سیاسی

ئەنجامێ شەرێ پەكەكێ و تركیێ

ڕۆژا 16ێ مه‌ها ده‌رباسبوویی، ئارتێشا ترکیێ ده‌ست ب ئۆپه‌راسیۆنه‌کا‌ سه‌ربازی ل دژی چه‌کدارێن پارتیا كاركەرێن كوردستانێ (پەکەکە) ل سینۆرێ ناڤبەر باشوور و باكورێ كوردستانێ ده‌ستپێ کر. د ئه‌نجامێ ڤێ ئۆپەراسۆنێ دا ‌ زیانێن جانی و مادی گەھشتنە خەلكێ وان دەڤارن .
ئه‌نداما کۆمیته‌یا دیڤده‌چوونا پرسگرێکێن سه‌ر سینۆر د پارلامه‌نتۆیا کوردستانێ دا، ژیان تاهر، دبێژه‌: ” ژ به‌ر سیاسه‌تا پەکەکێ و ئێریشێن ترکیێ ب ده‌هان گوندێن هه‌رێما کوردستانێ ڤالا بوونه‌ و نێزیکی 200 وه‌لاتیێن پارێزگەھا دوهۆکێ بوونه‌ قوربانی.

ژیان تاهر دبێژە: “کۆمیته‌یا مه‌ ژ ئالیێ پارلامه‌نتۆیا کوردستانێ ڤه‌ سه‌ردانا پارێزگه‌ها دوهۆکێ کر و ل گۆر دیڤده‌چوونێن مه‌، ته‌نێ ل سینۆرێ ناحیه‌یا باتۆفه‌ ژ به‌ر شه‌رێ پەکەکێ و ترکیێ، 27 گوند بێئاڤه‌دانی مانه‌ و د چه‌ند ڕۆژێن ده‌رباسبوویی دا‌ ژی 3 گوندێن دن ل وێ ناحیه‌یێ ژ به‌ر ئێریشێن ترکیێ ڤالا بوونه‌. هه‌روها ل سینۆرێ ناحیه‌یا ده‌رکارێ ژی 26 گوند ڕاستی تۆپباران و بۆمبه‌بارانا ترکیێ هاتنه‌. ل شنگالێ ژی 6 پێگه‌ھ هاتنە بۆمبه‌بارانکرن.”

ل گور گۆتنێن وێ پارلامه‌نته‌رێ ل سینۆرێ ئامێدیێ ژی ژ به‌ر هه‌بوونا بارەگا و ناڤه‌ندێن پەکەکێ 198 گوند ڤالا بوونه‌ و خه‌لکێ وان ل ئامێدیێ و کۆمه‌لگه‌هان ب جھ بوونه‌. “مخابن ژ به‌ر هه‌بوونا پەکەکێ ل سینۆرێن ئاکرێ و زاخۆ و ئامێدیێ به‌رده‌وام ترکیا‌ وان ناڤچه‌یان تۆپباران و بۆمبه‌باران دکه‌.”

ژیان تاهر گۆت : “د ئه‌نجاما شه‌رێ سه‌ر سینۆر و ئێریشێن ترکیێ، د سالێن ده‌رباسبوویی دا‌ ل زاخۆ 32 وه‌لاتی شه‌هید بوونه‌ و 10 که‌س ژی بریندار بوونه‌، ل ئامێدیێ 28 که‌س شه‌هید بوونه‌ و 4 ژی بریندار بوونه‌، ل سینۆرێ ئاکرێ ژی زێده‌تری 100 که‌سی شه‌هید بوونه‌.”

ل گۆر ژیان یاھر، ژ به‌ر ئالۆزی و ڕه‌وشا سینۆر و شه‌رێ پەکەکێ و ترکیێ، ڕێژه‌یا بێکاریێ ل سینۆرێ دوهۆکێ زێده‌ بوویه‌، ژ به‌ر کو ئه‌و ناڤچه‌یێن کو شه‌ر ل وان هه‌یه‌، ژ ئالیێ چاندنیێ ڤه‌ ده‌وله‌مه‌ندن و خه‌لکێ وان نکارن سوودێ ژ عه‌رد و زه‌ڤیێن خوه‌ ببینن، و خه‌لکێ وان گوندان ل دوهۆک و زاخۆ و ئاکرێ و ئامێدیێ بێکارن.


kdp.info

Back to top button