وه‌زاره‌تا ده‌رڤه یا ئەمریکایێ ل سه‌ر هلبژارتنێن شاره‌داریان یێن ڕێڤه‌به‌ریا خوه‌سه‌ر ل ڕۆژاڤایێ کوردستانێ داخویانیه‌ک به‌لاڤ کر و د داخویانیا خوە دا دبێژە: “شه‌رتێن لدارخستنا هلبژارتنان پێک نه‌هاتنه.”
د داخویانیێ ده ئاماژه ب ڕه‌وشا سووریێ و ڕۆژاڤایێ کوردستانێ دکە: “ئامه‌ریکا دنرخینه کو شه‌رت و مه‌رجێن پێویست ژ بۆ لدارخستنا هلبژارتنێن ئازاد، عادل، زه‌لال و به‌رفره‌ه ل باکور و ڕۆژهلاتێ سووریه‌یێ پێک نه‌هاتنه.”
ئەمریکا ژ به‌ر ڤێ یه‌کێ پشتگریێ ناده داخویانیا داوی یا ڕێڤه‌به‌ریا خوه‌سه‌ر ل باکور و ڕۆژهلاتێ سووریه‌یێ.
ئەمریکا ب به‌رده‌وامی ڕاگەهاندیه کو هه‌ر هلبژارتنێن ل سووریه‌یێ چێببن، دڤێ ئازاد، دادپه‌روه‌ر، زه‌لال و به‌رفره‌ه بن و ل گۆری بریارا ۲۲٥٤ئان یا کۆنسه‌یا ئه‌نجوومه‌نا ئه‌وله‌هیێ یا نه‌ته‌وه‌ینێن یه‌کبوویی پێک وه‌رن. شه‌رت و “مه‌رجێن هلبژارتنێن ب ڤی ڕه‌نگی نها ل سووریێ و ل باکور و ڕۆژهلاتێ سووریێ پێک نه‌هاتنه.”
“ل سه‌ر لدارخستنا هلبژارتنان کار بکن”
٥ێ ئیلۆنێ کۆمیسیۆنا بلند یا هلبژارتنان یا ڕێڤه‌به‌ریا خوه‌سه‌ر ده‌ربارێ لدارخستنا هلبژارتنێن شاره‌داریان داخویانیه‌ک به‌لاڤ کر. ڕێڤه‌به‌ریا خوه‌سه‌ر د داخویانیێ ده گۆتبوو: “ژ بۆ کو ل گۆری پێویستیێ ئاماده‌کاریێن پێویست ژ بۆ هلبژارتنێن شاره‌داریان بێن کرن، کۆمیسیۆنا بلند یا هلبژارتنان یا باکور و ڕۆژهلاتێ سووریێ ژ کۆمیسیۆنێن کانتۆنان را ده‌ستوورێ دده کو ل گۆری ڕه‌وشا هه‌ر پارێزگه‌هه‌کێ د ده‌ما کو ئه‌و گونجاو دبینن دا ل سه‌ر لدارخستنا هلبژارتنێن شاره‌داریان کار بکن.”
چ بووبوو؟
ڕێڤه‌به‌ریا خوه‌سه‌ر ا ڕۆژاڤایێ کوردستانێ بریار دابوو کو ۱۱ێ حه‌زیرانێ هلبژارتنێن شاره‌داریان بێن کرن.
لێ ترکیێ پشتی ڤێ بریارێ ئێرشێن خوه یێن ل ڕۆژاڤایێ کوردستانێ زێده کربوون و ژ بۆ هلبژارتن نه‌یێن کرن گه‌ف خواربوو.
ئەمریکا ژی ژ به‌ر نه‌بوونا شه‌رت و مه‌رجێن گونجاو ژ ڕێڤه‌به‌ریا خوه‌سه‌ر خوه‌ستبوو کو لدارخستنا هلبژارتنان پاش بخن.
ل گۆری زانیاریێن کۆمیسیۆنا بلند یا هلبژارتنان یا ڕێڤه‌به‌ریا خوه‌سه‌ر، هلبژارتن دێ ل ۷ کانتۆن و هه‌رێمێن ڕێڤه‌به‌ریا خوه‌سه‌ر یێن وه‌کی شه‌هبا-عه‌فرین، جزیر، منبج، فرات، ته‌بقا، ڕه‌قا، دێره‌زۆرێ بێن لدارخستن.
د هلبژارتنان دا دێ ژ بۆ ۱۲۱ ناڤه‌ندان هه‌ڤسه‌رۆکێن شاره‌داریان و ئه‌ندامێن مه‌جلیسێن شاره‌داریان بێن هلبژارتن.
ڕێڤه‌به‌ریا خوه‌سه‌ر هه‌تا نها ۲ جاران هلبژارتن هاتن لدارخستنە.
کۆمیسیۆنا بلند یا هلبژارتنان بریار دابوو کو ۳۰ێ گولانێ هلبژارتن وه‌رن لدارخستن لێ پاشێ هلبژارتن پاش خستن ۱۱ێ حه‌زیرانێ هاتبوون کرن.
ل ڕێڤه‌به‌ریا خوه‌سه‌ر یا ڕۆژاڤایێ کوردستانێ مافێ ۳ ملیۆن که‌سان هه‌یه به‌شداری ده‌نگدانێ ببن.
ل ئالیێ دن، ئه‌و په‌نابه‌رێن کو زێده‌تری ٥ سالان ل ڕێڤه‌به‌ریا خوه‌سه‌ر نشته‌جه بوونه ژی دکارن به‌شداری هلبژارتنان ببن.
ئه‌نەکەسیێ بریار دابوو کو هلبژارتنان بۆیکۆت بکه.
