سیاسه‌تا ئەمه‌ریکا د ده‌ربارێ پارتیا كاركەرێن كوردستانێ ( پکك) ێ ده نه زه‌لاله. ئالیکارێ جیگرێ وه‌زیرێ ده‌رڤه یێ ئەمه‌ریکایێ ماتیو پالمه‌ر دا زانین کو، ل گۆر بریارا وه‌لاتێ وی ۱۲ ملیۆن دۆلار بۆ گرتنا سه‌رکرده‌یێن پکكێ هاتنه ته‌رخان کرن، ئه‌و ڕێخستنه ب ڕێخستنه‌که ته‌رۆریست بناڤ کر.
ئەمه‌ریکا ژی وه‌ک گه‌له‌ک وه‌لاتێن ئه‌ورۆپایێ ب زمانه‌ک فه‌رمی پکكێ وه‌ک ڕێخستنه‌ک ته‌رۆرست ب ناڤ دکن. ژ بۆ ڤێ یه‌کێ ژی ب ئاوایه‌ک ڤه‌کری و ئه‌شکه‌ره ل گه‌ل پککێ نادن و ناستینن. تو جارا به‌رپرسه‌ک یێ پککێ ل وه‌لاته‌ک یێ ئه‌ورۆپا یان ل ئامه‌رکا ژ ئالیێ به‌رپرسێن خوەدی مەقامێن بلئند یێن وان وەلاتان ڤه نه‌هاتنه پێشوازی کرن. پێوه‌ندیێن ل گه‌ل ڤان وه‌لاتان هه‌بن ژی پیوه‌ندیێن موخابه‌راتی و ڤه‌شارتینه.
ل ڕۆژاڤایێ کوردستانێ ب ئاوایه‌کی هه‌لوه‌ستا ئەمه‌ریکا و هێزێن هه‌ڤپه‌یمانان هاته گوهه‌رتن. پێوه‌ندی ل گه‌ل یەكینەیێن پاراستنا گەل ( یپگ)ێ دانین و پشگریا یپگێ کرن و دکن. ئەمه‌ریکا ژی وه‌ک هه‌رکه‌س و ئالیەك دن دزانه کو یپگ وپید ژی و ده‌زگه‌ھ و ڕێخستنێن ل سوریه و ڕۆژاڤایێ کوردستانێ ب وان ڤه گرێدایی ، د بنگه‌هێ خوه ده پکک نه، چ جوداهیا وان ژ پککێ نینە.
ئانكو پارتیا یەكێتیا دەموكرات ( پید) لقەكا پککێ ل سوریه و ڕۆژاڤایێ کوردستانێ یه. تێ زانین کو یپگ ل سوریه و هه‌رێمێن نه کوردستانن ب داخوازیا ئەمه‌ریکایێ شه‌رێ داعیشێ دکه. لێ ژ ئالیه‌ک دن ئەمه‌ریکا پککێ ته‌رۆرست دبینه و ژ بۆ گرتنا به‌رپرسێن هه‌ری بلند یێن پککێ خه‌لاتا په‌ره‌یان داتینه.
ژ سه‌ری ده ئەمه‌ریکا ژ پید/یپگێ داخواز دکه کو خوه ژ پککێ جودا بکن. ل سه‌ر ڤێ یه‌کێ کار دکه. ژ به‌ر کو ئەمه‌ریکا ژی دزانه کو ، بریارا پید/یپگێ ژ قه‌ندیل تێ و قه‌ندل ڤێ ته‌ڤگه‌رێ ڕێڤه دبه، هه‌تا ده‌مه‌کی بەرێ ئەمه‌ریکا ژ پیدێ داخواز کر کو نابە که‌سێن ژ کوردستانا باکور ل ڤێ ده‌ڤه‌رێ بەرپرسیاریا وان ھەبە. پید ئه‌ڤ داخوازیا وان ب جھ ئانین.
ئەمه‌ریکا ژ ئالیه‌کی بریارا گرتنا سه‌رۆکێن ڤێ ته‌ڤگه‌رێ دده ژ ئالیه‌ک دن ژی پشتگریا هه‌مان ته‌ڤگه‌رێ ل کوردستانا ڕۆژاڤا و سوریه دکه. دێ هه‌تا که‌نگێ ئەەمه‌ریکا ڤێ پشتگریێ به‌رده‌وام بکه ناھێت زانین. به‌رژه‌وه‌ندیێن ئەمریكایێ چه‌وه دخوازه وه‌لێ دکن، لێ پید/یپگ حه‌سابێن مه‌زن دکن وئەو وەسا باوه‌ر دکن کوئەو ئەمه‌ریکا دخاپینن، لێ ھەر دەما ئەمەریكا دەستێ خوە ژوان بكێشە و پشتگریا وان نەكە ئەو د بن لنگان ده تێکدچن.
ئەمه‌ریکا هه‌وله‌ک مه‌زن دده کو پیدێ و پککێ ژ هه‌ڤ جودا بکه. ئه‌ڤ یه‌ک گه‌له‌ک زه‌حمه‌ته، لێ دەبە و ممكنە ژی. ئه‌گه‌ر پید ژ بن کۆنترۆلا پککێ ده‌رکه‌ڤه و ل گۆرا مه‌رجێن کوردستانا ڕۆژاڤا ته‌ڤبگه‌رە، دێ ل گه‌ل ئالیێن دن یێن سیاسی یێن کوردستانی بکاربه هه‌ڤکاریا پێکبینن و باشترو زێدەتر مافێن مله‌تێ خوه ژی بده‌ست ڤه بینن.
ئه‌ڤ بریارا ئەمه‌ریکا ژ ئالیه‌کی دخوازه ژ ترکیه ڕه بده خوویاکرن کو، پید و پکک دوو رێخستنێن جودانه. لێ سیاسه‌تا ئەمه‌ریکا د ڤێ ده‌ربارێ ده هه‌تا چ ڕاده‌یێ سه‌ردکه‌ڤه نایێ زانین.
ئه‌ڤ هه‌ولدانا ئەمه‌ریکا ڤه‌کری دخوازه پککێ و پیدێ ژ هه‌ڤ ڤه‌قه‌تینه. دێ هه‌تا چ ڕاده‌یێ سه‌ربکه‌ڤه، ڕۆژێن پێشیا مه ده دێ بێهتر خوویا بکه.
۷.۱۱.۲۰۱۸
نووچه/ئانالیز
