ئەمریکا توندووتووژیێن کەرکووکێ شەرمەزار دکە
جیگرێ به‌رده‌ڤکێ وه‌زاره‌تا ده‌رڤه یا ئەمریکایێ ڤه‌دانت پاته‌ل د کۆنفه‌رانسه‌کا رۆژنامه‌ڤانی دا ل سه‌ر ره‌وشا که‌رکووکێ هه‌لوه‌ستا وه‌لاتێ خوه ئاشکه‌ره کر و گۆت: “ئه‌م توندووتووژیێن ڤان ده‌مێن داوی یێن ل که‌رکووکێ شه‌رمه‌زار دکن و سه‌رساخیێ ژ مالباتێن قوربانیێن خوه‌پێشاندانێن باژارێ که‌رکووکێ را دخوازن.”
ڤه‌دانت پاته‌ل ژ ئالیێن کوردستان و ئیراقێ داخواز کر کو پرسگرێکان ب رێیا دیالۆگێ چاره‌سه‌ر بکن و جیبجیکرنا ماده‌یا ۱٤۰ یا ده‌ستوورا ئیراقێ چاره‌سه‌رکرنا بنگه‌هین یا کێشه‌یێن که‌رکووکێ یە.
ئێڤارا رۆژا شه‌میێ ۲ێ ئیلۆنا ۲۰۲۳ێ، هه‌ژماره‌ک جوانێن کورد یێن نشته‌جیێن تاخێن شۆراو و ره‌حیماوا یێن ل که‌رکووکێ ل دژی گرتنا رێیا سه‌ره‌کی یا هه‌ولێر – که‌رکووکێ ژ ئالیێ هنده‌ک عه‌ره‌ب و ترکمه‌نان ڤه، خوه‌پێشاند کر د خوه‌پێشاندانێ دا ئالۆزی ده‌رکه‌ت و هێزێن ئه‌وله‌هیێ گوله ره‌شاندن سه‌ر خوه‌پێشانده‌رێن کورد یێن بێ چەک.
ژ به‌ر ره‌شاندنا گوله‌یان ژ ئالیێ هێزێن ئه‌وله‌هیێ ڤه ب سه‌ر خوه‌پێشانده‌ران دا، چار وه‌لاتیێن کورد یێن که‌رکووکێ یێن ب ناڤێن “هاوکار ئه‌بدولا، هه‌ڤال ستار، سه‌مه‌د محه‌مه‌د و حسێن سابر” شه‌هید بوون و نێزیکی ۱٥ که‌سان ژی بریندار بوون.
ته‌ڤی شه‌هیدکرن و بریندارکرنا وه‌لاتیێن کورد ل که‌رکووکێ، هێزێن ئه‌وله‌هیێ یێن که‌رکووکێ، چار رۆژنامه‌ڤان و خه‌باتکارێن مه‌دیایێ و دگەل ب دەهان جوانێن کورد ژی ده‌سته‌سه‌ر کرن و یه‌ک ژی بریندار کرن.
