سه‌رۆکێ هه‌رێما کوردستانێ نێچیرڤان بارزانی ڕاگەهاند کو، ل گۆر ده‌ستوورا ئیراقێ، ئیراقێ دەولەتەک فه‌ده‌راله، لێ د ڕاستیێ دا ئیراق هه‌ر تشته لێ نەفەدەرالی یە و گۆت کو، تشتێ ئیراق ل هه‌مبه‌ر هه‌رێما کوردستانێ دکه “ناڤه‌ندپارێزیه‌کا گه‌له‌ک بهێزه.”
سه‌رۆکێ هه‌رێما کوردستانێ نێچیرڤان بارزانی ئه‌ڤ گۆتن رۆژا چارشه‌مێ، ۸ێ جۆتمه‌ها ۲۰۲٥ئان، د پانه‌له‌کا تایبه‌ت دا دا کۆربەندا میری دا گۆتن.
“ده‌ستوور هاتیه بنپێکرن و ئیراق نه فه‌ده‌راله”
نێچیرڤان بارزانی د پانەلێ دا گۆت کو، سه‌رکردایه‌تیا کورد د ئاڤاکرنا ئیراقه‌که نوو دا چو کێماسی نه‌کریه و ده‌ستنیشان کر: “ده‌ستوورا ئیراقێ ده‌ستکه‌فته‌که مه‌زن بوو کو نابه ئه‌م کێم بنرخینن، لێ گه‌لۆ ده‌ستوور وه‌که خوه هاتیه جیبجیکرن؟ بێگومان نا.”
سه‌رۆکێ هه‌رێمێ دیار کر، ژ بۆ دیتنا ئیراقه‌کا خوه‌شگوزاران ژ ئالیێ سیاسی، جڤاکی و ئابۆری ڤه، شه‌رتێ یه‌که‌م پابه‌ندبوونا ب ده‌ستوورێ یه. هه‌روها گۆت: “پرسگرێکا هه‌ری مه‌زن ل وه‌لات ئه‌وه کو هه‌تا نها نایێ زانین سیسته‌ما وه‌لات فه‌ده‌راله یان ناڤه‌ندی یه. ئیراق د ناڤه‌رۆکا خوه دا ژ بلی فه‌ده‌رالیزمێ هه‌ر تشته.”
“یه‌کگرتنا کوردان ل به‌غدایێ چاڤکانیا هێزێ یه”
ده‌ربارێ هلبژارتنێن پارله‌مانا ئیراقێ دا، نێچیرڤان بارزانی ئاشکهره کر کو هلبژارتنا ڤێ جارێ گه‌له‌ک گرینگه و ده‌ستپێکا قۆناغه‌که نوو یه، له‌وما دڤێ هه‌موو ئیراقی ب هه‌ستیاری نێزیک ببن.
سه‌رۆکێ هه‌رێما کوردستانێ گۆت: “دڤێ ئه‌م وه‌که کورد به‌شداری وان هلبژارتنان ببن و خوه ئیسبات بکن، ژ به‌ر کو یه‌کگرتنا کوردان ل به‌غدایێ چاڤکانیا هێزێ یه ژ بۆ هه‌رێما کوردستانێ.”
پێکانینا کابینه‌یا نوو و پرسا مووچه‌یان
ل سه‌ر هلبژارتنێن پارله‌مانتۆیائا کوردستانێ و پێکانینا کابینه‌یا ده‌هه‌م یا حکومه‌تا هەرێما کوردستانێ، نێچیرڤان بارزانی دا زانین کو، هلبژارتن گه‌له‌ک ب سه‌رکه‌فتی ل هه‌رێما کوردستانێ برێڤه چوون. هه‌روها گۆت: “راسته پێڤاژۆیا پێکانینا کابینه‌یا نوو ده‌مه‌ک درێژ کشاند، لێ یا گرینگ ئه‌وه کو نها په‌یوه‌ندیه‌ک گه‌له‌ک باش د ناڤبه‌را پەدەکێ و یەنەکێ دا هه‌یه.”
هه‌روها ئاشکهره کر ژی، وان قۆناغێن گرینگ ب یەنەکێ را ده‌رباس کرنه و ل سه‌ر نێرینا سیاسی یا ژ بۆ پاشه‌رۆژێ و چاوانیا ڕه‌فتارکرنا ب به‌غدایێ را “به‌لگه‌یه‌کا هه‌ڤبه‌ش” ئاماده کرنه و ته‌نێ لهه‌ڤکرنا ل سه‌ر پۆستان مایه. لێبه‌لێ، وی گۆت کو ئه‌و نه د وێ باوه‌ریێ دا یه کو کابینه‌یا ده‌هه‌م به‌ری هلبژارتنێن پارله‌مانا ئیراقێ وه‌ره پێکانین.
سه‌رۆکێ هه‌رێما کوردستانێ به‌هسا پرسگرێکا مووچه‌یان ژی کر و گۆت: “پشتی هلبژارتنێن پارله‌مانا ئیراقێ، دڤێ هه‌م ده‌ستوور وه‌که خوه وه‌ره جیبجیکرن، هه‌م ژی دڤێ پرسگرێکا مووچه‌یان ب داوی ببه.”
مه‌ترسی ل سه‌ر پاشه‌رۆژا ئیراقێ: هێزێن ده‌رڤه‌یی یاسا‌یێ به‌لا مه‌زنن
ده‌ربارێ مه‌ترسیێن ل سه‌ر پاشه‌رۆژا ئیراقێ، سه‌رۆکێ هه‌رێما کوردستانێ ئاشکهره کر کو “تشتێ کو مه‌ترسی یه ل سه‌ر وەلات، ئه‌و هێزێن ده‌رڤه‌یی یاسا‌یێ نه، ئه‌و به‌لا مه‌زنن ژ بۆ پاشه‌رۆژا ئیراقێ.”
سه‌کتۆرا تایبه‌ت ل هه‌رێما کوردستانێ: ماتۆرا پێشکه‌تنێ
نێچیرڤان بارزانی، ده‌ربارێ سه‌کتۆرا تایبه‌ت ل هه‌رێما کوردستانێ دبێژه: “ماتۆرا پێشکه‌تنا هه‌ر وه‌لاته‌کی سه‌کتۆرا تایبه‌ت ئا وی وه‌لاتی یه. نها سه‌کتۆرا تایبه‌ت ل هه‌رێما کوردستانێ پێشکه‌تنێن مه‌زن ب ده‌ست خستیه، هه‌تا ئه‌م گەهیشتنه ئاسته‌کێ کو حکومه‌تا هه‌رێمێ ل سه‌ر ڤێ یه‌کێ دفکره کو ب قانوونی بکه کو کارمه‌ندێن سه‌کتۆرا تایبه‌ت خانه‌شین ببن.”
ئێریشێن درۆنان ل سه‌ر هه‌رێما کوردستانێ: به‌غدا به‌رپرسیاره
ده‌ربارێ ئێریشێن درۆنی ل سه‌ر زه‌ڤیێن نه‌فتێ یێن هه‌رێما کوردستانێ، نێچیرڤان بارزانی ڕاگەهاند: “به‌غدا ژ مه پر چێتر دزانه کو ئه‌و درۆن ژ کو هاتنه ئاڤێتن. ئه‌ڤ نه ته‌نێ گه‌فه‌که ل سه‌ر هه‌رێما کوردستانێ، لێ ئه‌ڤ بێقیمه‌تکرنا هه‌موو سازیێن ئیراقێ یه، و دژی سه‌روه‌ریا وەلاتی.”
هه‌روها گۆت: “پرسگرێکا مه‌زن ئه‌وه کو ئه‌و هێزا چه‌کدار یا کو درۆنان ل دژی هه‌رێما کوردستانێ ب کار تینه، مووچه‌یێ خوه ژ حکومه‌تا ئیراقێ وه‌ردگره. ئه‌ڤ پر مه‌ترسیداره. ئێریشێن درۆنا یێن ل سه‌ر هه‌رێما کوردستانێ دڤێ بێن ڕاوه‌ستاندن، وه‌کی دن هه‌رێم ژی دێ به‌رته‌ک نیشان بده.”
تێکلیێن هه‌رێما کوردستانێ و ئیرانێ
ده‌ربارێ تێکلیێن هه‌رێما کوردستانێ و ئیرانێ، نێچیرڤان بارزانی ئانی زمان کو “ئیران جیرانه‌کی مه یێ گرینگه، سینۆره‌کی مه یێ درێژ ب هه‌ڤ را هه‌یه، و قه‌ت ناخوازن تێکلیێن مه ب ئیرانێ را خراب ببن. ئه‌م نابن چاڤکانیا گه‌فان ژ بۆ وی وه‌لاتی، ئه‌م دخوازن ببن فاکتۆرا ئه‌وله‌هیێ ل هه‌رێمێ، نه فاکتۆرا خرابکه‌ریێ.”
هه‌روها گۆت: “سالا بۆری ب سه‌ردانه‌کێ چووم ئیرانێ، ئه‌ز وسا دفکرم کو پشتی ڤێ سه‌ردانێ ڕووپه‌له‌ک نوو د تێکلیێن ناڤبه‌را ئیران و هه‌رێما کوردستانێ دا هاتیه ڤه‌کرن. ئه‌م دخوازن پتر تێکلیێن خوه ب ئیرانێ را پێش بخن.”
تێکلیێن هه‌رێما کوردستانێ و ترکیه‌یێ
ده‌ربارێ تێکلیێن هه‌رێما کوردستانێ و ترکیه‌یێ، نێچیرڤان بارزانی دبێژه: “تێکلیێن مه یێن پر دۆستانه ب ترکیه‌یێ را هه‌نه، هه‌م ژ ئالیێ ئابۆری و هه‌م ژی ژ ئالیێ سیاسی ڤه، و ئه‌م دێ ڤان تێکلیێن بەردەوام بکن.”
سه‌رۆکێ هه‌رێما کوردستانێ ل سه‌ر پرۆسه‌یا ئاشتیێ یا ترکیه‌یێ ئاخڤی و ئاشکهره کر کو “تشتێ کو ئه‌ز دبینم، ترکیه د وارێ پرۆسه‌یا ئاشتیێ دا پر جدی یه، بریاره‌ک جدی هه‌یه ژ بۆ کو پرۆسه بگەهە ئه‌نجامه‌کێ. ئه‌ڤ ده‌رفه‌ته‌ک دیرۆکی یه کو دڤێ نه‌یێ ونداکرن.”
