ئەو شەرێ پەکەکە دفرۆشە باشوور باشووری رەتدکەن
دەمەک درێژە پارتیا کارکەرێن کوردستانێ (پەکەکە) بئەنجامدانا ڕەفتار، کار و کریارێن نەڕەوا ل باشوورێ کوردستانێ، بگڕە ژ کوشتنا وەڵاتیێن بێ گونەھ، بێڕێزی ب یاسا و سەروەریا ئاخا ھەرێما کوردستانێ، دەستدرێژی بۆ سەر ملک و گوندێن خەلکی، سەپاندنا باج و خەراجان ودانانا خالێن پشکنینێ، زێدەباری ئاڤاکرنا ڕێڤەبەریێن نە یاسایی و نە ڕەواو ونەدستۆری دناڤ سنوڕێن ھەرێما کوردستانێ دا ھەتا کار گەھشتیە وێ ڕادێ ھزر ل ئاڤاکرنا ھێزێن چەکدارێن سەربخوەڤە ل ژێر ناڤ ودرۆشمێن بریقەدار بکە.
ئەگەر ھەر چاڤدێرەکێ سیاسی، یێ بێ لایەن، خاندن و شرۆڤەکرنەکا زانستی و ڕاست درست ژبۆ سیاسەت و رەفتارێن پەکەکێ بکە، ل گۆر ھەموو پیڤانان، ژبلی ڕاکێشانا ھەرێما کوردستانێ بەرەڤ شەرەکێ دن یێ خوەکوژی، چ واتا و ئاماژەیێن دن نینن.
د بەرامبەردا و ئەگەر مرۆڤ ڕاستگۆبە وبکاربە ڕەنگان ژھەڤ جودا بکە، دەستێ خوە دانیتە سەر وژدانا خوە ژبۆ مێژۆیێ دیدەڤانیەکێ بدە، پێدڤیە مرۆڤ دان ب وێ ڕاستیێ بکە کو ھەرێما کوردسانێ و بتایبەتی پارتیا دەموکراتا کوردستانێ، ھێزا ژئالیێ پەکەکێ ڤە ئارمانجبەر، ھەدارەک درێژ کێشایە و بێنفرەھیەک مەزن نڤاندیە بەرامبەر سەدان تاوان، پێشێلکاری و رەفتارێن دوژمنکاریێن پەکەکێ ، بتنێ پێخەمەت شەرەکێ دن یێ کورد کوژیێ جارەک دن ڕوونەدە.
گومان تێدا نێنە ئەگەر ئەڤ شەرێ پەکەکە دەھۆڵێ ژێرا لێددە، رووبدە دێ تەڕ و ھشک پێکڤە ھێنە سوتن، وزیانمەندێ مەزن یێ ڤی شەری دێ دۆزا ڕەوا یا گەلێ کوردستانێ و خەلکێ فەقیر و ھەژار بە، دبەرامبەردا ، دێ دلێ داگیرکەر و پڵانگێڕێن ڤی شەری و ل پێشیا ھەموویان ترکیا و ئیرانێ ژی شاد کە.
پەکەکە، بتایبەتی پشتی ژئەگەرا لاوازیا ھێزێن سیاسی یێن ڕۆژاڤایێن کوردستانێ و بھاریکاریا ڕژیما بەشار ئەسەد، کاری ئیرادەیا خوە یا سیاسی و لەشکەری ل سەر ڕۆژئاڤا بسەپینە، ھەوڵا دووبارەکرنا ھەمان سیناریۆ ل باشوور ژی ددە.
گومان تێدا نینە کو پەکەکە خوەدی ھێزەکا چەکدار یا توکمە، ئیدولۆژیک دسپلێنە و دکارە تەڤلەھەڤیەک مەزن و مەترسیدار ل سەر باشوور چێبکە.
لێ پێدڤیە سەرکردایەتیا پەکەکێ ژبیرنەکە کا چاوە دەما داعش ھاتی، ھەولێر ل با ئەمریکا وەڵاتێن ڕۆژئاڤا ھێلا سۆربوو، ب ھەمان ئاوایی دێ ژبۆ پەکەکێ و ترکیا و ئیرانێ ژی ھێلا سۆربە.
لەوما پێدڤیە عاقلمەندێن پەکەکێ (ئەگەر ھەبن) ھزر ل ئەنجامێن مالوێران یێن ڤی شەڕی بکەن و پێداچوونەکێ ب سیاسەتا خوە یا چەوت و شەڕانگیزیک و قەبخاستنێ دا بکە و زمانێ لۆژیک و دیالۆگێ بگرنە بەر و ھەستیاریا ھەڵویستێ باشوور و رەوشا گوندنشینان ب بەرچاڤ وەرگرن و دام دەزگەھێن خوە ژمیت و سیخۆڕان پاقژکەن ئەگەر نە دێ خوە و باشوورێ کوردستانێ ژی تۆشی کریزەک مەزن یا بێ باوەریێ و دوژمنکاریێ کەن، زێدباری ئەنجامێن مەترسیدار و نەچاڤەڕێکری.
بەلێ ڕاستە خەلکێ باشوور ژگەندەلی، بێدادیی، دفن بلندی و فەخفەخا بەرپرسیار، کور، کچ و خولام و خدامێن وان بێزارە، بەلێ ڕاستە ژ ئەگەرا کێمیا خزمەتگوزاریان و بھابوونا بازاری تۆڕەیە، لێ ئەڤ چەندە ناھێتە وێ واتەیێ کو باشووری دێ سەرێ وەریسی دەنە دەست پەکەکێ یا کۆ ئەڤە ٤٠ ساڵە خۆرت و کچێن کوردان ددە کوشتن پێخەمەت ڕێگریێ ل ئاڤاکرنا دەولەتەکا کوردی بکە و چریسکا ھزرا نەتەوی دناڤ گەلێ کوردا بکوژە و ببە پاسەوانێ پاراستنا سنورێن داگیرکەران.
لەوما پێدڤیە پەکەکە ل سەر ڤی بالگەھی نەنڤە و چ خەونێن گول گولی ژی بداگیرکرنا باشوورڤە ژی نەبینە.
ل داویێ گەرەکە پەکەکە ب کریار بسەلمینە کو ھێزەک کوردستانیە و گۆڕەپان قۆلایا وێ یا ستراتیژی و خەباتا وێ باکورێ ژبیرکریە، نە باشوورێ ئارام و ئازادە.
ئیدریس تروانشی
2019.07.21
