۆشیا مەیە.
سوپاس بۆ مالباتا ئەلهویێ بەهدینان شەهید شەعبان کو ب دل و جان لگەل مە بوون بۆ ڤی کارێ پیرۆز.
سەنتەرێ کۆماتە کەتیە سەر ڕێ و گەلەک پرۆژێن دی یێن مەزن ل بەر سینگێ مەنە ژ بۆ خزمەتکرنا دیرۆکا قارەمانێن کوردستانێ.
رزگار كێستەیی
بەرپرسێ سەنتەرێ كۆماتە
