ئه‌ندامه‌کی لیژنه‌یا ئاساییش و به‌ره‌ڤانیێ ل ئه‌نجوومه‌نا نوونه‌رێن ئیراقێ گومانێن ده‌ربارێ هه‌بوونا ئالیکاریێ د ناڤبه‌را درۆنان و که‌سێن ل خوارێ ل ده‌ڤه‌را سلێمانیێ ئاشکه‌را دکه کو ژ به‌ر وێ ئه‌ندام و به‌رپرسێن پەکەکێ ب ئاسانی دبن ئارمانجا ئێریشێن درۆنان.
دوهی ٢٠٢٤/٨/٢٣ ێ درۆنه‌کی نێزیک سه‌ییدسادقێ ئۆتۆمۆبیله‌ک کر ئارمانج و ژ به‌ر وێ دو ئه‌ندامێن پەکەکێ یێن ب ناڤێن هێرۆ به‌هادین و گولستان تاران ژیانا خوه ژ ده‌ست دا.
ژ ئالیێ خوه ڤه ئه‌ندامێ لیژنه‌یا ئاساییش و به‌ره‌ڤانیێ ل پەرلەمه‌نتۆیا ئیراقێ، مه‌ریوان قه‌ره‌نی، د تۆرا خوه یا جڤاڤکی فێسبۆکێ دا نڤیسه‌ک ب ناڤنیشانا “بۆمه‌بارانا ئۆتۆمۆبیلا سه‌ییدسادق و گومانه‌ک…” به‌لاڤ کر و دیار کر: “ب چو ئاوایه‌کی شه‌ر و ڕێیێن چاره‌سه‌ریا له‌شکه‌ری نابه سه‌ده‌مێ چاره‌سه‌رکرنا ت ناکۆکیه‌کیان. هه‌رواها ئه‌نجامه‌کی وسا ژی ژێ ده‌رناکه‌ڤه. ل گه‌ل وێ ژی مخابن پەکەکە وه‌ک پارتیه‌ک نه وێ بخوه چو ده‌رفه‌ته‌ک ژ بۆ چاره‌سه‌ریا ئاشتیانه یا پرسا کوردی ل ترکیێ هشتیه و نه ژی نوونه‌رتیا کوردێن ترکیێ دکه و نه ژی باوه‌ریا وێ ب چاره‌سه‌ریا پرسا کورد هه‌یه. ژ به‌ر کو ڕێخستنه‌کا عه‌جێب ژێ ده‌رکه‌تیه کو هه‌ر هه‌یامه‌کی بانگه‌شه‌یێ بۆ تشته‌کی دکه و هه‌موو سیاسه‌تا وێ ژی د به‌رژه‌وه‌ندیا ترکیێ دا یه. هه‌رواها زیانێ دده کوردان و به‌لگه ژی ئه‌وه هه‌ر ڕۆژ بۆ ڕۆژێ ناڤچه‌یه‌کا کوردستانێ ڕاده‌ستی ترکیێ دکه. هه‌رواها پەکەکە ڕێ ناده چو پارتیه‌کا دن ل ترکیێ و باکورێ کوردستانێ کو ڕێیا چاره‌سه‌ریا ئاشتیانه ژ بۆ پرسا کورد ل وێ پارچەیا کوردستانێ ببینە.”
هه‌روەها دبێژە: ئه‌م دشه‌وتن ژ به‌ر کو جوانێن کورد ڕۆژ ب ڕۆژ زێده‌تر دبن سۆته‌مه‌نیا شه‌ره‌کی کو قه‌ت د به‌رژه‌وه‌ندیا کوردان دا نینه. هه‌روه‌کی کو ژ بۆ مه ژی جیهێ پرسێ یه! ئه‌و کی نه ل ده‌ڤه‌را سلێمانیێ ژ عه‌ردێ ڤه ئالیکاریا درۆنان دکن و وان ده‌ستنیشان دکن؟ مافێ هه‌رکه‌سێ هه‌یه ڤێ پرسێ بکه؛ گه‌لۆ چ ئۆده‌یه‌کا ئۆپه‌راسیۆنێن ڤه‌شارتی یا هه‌ڤبه‌ش دگه‌ل ئارتێشا ترکیێ ل وێ ده‌ڤه‌را یەنەکێ هه‌یه کو ئه‌رکێ کارێن سه‌ر ءه‌ردێ ژێ را هاتبه دایین؟ ژ به‌ر کو وه‌کی کو ئه‌م دزانن د هه‌یاما بۆری دا ب ده‌هان ڕێڤه‌به‌ر و ئه‌ندامێن پەکەکێ ل سلێمانیێ بوون ئارمانجا ئێریشێ. چما هه‌تا نها چو لێکۆلینه‌کا ڕاسته‌قین ده‌ربارێ ڤێ مژارێ دا نه‌هاتیه کرن و هه‌موو ب هن پۆله‌میک و بانگه‌شه‌یان و ڕۆندکێن تیمساحی ژ بۆ قوربانیان داوی پێ هاتیه؟”
ئه‌ندامێ لیژنه‌یا ئاساییش و به‌ره‌ڤانیێ ل پەرلەمه‌نتۆیا ئیراقێ دبێژه، گومان تێدا نینە کو ئه‌و جوره کارێن له‌شکه‌ری “بێ هه‌ماهه‌نگیا ل سه‌ر عه‌ردێ زه‌حمه‌ته بێن کرن. ژ بۆ وێ خه‌لک ژی مافێ وان هه‌یه گومان ژ هه‌بوونا ئالیکاریا ل عه‌ردێ بکن. ئه‌و گومان ژی دێ گه‌له‌ک زێده بن ده‌ما خه‌لک دبینه پارتییا ده‌ستهلاتدار یا سلێمانیێ و چاپه‌مه‌نیا وێ و پرانیا کرێگرتیێن وێ پارتیێ د شوونا کو لێکۆلینان ل سەر وان بوویه‌ران بکن و ڕاستیان ژ بۆ خه‌لکێ ئاشکه‌را بکن، تێن ئێریشی وی و یێ دن دکن.”
هه‌رواها داویێ دا ژی خه‌لکێ سلێمانیێ هشیار کر و هێڤی خوه‌ست کو خه‌لکێ ده‌ڤه‌را سلێمانیێ ب گشتی وێ ڕاستیێ تێگه‌هه‌شتبن کو پارتییا ده‌ستهلاتدار ل سینۆرێ خوه ئه‌گه‌ر ژ بۆ ده‌مه‌کی ژی ب ئاوایێ تاکتیکی دۆستانیه‌کی ده‌مکی ل گه‌ل پەکەکێ کربه، یان ژی به‌رپرسێن وێ پارتییێ ب جلووبه‌رگێن پەکەکێ خوه ده‌رخستبن پێش؛ “نها ڕه‌وش گوهه‌ریه و دبه کو ئه‌وێن دوهی خوه ب وی ڕه‌نگی نیشان ددان ئیرۆ ژ بن ڤه ل دژی پەکەکێ ڕێکه‌فتن کربن. ژ بۆ وێ ژی یا باش ئه‌و ه خه‌لک ژ پەکەکێ و ئه‌ندامێن وێ دوور بکه‌ڤن، نه کو ب ئاوایه‌کی نه‌په‌نی و ڤه‌شارتی ئۆده‌یه‌کا ئۆپه‌راسیۆنێن هه‌ڤبه‌ش ب کریاری چالاکیێن دن ژی ل دژی پەکەکێ بکن و خه‌لک ژی ل به‌ر وی ئاگری بکه‌ڤه.”
