ئەو سياسەتا ئەڤرو ئەمريكا ل ئەفگانستانێ پەیرەو دکەت بەری چوار سالان، ل 16ێ ئوكتوبەرا 2017ێ، ئەو سیاسەت ل کوردستانێ پەیرەو کر بوو.
گەلەک هەفالان د نڤیس و گۆتنێن خوە دا پاشەروژا کوردستانێ دگەل رەوشا ئەڤرۆ یا ئەفگانستانێ بەراورد دكەن و گەلەك ژ وانا وەسا پیشبینی دکەن كو ئەگەر ئەمریكا ئەو هەلوێستێ ئەڤرۆ بۆ ئەفگانستانێ وەرگرتی و ھێزێن خوە یێن لەشكەری ژ وی وەلاتی ڤەكێشاین، ئەو ھەلوێست بۆ عیراقێ و کوردستانێ ژی هەبیت هەمان بوویەر دێ پەیدابن و کوردستان دێ کەڤیتە د مەترسیێ دا.
هەلبەت د سیاسەت و بەرژەوەندیا وەلاتان دا هەمی تشتەک دھێتە چافەرێکرن. بەلێ ب دیتنا من بەری بوویەرێن ئەفگانستانێ ب چوار سالان، ل16ێ ئۆكتوبه را 2017ێ ئەمریکا هەمان بریار و هەلوێستێ ئەڤرو ل ئەفگانستانێ وەرگرتین، دژی هەرێما کوردستانێ و گەلێ کوردستانێ وەرگرت بوون. ئەگەر بەراوردیێ د ناڤبەرا داخویانیێن هەردو سەرۆکێن ئەمریکایێ، یێ بەرێ ترامپ و سەروکێ نوکه جو بایدن دا بکەین دێ بینین هەمان هەلوێستن و چو گوهورینەک نەکەفتیێ.
ل پێش چافێن ئەمریکایێ و ب سەرپەرشتیا قاسم سلیمانی و ب پیشکەفتیترین چەکێ ئەمریکی لەشكەرێ ئیراقێ و حەشدا شەعبی هێرشی سەر هەریما کوردستانێ و پیشمەرگەی کر، ئێک ژ داخویانیێن ترەمپ د وی دەمی دا گوت “گوته مه کورد شەرکەر و ئازانه و مه ژی گوت بلا شەرێ خوە بكەن”. سه روکێ ئەمریکایێ جو بایدن ل سەر بوویەرێن ئەفگانستانێ، ئەفرو ژی گوت “مه پێشبینی نەدکر تالیبان هوسا زوو دێ کۆنترولا ئەفگانستانێ کەن.”
راسته هندەک خالێن هەڤپشک مه دگەل ئەفگانستانێ ھەبوون وەكی گەندەلی و لەشکەرەکێ پری بندیوار و خیانەت، ژبلی ڤێ ژی جوداھیەك مەزن د ناڤبەرا هێزا پیشمەرگەیێ كوردستانێ ، بەراورد دگەل هێزا مەزنا حەشدا شەعبی و لەشکەرێ عیراقێ و چەکێ وان یێ پیشکەفتی، و یا ژهەمیا گرنگنتر، خیانەتا گروپەکێ د ناف یەکێتیا نیشتمانیا كوردستانێ دا كو ژ ئەنجامێ وێ خیانەتێ مه کەرکووک و بەشەکێ مەزنێ کوردستانێ ژ دەست دا. لێ پشتی بەرەیێ خیانەتێ د ناف ھێزێن پیشمەرگەی دا دیار و ئێک لابووی و ب تنێ پارتی و پیشمەرگێ پارتی و قوتابیێن رێبازا بارزانی ماینه دبەروکێن شەریدا و گومانا خیانەت و دودلیێ د پاراستنا ئاخا کوردستاتێ دا نەمای بالانسا شەری دبەرژەوەندیا پیشمەرگەی دا هاته گوهورین، سەرەرای جیاوازیا مەزنا هێزا دوژمنی بەراورد دگەل هێزا پیشمەرگێ پارتی، دوژمن ل هەمی بەروکێن شەری شکەست و ب خوینا سەدان شەهیدان و خوراگریا پارتی و پیشمەرگەی هەرێما کوردستانێ هاته پاراستن و دوباره ڤەگەریا ناڤ گورەپانا سیاسی یا .ناڤنەتەوەیی و بو جهێ گرنگی و پویتەپێدانێ. ئانكو پێشمەرگە ئینتیما و وەلائو ڤیان بۆ ئاخا وەلاتێ خوە ھەبوو
ل ڤێرێ دیاردبیت شکەستنا لەشکەر و حکومەتا ئەفگانستانێ بەرامبەر چەکدارێن تالیبان ژ بلی گەندەلیەکا زێده و بندیوار و خیانەتێ و ژ ئەنجامێ نەبوونا وەلائێ و ڤیانێ بۆ وەلاتێ خوە بوو.
مەرەما من ئەو نینه کو هەرێما کوردستانێ ژ ڤێ تاقیکرنێ دەربازبوویە و ئێدی هیچ مەترسیەک ل سەر مه نەمایە، بەروڤاژی، پێدڤیه ئەم پتر مفای ژ هەلوێستێ ئەمریکایێ و بوویەرێن نوکه ل ئەفگانستانێ روو ددەن وەرگرین و هەرچی زووترە حكومەتا كوردستانێ بەرنامەیێ خوە یێ چاكسازیێ ب كریار بجھ بینە، گەندەلیێ بنبر بكە و لەشکەرەکێ كوردستانێ یێ ئێکگرتی ئاڤا بكە، ھەروەسا ئەڤ چاكسازیێن یەكێتیا نشتمانیا كوردستانێ د ناڤ خوە دا د 2021.06.08 ێ دا دەست پێ كرین، ھێڤیدارین ئەو چاكسازی ببن ئەگەرێ نەهێلانا سەرێن خیانەتکار و پێنگافەکا خێرێ بیت و زەمینەخوشکرن بیت بۆ پەیداکرنا ئێکریزیێ دناڤ مالا كوردی دا.
دەلیل رەمەزان
2021.08.18
