ئەورۆپایێ گۆرزێ خوە وەشاند
پەرلەمه‌نتۆیا ئه‌ورۆپایێ، د جڤینەكا تایبەت دا ڕاپۆرتا د ده‌ربارێ راوەستاندنا گۆتووبێژێن ژ بۆ ئه‌ندامەتیا ترکیێ په‌ژراند.
ڕاپۆرتا دەربارێ راوەستاندنا گۆتوبێژێن ئەندامەتیا ترکیێ د یەكێتیا ئەورۆپایێ دا ژ ئالیێ پەرلەمه‌نته‌رێ ئیسپانی یێ پەرلەمه‌نتۆیا ئه‌ورۆپایێ ناجۆ سانجه‌ز ئامۆر ڤه هاتبوو ئاماده کرن، ئه‌ڤ ڕاپۆرت ب هه‌ژماره‌کا زێده یا ده‌نگان هاته په‌سه‌ند کرن. د ده‌نگدانا ڕاپۆرتێ دا 480 ده‌نگدێران گۆت “ئه‌رێ”، 64 ده‌نگدێران گۆت “نەخێر” و 150 ده‌نگدێران ژی دەنگ ل سەر راپۆرتێ نەدان.
د ڕاپۆرتێ دا ل سەر مژارێن وەكی: مافێن بنگه‌هین، ده‌مۆکراسی و مافێن مرۆڤان ڕه‌خنه‌یێن توند ل ترکیێ هاتن کرن و تێ دا هاته دیارکرن کو ترکیه ژ نرخێن یه‌کێتیا ئه‌ورۆپایێ دوورکه‌تیه و تێرا خوه گرنگیێ ب پرسا کورد نادە.
راپۆرتا یەكێتیا ئەورۆپایێ ڕێڤه‌به‌ریا ترکیێ ب وێ یەكێ تاوانبار دكە كو تركیە ل دژی ھەموو چالاکیێن ئاشتیانه یێن کورد و عه‌له‌ویان توندوتووژیێ بكارتینە ب ئاوایه‌ک سیسته‌ماتیک كورد و عەلەوینا دئێشینە.
هه‌ر د وێ ڕاپۆرێ دا هاته دیارکرن کو پێویسته دۆزا سه‌رۆکێ ئۆفیسا ئامه‌دێ یێ به‌رێ، تاهر ئه‌لچی، کو 3 پۆلیس ب كوشتنا وێ تاوانبارن و دزیندانێ دانە، ب ئاوایه‌کی بێئالی بێ دیتن و تاوانبار بێن جه‌زاکرن.
راپۆرتا یەكێتیا ئەورۆپایێ ئیشارەتێ ب ئێریش و ته‌ڤگه‌را گرۆپا نژادپه‌ره‌ست یا ترکان کو وه‌که “گورێن بۆز” تێن ناڤكرن و ل دژی کورد، عه‌له‌وی و یونانیان كریارێن تەرۆریستێ ئەنجام ددن، هاته خوه‌ستن کو ئه‌ڤ ته‌ڤگه‌ر د لیسته‌یا ڕێخستنێن ته‌رۆری دا بھێتە زێده‌کرن.
وه‌زاره‌تا ده‌رڤه یا ترکیێ ژی کارڤه‌دان ل دژی ڤێ بریارێ نیشان دا و گۆت كو د سه‌رده‌مه‌کی دا کو هه‌ولێن باشکرنا په‌یوه‌ندیێن ترکیێ و یه‌کێتیا ئه‌ورۆپایێ دهاتن دایین د ڤێ رەوشێ دا قه‌بوولکرنا راپۆرتا په‌رلەمه‌نتۆیا ئه‌ورۆپایێ كو ” ژ راستیان دوورە” نه پێکانه.
